1 Sansiarnak 22 - Zanniat Bible

¹ Cen David in, “Heta ahhen Bawipa ai Biakinn um tuh i. Heta ah Israel mite in maitai hibawlhnak sel tlang tuh i,” ti i.

Biakinn Sa Tuhin Pai Tlang I

² Kumpibawi David in Israel ram songai a umtu ramdang mite hmuahhmuah kokhawm ai naperruai i. Cen solh thiam tepawl in Biakinn sahnak hrangah lungto solh tlang i.

³ Tlawngkhen le dawngkham pomhnak patṭa tampui pe ai dar tu aisu inkhai cuai teh cawk lo tianin pe bial i.

⁴ Tyre le Sidon mite in cedar thing pe tlang i.

⁵ Cen David in, “I fapa Solomon in a sa tuhhnak Bawipa Biakinn tu a pha peupeu le laivum ah hmingthang ngai kul i. Solomon a naupang ze lai ai zaikhai ti thiam lai lo manin kaimah in zaizongza pai sah cialep kul sio i,” ti i. Ciamanin David in a nun songah thilri tampui khawl sah i.

⁶ David in a fapa Solomon heh ko ai Israel Pathian, Bawipa biakinn sa tuhin thupe i.

⁷ A hnenah, “I fapa, Bawipa i Pathian hmingthanghnak tuhin biakinn pakhat sa i nuam i.

⁸ Ikhalselai Bawipa in, “Ral tam ze tawng ai mi tam ze rek zo isi,’ iti i. Thisan tam ze luangruai zo manin amah caah Biakinn sa tuh i siang lo i.

⁹ Ikhalselai thu i kham ai, ‘Fapa nai tuhai a ralte kut in hup tuh manin daphnak thawn ram uk tuh i. A hming tu Solomon i tuh i; zaimantifangin amah ai uk songah Israel ramah daphnak le huphimhnak lengruai tuh ing.

¹⁰ Amah in kaimah caah Biakinn sa tuh i. Ani tu i fapa i tuhai kaimah heh a pa i tuh ing. Amah ai ukhnak tu Israel vumah kumzangza in khoruai tuh ing,” ti i.

¹¹ Ciamanin i fapa, Bawipa na Pathian heh na hnenah um tu hram seh; amah ai thukhamhnak bangin na Bawipa caah Biakinn heh semkhim liang in sa tu rori law.

¹² Israel ram tu amah ai dan bangin na ukthilhnak tuhin Bawipa na Pathian in fimhnak le lingthiamhnak na pe tu hram seh.

¹³ Bawipa in Israel caah Moses hnenah a pehnak Dante hlun lesikhaw na lampui tluang tuhai hlawh na tling tuh i. Hat ngai le ralpha ngai in um tulai, zaikhai kihhnak le lauhnak khai nai mah.

¹⁴ Biakinn sahnak tuhin sui phurh ting khat le ngun phurh ting hra biakinn sahnak hrang tuhin harsa ngai in khawl zo ing. Ciahlaiah dar le thir tu phurh siar cawk loin um bial i. Thing le lungtote khai khawl cia zo ai nangmah inkhai belh leh tu.

¹⁵ Napertu tampui nai isi. Lungto cotu, lungto solhtu, zungthiam le kutzungthiam dang a phunphun,

¹⁶ sui le ngun parthiamtu le dar le thir parthiamtu tampui um tlang i. Tun in naper pan tuhang lai Bawipa in na umpui tu hram seh,” tiin ti i.

¹⁷ Cen David in Israel mite konghoitute hnenah Solomon bawm tuhin thupe i.

¹⁸ “Bawipa ning Pathian in ning ram pumpuhluk ah daphnak ning pe i. Hemi ramai a um awngtu miphunte tu i nehruai sio ai tun incen ning kuthnia le Bawipa ai kuthnia ah um sio i.

¹⁹ Tunai panin ning thinlung veksen le ning thazang veksen thawn Bawipa ruaih tu ih. Bawipa ai Thutiam Kuang le amah biahnak ai hmanghnak thilri cianghlim pawl dahhnak le a hmingthanghnak tuhin Bawipa ai Biakinn khiah sa tu ih,” tiin ti i.