1 Siangphahrang 11 - Zanniat Bible

Pathian Hnenin Solomon Pialhnak

¹ Solomon in ramdang fenu tampui daih i. Egypt kumpibawi fanu a hoi hlaiah, Hit nupang, Mob nupang, Ammon nupang, Edom nupang, Sidon nupangte khai hoi i.

² Israel mite in khuavang dangdang na ruaih tuh i ti lau in, ramdang mite hoi tuh loin Israel mite khiah Pathian in thupe napui, Solomon in ciami nupangte heh hoi thotho i.

³ Solomon in nupui za sarih nai ai amahte veksen in kumpibawi phun lek i. Ciahlaiah nunawn za thum nai fawn lai i. Ciami a nupuite in Solomon heh Pathian hnenin pialruai ai,

⁴ a tarpui hnuaah ramdang khuavang biahnak ah hoisuak i. A pa David bang loin Solomon tu a thinlung khuavang dangdangte hnenah fu ai Bawipa Pathian hmaiah rinsantlak nawn lo i.

⁵ Sidon mite ai khuazingnu Astartes bia ai, Ammon mite ai ningdulkul khuavang Milkom khai bia i.

⁶ Bawipa vumah sual ai thil hnawm bawn i; A pa David bangin Pathian hmaiah dikcang nawn lo i.

⁷ Jerusalem an nisuah lam tlang vumai Moab mite ai ningdulkul khuavang Khemosh biahnak hrangah khai hmun pakhat tiang ai Ammon mite ai ningdulkul khuavang Molech biahnak hrangah khai hmun pakhat tiang i.

⁸ Ramdangmi a nupuite in rimhmui tai tlang ai khuavang hnenah hibawl a selthilhnak tuhin biahnak hmun tampui bawn fawn i.

^9-10 Israel ai Pathian Bawipa tu Solomon hnenah vel hnih lar ai ramdang khuavangte bia tuh loin thupe napui, Bawipa ai thu tu Solomon in ngai cuang lo ai a lampui in pial ihang. Ciamanin Bawipa tu Solomon vumah a thinraw ai,

¹¹ a hnenah, “I hnenai na thukham heh tum perpo in siatsuah ai, i thupehnak khai hlun lo na imanin hetihin na rel ing: na ram ukhnak tu lang tuhai na kuthnia tlangsuakte pakhatkhat hnenah pe tuh ing.

¹² Ikhalselai na pa David manin ciami heh na nunsong ahcen bawn tuh lo ing. Na fapa ai san ah bawn tuh ing.

¹³ Ciatihin rin a ukhnak a veksen incen lang sah tuh lo ing. I cengfa David le kaimah ai tuhin i bawn zohnak Jerusalem khuapui manin, a hnenah hin hinkhat tu tangruai tuh ing,” tiin ti i.

Solomon Ai Ralte

¹⁴ Bawipa in Edom kumpibawi songkhat Hadad heh Solomon tawng tuhin ruai i.

^15-16 Hlanlaipui ah David in Edom ram a neh fangin a ralkapte hotu Joab tu Edom ramai a thitute luang phum tuhin feh i. Cialak ah Joab le a ralkapte tu Edom ramah hlaruk um tlang i. Ciami songah Edom mi pasal hmuahhmuah,

¹⁷ Hadad le a pa ai hnenumte hrekkhat siar lo, rek tlang sio i. Hadad le a pa ai hnenumte tu Egypt ramah tlan ai, cialai ah Hadad tu naupang niu i.

¹⁸ Midian in suak ai Paran ah feh tlang i. Ciata ah pasalte hrekkhat in bet tlang ai, ciatihin Egypt ramah hleng tlang i. Egypt kumpibawi hnenah feh tlang ai, Egypt kumpibawi in Hadad tu lairam le inn le rongte khai pe i.

¹⁹ Hadad in Egypt kumpibawi ai thinkhing in rualpui pha bik ah cang kawm i. Ciamanin kumpibawi in a nupui Tahpenes ai unau heh a nupui tuhin Hadad pe i.

²⁰ A nupui thawn Gunubath tihnak fapa nai ai kumpibawinu in kumpibawi inn ah cawm ai kumpibawi fapate thawn khang tlang i.

²¹ Egypt ram a umhnak an Hadad in David thi zo ai David ai ralkap uktu Joab khai thi zo i ti thuthang a za fangin Egypt kumpibawi hnenah feh ai, “I khua le i ramah i let siang tuhang,” tiin ngen i.

²² Ciafangin Egypt kumpibawi in, “Zaimanin let na nuam i? Na daihhnak na pe ben lo manin maw a let na nuam i?” tiin zawt i. Hadad in, “Zaizai inkhai i hlat tuhang,” tiin sawn i. Ciamanin Hadad tu a ramah tlung i. Hadad tu Edom kumpibawi ah cang ai mi pha lo imanin Israel mite ai ral kihkulber ah cang i.

²³ Ciahlaiah Eliada ai fapa Rezon khai Bawipa in Solomon tawngcaitu ah bawn i. Rezon tu a bawipa Zobah kumpibawi Hadadezer hnenin tlan ai,

²⁴ mihrokhrawl raltho pawl hotu ah cang i. Hemi tu David in Hadadezer neh ai Hadadezer ṭantu Syria ralkapte a rek berh hnuaah a canghnak i. Rezon le a hohnak mite tu feh tlang ai Damascus khua ah um tlang i. Ciata ah ani tu a minungte in Syria kumpibawi ah bawn tlang i.

²⁵ Solomon nun song hmuahhmuah ah Rezon tu Israel mite ai ral pakhat ah cang i.

Jeroboam Hnenai Pathian Thukham

²⁶ Kumpibawi Solomon a tawngcaitu pakhat tu Epharaim ram Zeredah khua Nebat ai fapa Jeroboam i. A nu tu hmaitong i ai a hming tu Zeruah i.

²⁷ A raldunhnak thu tu hetihin i. Solomon in Jerusalem an nisuah lamah laipua silh in Millo khua sa ai khuapui kulhhnak vingpui khai rem betbo i.

²⁸ Cialai ah Jeroboam tu tlangval hat ngai i ai, a naper feldan khai Solomon in a hmu fangin Manasseh le Epharaim hinte ai umhnak ram songah khengkhebel ai naper ruaihnakte hotu tuhin dah i.

²⁹ Nikhat ah Jeroboam tu Jerusalem an suak ai amah lek a vak laiah hampalak Shiloh khua ah prophet Ahijah in tawk i. Ahijah tu korfualpui thar sil in kawi i.

³⁰ Ciami korfualpui thar hawk ai khan hlaihnih ah a zik hnuaah,

³¹ Jeroboam hnenah, “Nangmah caah khan hra in lang tu. Zaimantifangin Bawipa Israel ai Pathian in na hnenah, ‘Ram ukhnak heh Solomon kut songin lang tuhai na hnenah miphun sawmkhat na pe tuh ing.

³² I cengfa David manin le Israel ram pumpuhluk songin kaimah ai tuhin i rilhnak Jerusalem khuapui manin Solomon in miphun phunkhat co tuh ve i.

³³ Solomon in i hnawl ai Sidon khuazingnu Astartes le Moab khuavang Khemosh le Ammon khuavang Milkom a bia manin a vumah hebang thil i bawn tumhnak i. Solomon in i thu ngai lo i. Thilsual bawn ai i dan le i thupehnakte heh a pa David bangin hlun lo i.

³⁴ Ikhalselai a ram pumpuhluk incen sut tuh lo ing. I rilhnak, i dan le i thupehnak a hluntu i cengfa David manin Solomon tu a nunsong hmuahhmuah ah thunaitu cangruai tuh ing.

³⁵ Solomon ai fapa san ahcen miphun phunkhat coruai tuh ve ai na hnenah miphun phun hra na pe tuh ing.

³⁶ Solomon ai fapa tu miphun phunkhat coruai tuh ve ai, ciatihin i hming i kohnak tuhin i rilciahnak Jerusalem khuapui ah i cengfa David ai tesinfa pakhat tal tu ram uktu ah dah tuh ing.

³⁷ Nangmah Jeroboam tu Israel kumpibawi ah na bawn tuhai na daih zah in ram uk tuh isi.

³⁸ I cengfa David bangin i thu ngai ai i dan pehnak bangin nung ai i lung i khimruai lesikhaw na hnenah um tuh ngio ing. David bangin nang tu Israel kumpibawi ah na bawn tuhai na tesinfate khai na hnuaah kumpibawi ah bawn tuh betbo ing.

³⁹ Solomon ai sualhnak manin David ai tesinfate vumah cawhhnak hlengruai tuh ing, ikhalselai a catloin cen i tuh lo i,’ ti i,” tiin rel i.

⁴⁰ Cen Solomon in Jeroboam heh rek tum napui Egypt kumpibawi Shishak hnenah tlan ai ciata ah Solomon a thi hlanlo um i.

Solomon Thihnak

⁴¹ Solomon naperhnak le a thula dangte le a fimhnak thute tu Solomon Tluanthu Laibu songah ngan i.

⁴² Jerusalem an Israel ram pumpuhluk kum sawmli song uk i.

⁴³ Thi ai David Khuapui Jerusalem ah phum i. Cen a fapa Rehoboam in kumpibawi tuhin sawng i.