1 Siangphahrang 13 - Zanniat Bible

Bethel Ai Puleng Hnawm I

¹ Bawipa ai thupehnak bangin Judah in prophet pakhat Bethel ah feh ai hibawlhnak sel tuhin puleng hmaiah Jeroboam a ding laitak ah hleng i.

² Bawipa ai thupehnak hlun in prophet in puleng heh cukcam ai, “Aw puleng, puleng, Bawipa in hetihin ti i: nauniu pakhat a hming ah Josiah tihnak tu David ai songkhatte lakah te tuh i. Na vumah hibawlhnak a seltu khuavang puleng ai na ruaihtu suangbawite tu na vumah rek tuh i. Cen na vumah minung ruh tai tuh i,” tiin ti i.

³ Cia hnuaah prophet in bet lehsal ai, “Hemi puleng tu min tuh sek ai a vumah vutkuang phiah tuh sio i. Ciatihin tunai i ponghnak tu Bawipa ai ponkam i,” ti ling tlang tuh i si.

⁴ Ciami tu kumpibawi Jeroboam in a za fangin, a kutzung in kawk ai, “Khiami pa heh pom tu lio ih!” tiin thupe i. Camkhatniu ah kumpibawi ai kut heh ro lio ai hla leh thil nawn lo i.

⁵ Puleng tu min ai puleng vumah vutkuang heh, Bawipa hming in prophet in a rel cia bangin laipua lakah piak sio i.

⁶ Ciafangin kumpibawi Jeroboam in, “Ning i hio tulai Bawipa na Pathian hnenah i kut cakruai leh tuhin saw i nget tu hram law,” tiin prophet heh ngen i. Prophet in Bawipa hnenah sawnget ai kumpibawi kut heh cak leh i.

⁷ Cen kumpibawi in prophet hnenah, “I inn ah kawi tulai, rong ai tu. Lehsawng na pe i nuam i,” tiin ti i.

⁸ Ciafangin prophet in, “Na naih hmuahhmuah ai a hrek rin i pe silai khai na inn ahcen kawi tuh lo ing. Na hnenah zaikhai ai tuh lo ing.

⁹ Bawipa in zaikhai ai tuh loin le ding tuh loin le i kawihnak lampui in let tuh loin thu i pe i,” tiin ti i.

¹⁰ Ciamanin a kawihnak lampui in tlung loin lampui dang in tlung i.

Bethel Ai Prophet Patarpa

¹¹ Cialai ahcen Bethel ah prophet patarpa pakhat um i. A fapate a hnenah kawi ai Judah ram prophet in Bethel ah kumpibawi Jeroboam hnenah a ponghnak le a naperhnak dangdang khai rel tlang i.

¹² Prophet tar pa in, “A let lamah a konteng lampui hlun i?” tiin zawt i. Anite in a hlunhnak lampui rel tlang i.

¹³ Ani in, “I laak kung i dan sah tu ih,” tiin ruai i. A dan sah ben fangin laak to ai,

¹⁴ Judah ram prophet a hlunhnak lampui in hnawh i. Cen hlokhli kungpui hniaah a to laitak ah man i. “Judah ramai prophet isim?” tiin zawt i. “Ing,” tiin sawn i.

¹⁵ Ani in, “I inn ah rong ai tu,” ti i.

¹⁶ Ikhalselai Judah ram prophet in, “Na inn ahcen na hlun thil tuh lo ing. Na hnenah zaikhai ai le ding tuh lo ing,

¹⁷ zaimantifangin Bawipa in zaikhai ai tuh loin le ding tuh loin thu i pe ai i kawihnak lampui khai hlun tuh loin i ruai i,” tiin ti i.

¹⁸ Cen Bethel ai prophet patarpa in, “Kaimah khai nangmah bangin prophet ve ai, Bawipa ai thupehnak bangin inn in na sawm tuhin vancungmi in i ruai i,” tiin ti i. Ikhalselai prophet patarpa tu thudonrel i.

¹⁹ Ciatihin a sawm manin Judah ram prophet in hlun ai prophet patarpa hnenah rong ai i.

²⁰ Ciatihin rong a ai kawm laitak ah Bawipa ai ponkam tu prophet patarpa hnenah hleng ai,

²¹ a mikhualpa hnenah, “Bawipa in, ‘I thu ngai lo ai bawn tuhin na ruaihnak na bawn lo manin le,

²² let in ai tuh lo isi i tihnak hmunah rong na ai manin, nang tu rekhnak tuar tuhai na ruang tu na pipute vuihnak hlanmual ah na phum tuh lo i,’ ti i,” tiin au dekdo i.

²³ Rong ai ben fangin prophet patarpa in Judah ram prophet pa caah laak kung dan sah ai feh i.

²⁴ Lam lakah chintit pakhat tawk ai ciami chintit in dawp lio i. A luang tu lampui ah tlu ai a laak le chintitte tu lampui ah ding kawm i.

²⁵ Khualtlawngte in a luang heh hmu ai, a hiangah chintit a ding khai hmu tlang i. Anite tu Bethel ah feh tlang ai amahte hmuhnak bangin rel tlang i.

²⁶ Ciami thu tu prophet patarpa in a za fangin, “Pathian thupehnak a hlun nuam lotu heh amah i. A thukhamhnak bangin Bawipa in chintit hlat ai chintit in zoi ai dawp ibang!” ti i.

²⁷ Cen a fapate hnenah, “I laak kung i dan sah tu ih,” tiin ruai i. Anite in dan sah ai,

²⁸ a feh fangin prophet ai luang tu lampui ah a tlu in hmu ai, a hiangah laak le chintit khai a ding in hmu lai i. Chintit in prophet ai luang tu ai lo ai laak khai dawp lo i.

²⁹ Prophet patarpa in ciami luang tu a laak vumah phurh ai kah tuhin le phum tuhin Bethel ah phur i.

³⁰ A songkhat hlanmual ah phum ai amah le a fapate in, “Mi bawngsia unau pa aw,” tiin kah tlang i.

³¹ A phum ben fangin prophet patarpa in a fapate hnenah, “I thi fangin hemi hlanmual ah i phum tu ilai i ruhte tu hemi pa ai ruh hiangah i dah tu ih.

³² Bawipa ai ponkam bangin Bethel ai puleng le Samaria khuate ai biahnak hmunte vumah lungkhim lohnak a relhnak hmuahhmuah heh a ponghnak bangin khim leh tuh sio i,” tiin ti i.

Jeroboam Ai Sualhnak A Poimawh Ber

³³ Kumpibawi Jeroboam tu thilsual bawn ai ciami lampui in let cuang lo ai a hlan bangin puleng a dawlhnak hmunai naruaihtu tuhin mi menma songin suangbawi ril thotho i. Aisu khai suangbawi a cang nuammi heh thau pawh hluahhlo i.

³⁴ Ciatihin a sual manin amah hin in Israel ram uk ngiohnak heh siatsuah i.