1 Sansiarnak 5 - Zanniat Bible

Reuben Ai Tesinfate

¹ Jacob fapa upa ber Reuben ai tesinfate tu a hnia lamai bangin i. (Reuben in a pa ai nunawn pakhat sualpui manin fapa upa ber covo cothilhnak nai nawn loin ciami covo heh Joseph hnenah pe i.

² Judah hin tu a hat ber hin i ai amahte phun veksen uktu khai amahte hin songin i ṭiode i; ikhalselai upa ber covo tu Joseph ai i).

³ Jacob ai fapa upa ber Reuben in fapate pali nai ai Hanock, Pallu, Hezron le Karmi i.

^4-6 Joel ai tesinfate tu sankhat hnua sankhat ah a hnia lamai bangin i. Shemaiah, Gog, Shimei, Micah, Reaiah, Baal ke Beerah i. Assyria Kumpimangbawi Tigath Pileser in a hin songai hotuber Beerah heh pom ai fehpui teu i.

⁷ Amahte songkhat thu ai lainganhnak songah Reuben hin hotute tu a hnia lam aite i: Jaiel, Zechariah,

⁸ le Bela i ai Bela tu Azaz ai fapa, Shema ai fasuan i ai Shema tu Joel hin i. Amahte hinte tu Aroer khua ah le ciata in sak lamah Nebo le Baal Meon ram karlak ah um tlang i.

⁹ Gilead ramah sumhnam tampui nai tlang manin Euphrates Runpui hleng in a kauhnak nelrawn tian nisuah lam ram khur tlang i.

¹⁰ Kumpibawi Saul ai san ah Reuben hin in Hagrit mite tawng ai tampui a rek hnuaah amahte ram, Gilead in nisuah lam ram heh khur tlang i.

Gad Ai Tesinfate

¹¹ Gad hinte tu Reuben hinte umhnak sak lam Bashan ramah um ai nisuah lamah Salekah tian um tlang i.

¹² Amahte phun songai a hat ber hin hotu heh Joel i; a pahnihhnak hin hotu heh Shapham i. Janai le Shaphat tu a dang hinte hotute i.

¹³ Gad phun songai hin dangdangte tu: Michael hin, Meshullam hin, Sheba hin, Jorai hin, Jakan hin, Zia hin le Aber hinte i.

¹⁴ Anite heh Huri ai fapa Abihail tesinfate i ai a pupate Abihail, Huri, Jaroah, Gilead, Michael, Jeshishai, Jahdo le Buz i.

¹⁵ Hemi hinte lakah a luber tu Abdiel ai fapa le Guni ai fasuan Ahi i.

¹⁶ Bashan le Gilead ram songai khuapuite ah um tlang ai Sharon ram sumhnam lenghnak ah um sio i.

¹⁷ (Hemi a thulate tu Judah kumpibawi Jotham le Israel kumpibawi Jeroboam san ai ngankhumhnak i).

Nisuah Lam Hin Ai Ralkapte

¹⁸ Reuben, Gad le nisuah lam Manasseh hinte songin lum, ralvang, le conkiang hmangthiam ralkapte thawng sawmli le za sarih le sawmruk um i.

¹⁹ Hemite tu Hagrit mi, Jetur, Naphish le Nodab hinte in tawng i.

²⁰ Pathian rinsan ai amahte hnenin bawmhnak ngen manin Pathian in amahte ngenhnak heh ngai sah ai Hagrit mi le a ṭantute vumah nehhnak pe i.

²¹ A ralte ai sumhnam: kalaukte thawng sawmnga, tuute thawng zahnih le thawng sawmnga, le laakte thawng hnih sut i. Ralte ting khat pom i.

²² Pathian in amahte hnenah ṭang manin ralte tampui rek i. Ciata ah amahte saltang can tian um ngio i.

Nisuah Lam Manasseh Mite

²³ Nisuah lam Manasseh mite tu Bashan ram le sak lamah Baal Hermon, Senir le Hermon Mual tianin um tlang ai a minungte tu pungzai amam i.

²⁴ Amahte hin ai hotute tu Epher, Ishi, Eliel, Azriel, Jeremiah, Hodaviah le Jahdiel i. Hemi hotute tu ralkap ralpha bikbik le hmingthang ngaingai pawl i.

Nisuah Lam Phunte Hnawt Tlang I

²⁵ Hemite tu Pathian rinsantlak in um tlang lo ai amahte pupate Pathian heh zam ai a hnawtsekhnak miphunte ai khuavangte bia tlang i.

²⁶ Ciamanin Pathian in Assyria Kumpimangbawi Pul heh (Tiglath Pileser ti inkhai kohnak), a ram tawngruai i. Kumpibawi Pul in Reuben, Gad le nisuah lam Manasseh hinte heh fehpui ai Halah, Habor, Hara le Gozan run kamah umruai i.