1 Sansiarnak 26 - Zanniat Bible

Biakinn Kiltute

¹ Biakinn kiltute ai naper a hnia lamai bangin khan tlang i. Korah hin Asaph tesinfa songai Kore ai fapa Meshelemiah in,

² fapate pasarih nai ai a sangsang in a hnia lamai bangin i: Zechariah, Jediael, Zebadiah, Jathniel,

³ Elam, Jehohanan, Eliehoenai.

⁴ Obed Edom incen Pathian hmuifu dong ai fapate pariat nai i: a sangsang in Shemaiah, Jehozabad, Joah, Sakhar, Nethanel,

⁵ Ammiel, Issakhar, Peullethai i.

⁶ Obed Edom ai fapa upa ber Shemaiah in fapa paruk nai ai thiltiben pawl imanin amahte hin ah hmingthang i.

⁷ A hmingte tu Othni, Rephael, Obed, Elzabad, Elihu le Semakhiah i. Nautaberte pahnih tu a hlaice in thiltithai pawl i.

⁸ Hemi naperhnak ah Obed Edom songkhat in thiltithai ngaingai minung sawmruk le pahnih um i.

⁹ Meshelemiah songkhat in thiltithai ngaingai hlairiat um i.

¹⁰ Merari songkhat ah Hosah um ai fapate pali nai i: Shimri (amah tu upa ber ilo napui a pa in hotu ah dah i),

¹¹ Hilkiah, Tebaliah le Zechariah i. Hosah songkhat amahte veksen in Biakinn kiltu hlaithum um i.

¹² Levi mite bangin Biakinn kiltute tu amahte songkhat ṭen in khan tlang ai Biakinn naṭuan heh pe i.

¹³ Amahte kil tuhhnak kotka hrangah songkhat ṭen in minung a tam a tlawm ti loin, camciafung duk tlang ṭen i.

¹⁴ Shelemiah in nisuah lam kotka kil tuhin duk ngah ai a fapa midang hnenah ruathnak pha a pe ben thaitu ṭio Zechariah in sak lam kotka kil tuhin duk ngah i.

¹⁵ Obed Edom in hlang lam kotka kil tuhin duk ngah ai a fapate tu thilri dahhnak innkiltu tuh i.

¹⁶ Shuppim le Hosah in nitlak lam kotka kil tuhin duk ngah ai sak lam fehhnak Shalleketh kotka khai kiltu tuh i. A kil fangin a sonson in sawng dun de i.

¹⁷ Nisuah lam kotka tu nisiar in paruk in kil i; sak lam tu pali in kil ai hlang lam khai pali in kil i. Thilri dahhnak innte pahnih tu minung pali in, inn khat ah pahnih veve in kil tlang i.

¹⁸ Nitlak lamai ai khuam lianpui umhnak lampui ah pali um ai a khuam kiltu ah pahnih um i.

¹⁹ Ciami tu Korah le Merari songkhatte ai Biakinn kilhnak bawndan i.

A Dang Biakinn Naṭuante

²⁰ A dang Levi mite tu Biakinn tangka le Pathian hnenah pehnak thilri dahhnak inn kiltute i.

²¹ Gershom hin songah Ladan tu songkhat tampui ai pu i ai Jehiel songkhat ai pu khai i.

²² Hemi songkhatte songin Zetham le a unau Joel tu Biakinn tangka le thilri dahhnak inn kiltute i.

²³ Amram, Izhar, Hebron le Uzziel tesinfate khai ṭuanvo naitute i.

²⁴ Moses ai fapa Gershom hin songin Shebuel tu Biakinn tangka kiltute hotu upa ber i.

²⁵ Gershom unau tu Eliezer i ai ciamanin Shebuel le Shelomith tu songkhat ah cang kawm i. Eliezer tu Rehabiah ai pa i ai; Rehabiah tu Jesiah ai pa i; Jeshiah tu Joram ai pa i; Joram tu Zichri ai pa i; Zichri tu Shelomith ai pa i.

²⁶ Shelomith le a songkhatte tu Pathian hnenah kumpibawi David, songkhat ṭenai luber pawl, hin khat songai hotute le ralbawite ai pehnak lehsawngte kiltute i.

²⁷ Raltawnghnak ai a langhnak thilri hrekkhatte tu lang ai Biakinn song hmang tuhhnak thilri ah dah i.

²⁸ Shelomith le a songkhatte tu Biakinn song hmang tuhhnak thilri amahte pehnak hmuahhmuah, prophet Samuel, kumpibawi Saul, Ner ai fapa Abner le Zeruiah ai fapa Joab ai pehnak tianin a kiltute i.

A Dang Levi Mite Ai Ṭuanvo

²⁹ Izhar ai tesinfate songin Chenaniah le a fapate tu zung naṭuantu, laibu awhtu le mizapui ai thukhantute i.

³⁰ Hebron tesinfate songin Hashabiah le a songkhatte hmingthang ngaingai, minung thawng khat le za sarih tu Jordan Runpui in nitlak lamah biahnak lam thu ituseh, nisiar mizapui nun khuasakhnak thula ituseh, tawlreltu le ruatsahtute i.

³¹ Hebron tesinfate lakah Jeriah tu amahte hotuber i. David ai kumpibawi a cang kum sawmli kum ah Hebron tesinfate thula a zong fangin ralkap hmingthang ngaingai pawl Gilead ram Jazer khua ah a um tlang khiah ling i.

³² Ciamanin David in Jeriah ai songkhatte, amahte hin songai hmingthang le luber pawl minung thawng hnih le za sarih ril ai Reuben ram, Gad ram le nisuah lam Manasseh ram songai a biahnak lam thu le nisiar amahte nuntukhuasak thula tawlreltu le tuatsahtu tuhin dah i.