1 Siangphahrang 17 - Zanniat Bible

Elijah Le Ruahsi Lohnak Thu

¹ Gilead ram Tishbe khua an Elijah tihnak prophet pakhat heh kumpibawi Ahab hnenah, “A nungmi Bawipa Israel ai Pathian, i ruaihmi Bawipa hming in na rel ing: Kaimah in ruahsi tuhang seh ti hlanlo, tunai panin hmai lam kum hnih kum thum song heh nai ituseh ruahsi ituseh um tuh lo i,” tiin rel i.

² Cen Bawipa in Elijah hnenah,

³ “Hemi hmun heh zam tulai, nisuah lamah feh in Jordan Runpui in nisuah lamai umhnak Kherith Rawnti kamah relh tu.

⁴ Ciami rawnti in ding tuh ti ngah tuhai ciata ah rong na petu tuhin langakte ruai zo ing,” tiin ti i.

⁵ Elijah in Bawipa thu ngai ai Kherith Rawnti kamah relh i.

⁶ Ciami rawnti in ti ding ai langakte in amah ca zansiar le zingsiar in sang le sa pe de i.

⁷ Tlawmlai a rai hnuaah ruahsi lo manin ciami rawnti heh kang lio i.

Elijah Le Hmaitong

⁸ Cen Bawipa in Elijah hnenah,

⁹ “Sidon khua hiang Zarephath khua ah feh tulai um tu. Ciata ah hmaitong pakhat heh na cawmtu tuhin ruai zo ing,” tiin rel i.

¹⁰ Ciamanin Elijah khai Zarephath khua ah feh ai khuasong luthnak kotka a hleng fangin hmaitong pakhat thing fom hnelhno hmu i. Ciami hmaitong nu hnenah, “Ninghioniu in tidap ding tuh i pe tu,” tiin ti i.

¹¹ Tidap suah tuhin hmaitong nu a feh laitak ah, “Ai tuh sang tlawmniu khai i koih sah tu law,” tiin auh i.

¹² Ciafangin hmaitong nu in, “Bawipa na Pathian hming sal in na rel ing: Sang zaikhai nai lo ing. I naihnak tu bel songah sangvut kuthuam khat le palang songah olive thau a tlawmniu lek ihang. Heta ah thing tlawmniu i fomhnak in sang i naihnak tlawmniu heh i fapa le kaimah ca suang tuh ing. Ciami heh rong kin ai tuh a hnuataber tuh ihang. Cia hnuaah tu rong loin kin thi tuh ihang,” ti i.

¹³ Ciafangin Elijah in, “Lau mah! Feh tulai na rong suang tu. Ikhalselai a hmasaber ah na naihnak songin hlom khat a cikniu in lang tulai i hnenah koih tu. Cen a tanghnak tu nangmah le na fapa caah suang tu.

¹⁴ Zaimantifangin hemi thu ahcen Israel ai Pathian Bawipa in, ‘Bel songai sangvut tu bo tuh awng lo ai palang songai thau khai bo tuh awng lo i, Bawipa kaimah in ruah i siruai hlanlo,’ ti i,” tiin rel i.

¹⁵ Hmaitong nu tu feh ai Elijah ai relhnak bangin bawn sio i. Ciatihin nisiar in, Elijah ca ituseh, hmaitong nu le a innsang caah ituseh, amahte veksen in rong aih tuh nai ṭiode i.

¹⁶ Bawipa ai thukham cia Elijah ai a relhnak bangin bel songai sangvut tu bo awng lo ai palang songai thau khai bo awng lo i.

¹⁷ Tlawmniu a rai fangin hmaitong nu ai fapa ur i. Roh deuhdeuh ai hnuavai fangin a haihawh bo i.

¹⁸ Ciafangin a nu in Elijah hnenah, “Pathian ai minung pa, zaimanin i vumah hebang thil hlengruai isi? I sualhnakte Pathian lingruai in i fapa thiruai tuhin heta ah kawi isim?” tiin ti i.

¹⁹ Ciafangin Elijah in, “Na fapa i hnenah koih tu,” tiin ti i. Elijah in hmaitong nu ai fapa heh a nu kut in lang ai a umhnak vumta khan ah cawi ai khuahluan vumah hlim i.

²⁰ Cen Elijah in, “Aw Bawipa i Pathian, zaimanin he hmaitong nu ai vumah thil sual roh bawn isi? I vumah ninghiohnak nai ai i kilkhawl i. Tunah a fapa thiruai isi!” tiin cawm ngai in sawngen i.

²¹ Cia hnuaah Elijah tu ciami naupang pa vumah vel thum tian bok ai, “Aw Bawipa i Pathian, he naupang pa heh nungruai leh tu hram,” tiin sawngen i.

²² Bawipa in Elijah sawngen aw za ai, naupang pa tu haihawh ai nung leh i.

²³ Elijah in naupang pa tu hniata khan ah cawi leh teu ai a nu hnenah pe i. “Sik tu, Na fapa a nung leh heh!” tiin ti i.

²⁴ Ciafangin a nu in, “Tun tu Pathian minung ngaingai isi ai na hnenin Bawipa pong rori i ti ling zo ing,” tiin ti i.