1 Siangphahrang 12 - Zanniat Bible

Sak lam Hinte Raltho I

¹ Rehoboam tu amah kumpibawi cangruai tuhin Israel mite taikhawmhnak Shechem ah feh i.

² Ciami thu tu kumpibawi Solomon kih in Egypt ramah a tlantu Nebat ai fapa Jeroboam hnenah hleng i. Cen Jeroboam tu Egypt ram an let i.

³ Israel mite in ani tu sawm tlang ai amahte veksen in kumpibawi Rehoboam hnenah feh tlang ai,

⁴ “Na pa Solomon in kin cawh ai phur kin ritruai i. Hemi kin thilrit zangruai ai nunnuam deuh ai kin bawn tuh ilesikhaw nangmah na ruaihtu cang tuh i ing,” ti tlang i.

⁵ Rehoboam in, “Nithum hnuaah kawi leh tu ilai ning thu heh ning sawn tuh ing,” ti i. Ciatihin tlung tlang i.

⁶ Cen Rehoboam in a pa Solomon ai thuzawt dehnak patarte heh thuzawt ai, “Hemi Israel mizapui tu akontih in sawn tuh ing?” tiin zawt i.

⁷ Anite in, “Hemi mizapuite heh pha bik in uk na nuam lekhaw, tunnia ah nangmah caah phaniu in bawn tulai, amahte nganhnak bangin ti sah tulai, ciatihin rinsantlak in na naruaihtu tuh ṭio in cang tlang tuh i,” tiin ti i.

⁸ Ikhalselai Rehoboam in anite ruathnak tu zaikhai siar sah lo i. Amah thawn a ṭangtu a thuzawt dehnak minote hnen sawn ah feh ai,

⁹ “Ning ruathnak i rel tucuk ih. ‘Na pa in kin vumah a dahhnak thilrit heh zangruai tu hram’ tiin i ngentute heh akontih in sawn tuh ing?” tiin zawt i.

¹⁰ Ciafangin anite in, “I zungnge heh i pa ai el tahin lian sawn i!

¹¹ I pa in thil ning ritruai i; kai inkhai ning ritruai tuh amam ing. I pa in ting fungkek in ning vit i, kai in fung kaikuam thawn ning vit tuh ing,’ ti tu,” tiin ti tlang i.

¹² A tiamhnak bangin nithumhnak ah Jeroboam le Israel mite tu Kumpibawi Rehoboam hnenah kawi tlang ai,

¹³ Rehoboam in hawk dekdo i. Patarte ai ruathnak tu lang lo ai,

¹⁴ a rualpui minote thuruah pehnak sawn lang ai, “I pa in thil ning ritruai i; kai inkhai ritruai tuh amam ing. I pa in ting fungkek in ning vit i; kai in fung kaikuam thawn ning vit tuh ing,” tiin ti i.

¹⁵ Rehoboam in Israel mite ai ngenhnak a elhnak heh Bawipa ai forhhnak manin i. Prophet Ahijah hmangin Jeroboam hnenai thu a kham zohnak khimruai tuhin i.

¹⁶ Kumpibawi in amahte ngenhnak zaisiar lo i ti khiah Israel mite in a ling tlang fangin au tlang ai: “David le a songkhatte hnenin ziang covo nai ising? Kin caah phathnak zaital bawnhnak nai awng awm? Israel mite, ning inn ah tlung tusek ih, Rehoboam tu amah hlanlam in tal tuseh,” ti tlang i. Ciatihin Israel mite tu raltho tlang ai,

¹⁷ Rehoboam tu Judah ram songai a ummi miphun lek uktu kumpibawi ah cang i.

¹⁸ Ciafangin Rehoboam in khengkhebel ai naper ruaihnakte hotu Adoniram heh Israel mite hnenah hlat i, ikhalselai Israel mite in Adoniram heh lungto in a thi tian sep tlang i. Cia sawng fangin Rehoboam tu a siphuhleng to ai rang ngai in Jerusalem ah dawp i.

¹⁹ Ciami ai panin Israel ram tihnak sak lam ramte an David tesinfate ai ram ukhnak heh engsan ṭiode ihang.

²⁰ Israel mizapui in Egypt ram an Jeroboam let zo i, ti khiah ling fangin mizapui taikhawmhnak ah sawm ai ani tu Israel kumpibawi ah bawn tlang i. Judah hin lek David tesinfate naruaihtu ah tang tlang i.

²¹ Rehoboam tu Jerusalem khuapui a hleng fangin rilhnak fekfek ralkapte ting khat le thawng sawmriat, Judah hin le Benjamin hin songin kokhawm ai sak lam ram Israel hin dang ramte lang leh tuhin tum i.

²² Ikhalselai Pathian in prophet Shemaiah heh,

²³ Judah kumpibawi Rehoboam hnenah hlat ai, Rehoboam le Judah miphun le Benjamin miphunte thu relruai i.

²⁴ Feh ai anite hnenah, “Bawipa in, ‘Ning unau Israel mite heh tawng mah ih! Ning veksen in inn ah tlung tusek ih. Zaimantifangin hetihin thil a um heh kaimah in i bawnhnak i,’ ti nakhaw,” tiin rel i. Bawipa ai thupehnak ngai ai amahte inn ah tlung tlang sio i.

Pathian Lampui In Jeroboam Pial I

²⁵ Israel kumpibawi Jeroboam in Epharaim tlang vum ramai a umhnak Shechem khuapui heh ving in kulh ai ciata ah can tlawmniu song um i. Cia hnuaah ciata in suak ai Penuel khuapui heh ving in kulh leh i.

^26-27 A thinlung songin, “Tun bang ṭio lekhaw i minungte Jerusalem Biakinn ah feh in Bawipa hnenah hibawlhnak sel ṭio lekhaw amahte thinlung tu Judah kumpibawi Rehoboam lamah her tuh sio ai kai tu i rek tlang tuh i,” tiin ruat i.

²⁸ Rai thah ngai a ruat hnuaah, sui in kawlpawcang limte pahnih bawn ai a minungte hnenah, “Pathian bia tuhin Jerusalem ah ning fehhnak heh rai zo ihang. Aw Israel mite, Egypt ram an ning suahtu ning pathiante tu heta ah um tlang i,” tiin ti i.

²⁹ Ciami kawlpaw lim pakhat heh Bethel ah dah ai a dang pakhat tu Dan ah dah i.

³⁰ Ciatihin Israel mite tu sui kawlpaw lim bia tuhin Bethel le Dan ah feh ai misual cang tlang i.

³¹ Jeroboam in khuavang biahnak hmun khai tlangbol cangah bawn ai, Levi hin lomi songin suangbawi khai ril i.

³² Ciahlaiah Jeroboam in Judah ramai biahnak puai a um bangin hla riathnak hla ni hlainga nia ah biahnak puai pakhat pan ve i. Bethel ai sui kawlpawcang lim a dahhnak puleng vumah Jeroboam in hibawlhnak sel ai amahte khuavang biahnak hrangah a rilhnak suangbawite khai dah tlang i.

³³ Amah in Israel mite caah panhnak puai, amah ai a sathnak nia, hla riathnak hla, ni hlainga nia ah Bethel ah feh ai, puai bawn ai puleng vumah hibawlhnak sel i.