1 Siangphahrang 18 - Zanniat Bible

Elijah Le Baal Prophette

¹ Can rai ai ruahsi lo kum thumhnak ah Bawipa in Elijah hnenah, “Feh tulai Kumpibawi Ahab tawk ta tu. Cen ruahsiruai tuh ing,” tiin ti i.

² Ciamanin Elijah tu feh i. Samaria ah rian roh ngai i.

³ Ciamanin Ahab in kumpibawi inn kiltute uktu Obadiah ko i. Obadiah tu Bawipa sangtu pha bik i ai,

⁴ Jezebel in Bawipa ai prophette a rek betbo fangin Obadiah in prophet zakhat fehpui ai lungkhu songah sawmnga sawmnga in thup ai aih tuh rong le ti khai pe i.

⁵ Ahab in Obadiah hnenah, “Feh kawm ngasing khaw cirh kam le runpui kam hmuahhmuah ah hampa si kawm tuh ising. Hampa hmu lesingkhaw kin siphuhte le kin laakte heh nung thai hmio i,” tiin ti i.

⁶ Amahte feh tuhhnak ram zem dun ai hmun dangdang ah feh kawm i.

⁷ Obadiah tu a vak thliahthlo laitak ah mangrinlo in Elijah thawn tawk dun i. Elijah i ti ling vut ai, a hmaiah ut in, “Bawipa nangmah heh isim?” tiin ti i.

⁸ Elijah in, “I! Elijah ing. Feh tulai kumpibawi na bawipa heh, ‘Elijah heta ah um i,’ tiin rel tu,” ti i.

⁹ Ciafangin Obadiah in, “Ziang i bawn manin he bangtluk naper i ruai isi? Kumpibawi Ahab in i rek tuh menma hen!

¹⁰ A nungmi Bawipa na Pathian hming sal in na rel ing: Laivum ram cangcang ah kumpibawi in na si ṭio i. Akon ram ahkhai na um lohnak thu kumpibawi Ahab hnenah a rel fangin, na um lohnak heh thungai i ti linghnak ah amahte ram uktu heh thukhamruai i.

¹¹ Cen tunin kumpibawi hnenah feh in heta ah um i tiin rel tu tiin i ruai isi.

¹² Kin feh sawngpah in kin ling lohnak hmunah Bawipa ai rauhla in na phur teu selai akontih in ti tlang tuh i ing? Heta ah na um thu Ahab rel ai ani in na hmu leh lo fangin kai tu i rek tuh i. Na linghnak bangin kai tu i naupang lai in Bawipa biatu le kihzahtu ing.

¹³ Jezebel in Bawipa ai prophet tampui a rek awng laitak ah prophet zakhat lungkhu songah sawmnga sawmnga in thup ai amahte aih tuh le din tuhin ti le rong khai pe ing ti ling lo ihang sim?

¹⁴ Ciamanin heta ah na um thu heh kumpibawi rel tuhin akontih in i ruai isi! I rek tuh hehin!” tiin ti i.

¹⁵ Ciafangin Elijah in, “I biahnak Cungnungber Bawipa hming in thu na kham ing: Tunnia ah kumpibawi tawk tuh ing,” tiin ti i.

¹⁶ Ciamanin Obadiah tu kumpibawi Ahab hnenah feh ai rel i. Cen Ahab in Elijah tawk tuhin feh vut i.

¹⁷ Ahab in Elijah a hmu fangin a hnenah, “Nangmah ihang sim, nang Israel ram songai mi hnaihnoktu ber pa!” tiin ti i.

¹⁸ Ciafangin Elijah in, “Mi hnaihnoktu heh kaimah ilo ing. Nangmah sawn isi. Nangmah le na pa i si. Bawipa ai thupehnak hlun nuam loin Baal khuavang sawn bia kawm i si.

¹⁹ Israel mite hmuahhmuah hnenah thupe tulai Karmel Mual ah i tawk tlang tuseh. Kumpibawinu Jezebel ai kilkhawlhnak Baal prophette za li le sawmnga le khuazingnu Asherah ai prophette za li khai koih tu,” ti i.

²⁰ Ciamanin Ahab in Israel mite hmuahhmuah le Baal prophet hmuahhmuah heh Karmel Tlang ah kokhawm sio i.

²¹ Elijah tu mizapui hmaiah ding ai, “Zaicam tian ning thinlung khan thil loin um tlang rih tuh i si? Bawipa khiah Pathian lekhaw bia tu ih; ikhalselai Baal tu Pathian i, ti le i sikhaw bia tu ih,” tiin ti i. Ikhalselai mizapui tu zaikhai pong tlang lo i, dap tlang khep i.

²² Ciafangin Elijah in, “Bawipa ai prophet tu kaimah lek i tang ihang. Ikhalselai Baal prophette tu za li le sawmnga um tlang lai i.

²³ Kawlpawcangte lu hnih in koih tu ih. Kawlpawcang lu khat tu Baal prophette in lang tuseh; ro tu selai a sa cem in zanthing vumah dah tlang tuseh. Ikhalselai mai sem tlang maseh. Kaimah in kawlpawcang lu khat heh ciatihin ti tuh ve ing.

²⁴ Cen Baal prophette tu amahte khuavang hnenah sawngen tlang tu selai kaimah khai i Bawipa hnenah sawngen tuh ve ing. Kin sawngenhnak za in mai a hlaktutu heh Pathian ngaingai i tuh i,” tiin ti i. Mizapui tu lungkhim ai au tlang dekdo i.

²⁵ Cen Elijah in Baal prophette hnenah, “Ning tu minung tampui ning imanin hmasa ah kawlpawcang lu khat lang tu ilai ralring in um tu ih. Ning khuavang hnenah sawngen tu ih. Ikhalselai zanthing tu mai sem rih mah ih,” tiin ti i.

²⁶ A tihnak bangin anite in a koihhnak kawlpawcang lu khat lang ai ro tlang i, ralring ai Baal hnenah sun tianin sawngen tlang i. “Aw Baal, kin awi tu law,” tiin au tlang dekdo i. Cen amahte tianghnak puleng cingkim ah lam tlang dekdo i. Ikhalselai awi kel lo i.

²⁷ Ni sun fangin Elijah in a tihhrim in, “A cawm deuh in ngen tu ih! Baal tu khuavang hehin! Thu dang a ruat lai khai i thai i. Ihlahle buruk to lai i tuh i. Khual tlawng iselai tang aisu in ling ising! Ihlahle a mitmu lai i tuhai a phawr ning kul thai pang i!” tiin ti i.

²⁸ Baal prophette tu cawm amam in sawngen tlang i. Amahte dan bangin fai le vang in dawt dun ai amahte thisan khai suak tliatlo i.

²⁹ Sun hnua tian au ai rung tlang i; ikhalselai zaikhai sawn lo i. Ziang aw khai um lo i. Thawmvang zaikhai za tlang lo i.

³⁰ Ciafangin Elijah in mizapui hnenah, “I nong deuh tu ih,” ti ai, amahte veksen in a cingkim ah kawi tlang i; Bawipa caah a tianghnak puleng a hnawm cia khiah rem kong i.

³¹ Jacob ai tesinfa miphunte hlaihnih caah lungto hlaihnih lang i. Jacob tu Bawipa in Israel tiin hming a bawnhnak pa i.

³² Ciami lungtote hlaihnih in Bawipa bia tuhhnak puleng tiang i. Cen puleng cingkim ah tidap pung hnih tluk a va thai in khur co i.

³³ Puleng vumah zanthing pum ai kawlpawcang sa heh a cem sio hnuaah zanthing vumah dah i. Elijah in, Ralca belte pali dim in ti thun tu ilai sa le zanthing heh burh tu ih,” tiin ruai i. A tihnak bangin bawn tlang i.

³⁴ Ani in, “Burh tu lala ih,” ti ai, burh tlang lala i. “Burh rih tu ih,” ti ai burh tlang lehthio i.

³⁵ Puleng vuman ti let ai a cingkim ai a cohnak khur tu dim sio i.

³⁶ Sun hnua hibawlhnak sel cu fangin prophet Elijah tu puleng hiangah kawi ai, “Aw Bawipa, Abraham, Isaac le Jacob ai Pathian, nang tu Israel ai Pathian isi tihnak tunin hmuh tu hram law; kaimah khai na cengfa ing ai hemi thilte heh nangmah ai thupehnak bangin i bawnhnak i ti khai larruai tu hram law.

³⁷ Aw Bawipa, i sawn tu hram lai ciatihin he minungte in Bawipa nangmah heh Pathian taktak i, ti na ling tlang tuhai na hnenah hoi leh tuh isi,” tiin sawngen i,

³⁸ Ciasawng fangin Bawipa in mai hlak ai hibawlhnak sa le zanthing le lungtote heh kang sio i. Lai khai kangro sio ai khur songai ti khai kang sio i.

³⁹ Ciami tu mizapui in hmu tlang fangin laipua ah bok tlang ai, “Bawipa tu Pathian i; Bawipa ian Pathian i,” tiin au tlang dekdo i.

⁴⁰ Ciafangin Elijah in, “Baal prophette heh pom tusek ih. Pakhat khai luatruai mah ih!” tiin thupe i. Baal prophette tu mizapui in pom sek ai Kishon rawn ah Elijah in fehpui ai rek berh i.

Ruahsi Leh I

⁴¹ Elijah in kumpibawi Ahab hnenah, “Tun feh tulai rong ai tu. Ruah a kawi thawm za ing,” ti i.

⁴² Ahab rong ai tuhin a feh laitak ah Elijah tu Karmel tlang vumah kai ai a khuk le a khuk karlak ah a lu dual ai laipua tong in ut i.

⁴³ Cen, a hnenum pa hnenah, “Feh tulai tifingriat lam sik ta tu,” tiin ti i. A hnenum pa tu feh ai a let fangin, “Zaikhai hmu lo ing,” ti i. Elijah in fehruai leh i. Vel sarih tian sik tuhin ruai i.

⁴⁴ A vel sarihhnak ahcen, “Mairo cikniu kuttum tia tifingriat lamin a kawi hmu ing,” ti i. Elijah in a hnenum pa hnenah, “Feh tulai kumpibawi Ahab hnenah rel tu: A siphuhleng to in ruah in a kham hlanah a inn ah tlung tuseh,” tiin ti i.

⁴⁵ A rai hlanah van ah khuanim ai hlivua zuang ai ruah tuk roh si dekdo i. Ahab tu a siphuhleng to ai Jezreel ah let tuhin suak i.

⁴⁶ Bawipa ai huham tu Elijah vumah hleng ai a hnikponte a el ah kho ngai in merh ai Ahab ai hmaiah Jezreel khua hiangniu tian dawp dekdo i.