1 Siangphahrang 1 - Zanniat Bible

David Hlombawr Zo I

¹ Kumpibawi David tu a hlombawr zo ai pon thuam hnelhno napui khualum thil lo i.

² Ciamanin a kuthnia tlangsuakte in, “Kumpibawi, na hnenah um tuhin le na tuamhlawmtu tuhin fenu pakhat na si sah tuh i ing. Na hnenah it tuhai khua na lum tuh i,” tiin ti tlang i.

³ Israel ram song hmuahhmuah ah fenu mawi si ai Shunem khua ah Abishag tihnak fenu hmu ai kumpibawi hnenah koih tlang i.

⁴ Abishag tu fenu mawi ngai i ai kumpibawi heh phatak ngai in sik ai tuamhlawm i. Ikhalselai kumpibawi in nupui bangin itpui lo i.

Adonijah In Kumpibawi Cuh I

^5-6 Absalom thi hnuaah David le Haggith ai fapa Adonijah tu a nungmi lakah fapa upa ber i. Mi piang ngai i ai kumpibawi cang tum ṭio i ai “Kumpibawi cang tuh ing,” ti ṭiode i. Ikhalselai zaibang thu ahkhai David in hau de lo i. Adonijah in a mah caah siphuh le siphuhlengte dah ai amah kiltu tuhin minungte sawmnga dah i.

⁷ Adonijah in Zeruiah ai fapa Joab le suangbawi Abiathar khai tawk ai anite inkhai a tumhnak heh lungkhimpui kawm i. (Zeruiah tu Joab ai nu i).

⁸ Ikhalselai suangbawi Zadok, Jehoiada ai fapa Benaiah, prophet Nathan, Shimei, Rai le David kiltu ralkapte tu Adonijah lamah ṭang tlang lo i.

⁹ Vaikhat ah Adonijah in Enrogel tikhur hiangai umhnak Roheleth lungpui tihnak hmunah hibawlhnak sel ai tuu le kawlpaw le a thau ngai kawlpaw niu tampui ro ai, rong ai tuhin a dang a unaute le kumpibawi David kuthnia ai bawite sawm sio i.

¹⁰ Ikhalselai a nau Solomon le prophet Nathan le Benaiah tu sawm lo i. Kumpibawi kiltute tu aisu khai sawm lo i.

Solomon Kumpibawi Cang I

¹¹ Cen Nathan tu Solomon ai nu Bethsheba hnenah feh ai, “Haggith ai fapa Adonijah kumpibawi cang zo i, ti khiah ling zo ilo sim? Ciami thu kumpibawi David in zaikhai ling lo i.

¹² Nangmah ai nunhnak le na fapa Solomon ai nunhnak hup na nuam lekhaw na bawn tuhhnak thu na rel tuh ing.

¹³ Kumpibawi David hnenah a rang ngai in feh tulai a hnenah, ‘Aw kumpibawi, i fapa Solomon tu nangmah ai roltu tuhin thu i kham zo ita si? Zaimanin tuh ahcen Adonijah sawn kumpibawi cang lehlam i?” tiin ti ta tu.

¹⁴ Ciatihin kumpibawi na pon laitak ah kaimah khai lut tuh ve ai na thurelhnak a dik i tihnak rel tuh ve ing,” tiin ti i.

¹⁵ Ciamanin Bathsheba tu kumpibawi ithmun khan ah David tawk tuhin feh i. David tu a hlombawr ze hang manin Shunem mi fenu nu Abishag in tuamhlawm hnelhno i.

¹⁶ Bathsheba tu Kumpibawi David hmaiah kun ai David in, “Ziang na daih i?” tiin zawt i.

¹⁷ Ciafangin Bathsheba in, “Kumpibawi, i fapa Solomon heh nangmah roltu kumpibawi tuhin Bawipa na Pathian hming sal in thukham zo isi.

¹⁸ Ikhalselai tun incen Adonijah kumpibawi cang zo ai nang in ciami thu heh zaikhai ling lo isi.

¹⁹ Kawlpaw tampui le tuu le a thau ngai kawlpaw niu tampui ro in hibawlhnak sel ai rong aihnak ah na fapate, suangbawi Abiathar le ralkap hotu bawi Joab khai sawm i. Ikhalselai na fapa Solomon tu sawm lo i.

²⁰ Aw kumpibawi, nangmah hnuaah aisu in kumpibawi tuh i ti ling nuam in, zaifangin kumpibawi in thu kin than tuh i tiin Israel mite in nangmah lek na sik tlang i.

²¹ Thu rel ta hlahle sikhaw, na thi hnuaah kaimah le i fapa Solomon heh mizuartu bangin kin bawn tuh isi,” ti i.

²² Ciatih ai a pong hnelhno laitak ah,

²³ prophet Nathan hleng i, tiin kumpibawi pa heh rel i. Cen Nathan tu lut ai kumpibawi hmaiah a lu ut kongin,

²⁴ Kumpibawi heh, “Aw Kumpibawi, Adonijah tu nangmah roltu tuhin thuthan zo ihang sim?

²⁵ Tunnia ah hibawlhnak hmunah feh ai kawlpaw tampui le tuu le a thau ngai kawlpaw niu tampui ro ai hibawlhnak sel i; na fapate, na ralkap hotu Joab le suangbawi Abiathar khai sawm i. Tun in rong aih puai bawn tlang ai, ‘Kumpibawi Adonijah a nunkhua sau tuseh,’ tiin au tlang dekdo i.

²⁶ Ikhalselai kaimah le suangbawi Zadok le Benaiah le Solomon tu kin sawm lo i.

²⁷ Na kuthnia tlangsuakte rin na roltu aisu tuh i, ti rel lai lo isi ai hebang thil bawn heh kumpibawi nangmah ai lungkhimhnak i awm? tiin ti i.

²⁸ Ciafangin kumpibawi David in, “Bathsheba i koh leh tu ih,” ti i. Bathsheba tu lut leh ai David hmaiah ding i.

²⁹ Cen kumpibawi David in Bathsheba hnenah, “Harsahnak a phunphun songin i humtu Bawipa hming sal in thu na kham ing:

³⁰ Na fapa Solomon heh i roltu kumpibawi tuh i, tiin Israel ai Pathian Bawipa hming sal in i thukhamhnak heh tunnia ah khimruai tuh ing,” tiin ti i.

³¹ Ciafangin, Bathsheba tu ut ai, “Kumpibawi, i bawipa tu a nun khua sau tu hram seh,” tiin ti i.

³² Kumpibawi David in Zadok, Nathan le Beniah ko tuhin thupe i. Anite hleng fangin,

³³ anite hnenah, “I kuthnia ai tlangsuakte thawn feh tu ilai i fapa Solomon heh i siphuh vumah toruai in Gihon rawnti niu ah hlun tu ih.

³⁴ Ciata ah suangbawi Zadok le prophet Nathan in Solomon heh Israel kumpibawi tuhin thau pawh kawm tu ih, cen thirhlung tum tu ilai, “Kumpibawi Solomon a nunkhua sau tuseh,” tiin au tu ih.

³⁵ Cen heta ah tlun leh tu ilai i kumpibawi tohkham ah to tuh i. Solomon tu Israel le Judah uktu tuhin i rel zohnak imanin kaimah roltu tuh ihang,” tiin ti i.

³⁶ Ciafangin Jehoiada ai fapa Benaiah in, “Na relhnak bangin bawn tuh i ing, Bawipa Pathian in khoruai tu hram seh.

³⁷ Bawipa Pathian tu kumpibawi nangmah hnenah a um bangin Solomon hnen ahkhai um tu ve hram seh, a ukhnak tu nangmah ai ukhnak tahin rin khangso tu hram seh,” tiin ti i.

³⁸ Cen Zadok, Nathan, Benaiah le kumpibawi kiltu ralkapte in Solomon heh Kumpibawi David ai siphuh vumah toruai ai Gihon Rawnti niu ah fehpui i.

³⁹ Ponhlam cianghlim songin a koihhnak olive siti bung heh Zadok in lang ai Solomon thau pawh i. Ciafangin thirhlung tum ai amahte veksen in, “Kumpibawi Solomon a nun khua sau tu hram seh,” tiin au tlang i.

⁴⁰ Kumpibawi Solomon heh ciamite veksen in kumpibawi inn ah tlun tlang leh ai, titilu tum kongin, lungawi aipuang in au tlang dekdo ai ciami thawmvang manin laipua tianin hlin sio i.

⁴¹ Adonijah le a sawm mite in rong ai ben fangin ciami thawmvang za tlang i. Joab in thirhlung tum aw a za fangin, Khuasong ai thawmvang tu ziang ipa? ti i.

⁴² A pong rin a ben hlanah suangbawi Abiathar ai fapa Jonathan hleng i. Cen Adonijah in Jonathan hnenah, “Tlum tu. Nang tu rinsantlak isi ai thu pha kin phurh tuh isi,” ti i.

⁴³ Jonathan in, “Thu pha ilo i. Kumpibawi David in Solomon heh kumpibawi ah bawn zo i.

⁴⁴ David in Zadok, Nathan, Benaiah le kumpibawi kiltu ralkapte hlat ai Solomon hlun tlang i. Kumpibawi ai siphuh toruai ai,

⁴⁵ Gihon Rawnti niu ah Zadok le Nathan in thau pawh kawm i. Cen let tlang ai mi zongzong lungawi in au tlang ai khuapui song heh buai tlang murhmo i. Ning zahnak heh ciami thawmvang i.

⁴⁶ Solomon tu kumpibawi cang zo ihang.

⁴⁷ Ciahlaiah kumpibawi kuthnia ai tlangsuakte kumpibawi David hnenah feh ai upathnak a pe tlang hnuaah, ‘Na Pathian in Solomon khiah nangmah tahin hmingthang deuh ah bawn tu hram seh. A ukhnak tu nangmah ai ukhnak tahin khangso tu hram seh,” ti tlang i. Cen Kumpibawi David tu Pathian upat in a khuahluan vumah a lu ut ai,

⁴⁸ ‘I song suak fate pakhat heh kaimah roltu kumpibawi ah a bawn manin le ciami hmu tuhin i nunhnak i zuah manin Israel ai Pathian, Bawipa heh thangphat in um tuseh,’ tiin sawngen i,” tiin ti i.

⁴⁹ Ciafangin Adonijah ai rualpuite tu thinlau in suak tlang ai amahte nuam hmuncang ah tlung tlang i.

⁵⁰ Adonijah khai Solomon a kih manin Ponhlam cianghlim songah feh ai puleng kite awh meng i.

⁵¹ Adonijah in Solomon a kih manin puleng ki awh meng i ti khiah Kumpibawi Solomon rel tlang i. Adonijah in, “A hmasaber ah kaimah i rek tuh loin Kumpibawi Solomon in i hnenah thu i kham tuseh,” tiin ti ai ciami heh Kumpibawi Solomon hnenah rel tlang i.

⁵² Ciafangin Solomon in, “I hniaah lut lekhaw a lu vumai samfang pakhat khai dai tuh lo ing. Ikhalselai i hniaah lut hlah lekhaw thi tuh i,” tiin ti i.

⁵³ Cen Kumpibawi Solomon in Adonijah heh ko ai puleng in suah i. Adonijah tu kawi ai kumpibawi hmaiah kun i. Solomon in, “Inn ah tlung tu,” ti i.