1 Siangphahrang 14 - Zanniat Bible

Jeroboam Ai Fapa Thihhnak

¹ Cia can ah Kumpibawi Jeroboam ai fapa Abijah ur i.

² Ciamanin Jeroboam in a nupui hnenah, “Aisu inkhai lingthiam thai loin a phundang in thuam tulai, prophet Ahijah umhnak Shiloh khua ah feh tu. ‘Israel kumpibawi na cang tuh i,’ tiin a reltu heh amah prophet Ahijah i.

³ Amah caah sangzawl hra, sang em tlawmniu le khoitizu palang khat keng tu. Kin fapa akontih in um tuh i, ti thu zawt tulai na rel tuh ngawn i,” tiin ti i.

⁴ Ciamanin a nupui tu Shiloh khua Ahijah inn ah feh i. Ahijah tu hlombawr hang ai a mit khai mal ihang.

⁵ A fapa a ur manin Jeroboam a hnen kawi tuhhnak thu khiah Pathian in rel cia zo i. Cen Jeroboam nupui hnenah a rel tuhhnak khai rel cia zo i. Jeroboam ai nupui tu feh ai midang bangin thuam ai Ahijah hnenah hleng i.

⁶ Ikhalselai dawngkham hiang a hleng khiah Ahijah in a za fangin, “Lut tuhang. Jeroboam ai nupui isi na ling hlen ing. Zaimanin midang bangin thuam dun dekdo isi? Nangmah ca thu pha lo nai ing.

⁷ Let tulai na pasal Jeroboam rel tu. Bawipa, Israel ai Pathian in a hnenah hetihin ti i: ‘Mizapui songin nangmah heh i miphun Israel mite uktu tuhin na ril ing.

⁸ Ram ukhnak tu David ai tesinfate hnenin lang ai nangmah na pe ing. Ikhalselai i thu semkhim liang in ngai ai, i thupehnak hlun in i lungkhimhnak lek a bawntu i cengfa David bangtu ilo isi.

⁹ Na hlanai ram a uktu kumpibawite tahin luar deuh in na sual i. Kaimah i hnawl zo ai bia tuhin milim le mizukte na bawn manin i thin i rawruai zo isi. Kai tu a hnua lamah i lon zo isi.

¹⁰ Ciamanin na ukhnak vumah thil poimawh hlengruai tuhai na tesinfate pasal hmuahhmuah upa ituseh naupang ituseh, thiruai tuh berh ing. Na innsang le na songkhatte phiat tuh sio ai ek a tai de bangin a ziam hlanlo tai tuh ing.

¹¹ Khuapui songai a thimi na songkhatte tu uicote in a luang ai tuh i; hampalak ai a thi mite tu langtarte in ai tuh i. Bawipa kaimah in rel zo ing,’ tiin ti tu,’ tiin ti i.

¹² Cen Ahijah in Jeroboam ai nupui hnenah tu, “Tun tlung ta tu. Ning khua na hleng sawngpah in ning fapa thi tuh i.

¹³ Israel mite hmuahhmuah in kah tuhai phum tuh i. Jeroboam innsang songah amah lek phatak niu ai phumhnak i tuh i. Zaimantifangin amah vum lek ah Israel ai Pathian Bawipa a lungawi i.

¹⁴ Israel mite uktu tuhin Bawipa in kumpibawi dang pakhat dah tuhai amah in Jeroboam ai ukhnak boruai tuh i.

¹⁵ Bawipa in Israel tu cawh tuhai runpui songai phaikung a hlin bangin Israel heh hlin tuh ṭiode i. Bawipa in amahte pipu hnenah a pehnak he rampha le ram nuam in Israel mite tu phai tuh lio ai Euphrates runpui ralah piak tuh sio i. Zaimantifangin khuazingnu Asherah ai lim bawn tlang manin Bawipa ai thinrawtiar zo i.

¹⁶ Bawipa in Israel tu zangtak tuh i, zaimantifangin Jeroboam in sualhnak bawn ai Israel mite khai sualhnak songah hoi zo sio i,” tiin ti i.

¹⁷ Jeroboam nupui tu suak ai Tirzah ah tlung i. A inn a lut sawng fangin a fapa heh thi i.

¹⁸ Israel mite in kah ai phum tlang i. Bawipa in a cengfa prophet Ahijah hnenah a relhnak bangin khim i.

Jeroboam Thi I

¹⁹ Kumpibawi Jeroboam ai bawnhnak, ral a tawnghnak le ram a ukhnak thute tu Israel Kumpibawite Ai Tluanthu Laibusongah ngan sio i.

²⁰ Jeroboam kumpibawi in kum kul hluanhnih song uk i. Cia hnuaah thi ai phum tlang i. Cen a fapa Nadab in kumpibawi tuhin sawng i.

Judah Kumpibawi Rehoboam

²¹ Solomon ai fapa Rehoboam tu kum sawm li le kum khat a khim fangin Judah kumpibawi cang ai, Bawipa amahte biahnak tuhin Bawipa amah in Israel ram hmuahhmuah songin a rilhnak Jerusalem khuapui an kum hlaisarih song uk i. Rehoboam ai nu tu Ammon mi Naamah i.

²² Judah mite in Bawipa vumah sualhnak bawn tlang ai a pupate ai sual bawnhnak hmuahhmuah tahin Bawipa ai thinrawhnak tam sawn suakruai i.

²³ Pathian biahnak hmun tampui tiang i; a biahnak tuhin tlang vum le thingpui hniaah lungzarh bir tlang ai thingzarh khai bir tlang i.

²⁴ Ciami khuavang biahnak hmun ahcen nupang ituseh pasal ituseh hlotlau in um tlang ai ciami tu thildang hmuahhmuah tahin a ningdulkul ber i. Israel mite Canaan ram a lut laiah Bawipa ai hnawthnak Canaan mite in ningdulkul le zakthikul thil bawnhnak khiah Judah mite in bawn tlang ve sio i.

²⁵ Rehoboam in kumpibawi a canghnak kum nga a khim kum ah Egypt kumpibawi Shishak in Jerusalem khua tawng ai neh i.

²⁶ Biakinn song le kumpibawi inn songai a umhnak hlawnthil le a mankhung thilte hmuahhmuah, Solomon ai bawnhnak sui lum tianin lang sio i.

²⁷ Ciami a langhnakte tumrul in kumpibawi Rehoboam in dar lum bawn ai ciamite tu kumpibawi innkiltu bawite ai kut ah dah i.

²⁸ Kumpibawi Biakinn a feh cang fangin inn kiltute in lum awh de ai cia hnuaah innkiltu umhnak khan ah dah leh de i.

²⁹ Kumpibawi Rehoboam ai a dangdang bawnhnak tepawl tu Judah Kumpibawite ai Tluanthu Laibu songah a khim ngai in ngan tlang i.

³⁰ Kum he hmuah song ahhen Rehoboam le Jeroboam tu catloin tawng dun ṭiode i.

³¹ Rehoboam tu thi ai David khuapui kumpibawite phumhnak hlanmual ah phum tlang i. A nu tu Ammon mi Naamah i. Cen a fapa Ahijah in kumpibawi tuhin sawng i.