1 Sansiarnak 21 - Zanniat Bible

David In Mipum Siar I

¹ Satan in Israel vumah harsahnak hlengruai a nuam manin David heh thusia forh ai Israel mipum siar nuamhnak thinlung nairuai i.

² Ciamanin David in Joab le a ralbawi dangdang hnenah, “Israel ram khat lam hmur Beersheba in khat lam hmur Dan tian feh tu ilai mipum siar tu ih. Minung zaizah um i ti ling i nuam i,” tiin thupe i.

³ Ciafangin Joab in, “Bawipa in Israel mite heh tunai tahin a let zakhat in karhzairuai tu hram seh! Zaizah ita inkhai bawipa nangmah heh amahte kumpibawi isi ai amahte veksen in na salte i. Zaimanin amahte mipum siar na hiam i? Amahte mipum siarsuak ngaingai lekhaw Israel miphun heh mawhphurtu cangruai tuh isi!” ti i.

⁴ Ikhalselai David in a thu heh ṭul nuam cuang lo i. Ciamanin Joab tu Israel ram pumpui hmuahhmuah ah feh ai cia hnuaah Jerusalem ah let i.

⁵ Kumpibawi David hnenah dawp ai, “Ralkap lut thai tuh ciang ting hlaikhat um ai, Judah ah ting li le thawng sawmsarih um i,” ti i.

⁶ Joab in David ai thupehnak a lungkhim lo manin Levi mite le Benjamin mite tu mipum siar lo i.

⁷ Ciami thil a bawnhnak vumah Bawipa tu a lungawi lo ai Israel mite heh cawh i.

⁸ Ciafangin David in, “Aw Bawipa, thil sual ngai bawn ai i sual zo i. I ngaithiam tu hram law. Mivoi bawndan bawn ing,” ti i.

⁹ Cen Bawipa in David ai prophet Gad hnenah,

¹⁰ “Feh tulai David rel tu: thil ril tuh pathum pe ing. Pakhatkhat ril tu selai ciami heh bawn tuh rori ing,” ti i.

¹¹ Gad tu David hnenah kawi ai Bawipa ai ponghnak heh rel i, “Ziangber ril tuh isi?

¹² Kum thum song rian tlung maw? Ihlahle na ralte in hla thum song hnawh le tlan thliahthlo maw? Ihlahle ni thum song Bawipa ai ralvang heh a vancungmi in hmang ai Israel ram songah ursia le pul in thihhnak hlengruai maw? Pakhatkhat ril tulai ciami khiah Bawipa rel tuh ing,” ti i.

¹³ Ciafangin David in Gad hnenah, “Aican awloksong in um ing! Ikhalselai minung kut songah tlokhnak tahin Bawipa kut songai tlok heh i daih sawn i; zaimantifangin Bawipa tu ninghiohnak naitu i,” ti i.

¹⁴ Ciamanin Bawipa in Israel mite vumah pul tlungruai ai thawng sawmsarih thi tlang i.

¹⁵ Pathian in Jerusalem siatsuah tuh sek in vancungmi hlat i; ikhalselai a thinlung thleng ai vancungmi hnenah, “Com tu, ca tuhang seh,” ti i. Cen vancungmi tu Jebus mi Araunah ai fangcilhnak pum hiangah ding i.

¹⁶ David in a sik fangin van le lai karlak ah Jerusalem siatsuah tuhin vangsaupui lim in vancungmi a ding khiah hmu i. Ciafangin David le Israel mite hotute tu buri pon sil in a hmai laipua tong in ut tlang i.

¹⁷ David in, “Aw Pathian a sualtu heh kaimah ing. Mipum siar tuhin thu a petu heh kaimah ing. Hemite in ziang sualhnak bawn tlang i? Aw Bawipa, i Pathian, kaimah le i innsang heh kin cawh tulai he na minung, na tuurual heh luatruai tu hram law,” tiin sawngen i.

¹⁸ Cen Bawipa ai vancungmi in Gad hnenah, “David heh feh tu selai Bawipa ca Jebus mi Araunah fangcilhnak hmunah puleng tiang tuseh,” tiin thupe i.

¹⁹ Bawipa ai thupehnak heh Gad relhnak bangin David in hlun i.

²⁰ Araunah le a fapate pali tu sangvut cil tlang thliahthlo i. Vancungmi a hmu fangin a fapate tu dawp ai relh tlang i.

²¹ Araunah in a hnen lamah David kawi a hmu fangin rang ngai in dawp ai a hmai lai tongin David hmaiah ut i.

²² David in, “Na sangvut cilhnak hmun heh i zuarh tu; Bawipa ca puleng tiang i nuam i. Cia lo fangin pultlung lawm tuh lo i. A man tu na ngen zah na pe tuh ing,” ti i.

²³ Araunah in, “Bawipa, lang tu; na daihhnak bangin hmang tu. Puleng vumah maitai hibawlhnak tuhin heta ah kawlpawcang um i; thing hrangah pum ai donhnak suat um bial ai rong hibawlhnak tuhin sangvut um i. Na pe tuh sio ing,” ti i.

²⁴ Ikhalselai kumpibawi in, “I lo i; a man a khimniu in na pe tuh ing. Nangmah ai heh a lovang in lang tuh lo ing, kaimah ai a man i pe lohnak tu Bawipa hnenah pe i nuam lo i,” ti i.

²⁵ Cen Araunah khiah sui tangka fai zaruk pe i.

²⁶ Ciata ah Bawipa ca puleng tiang ai maitai hibawlhnak le rualrem hibawlhnak sel i. Sawngen ai Bawipa in a ngai sah manin van in mai hlak ai a hibawlhnak khiah kang sio i.

²⁷ Bawipa in vancungmi tu a vangsau dah leh tuhin thupe ai dah i.

²⁸ Ciami heh David in a hmu fangin Bawipa in i sawngenhnak i ngai sah i, ti ling ai Araunah fangcilhnak hmunai a tianghnak puleng vumah hibawlhnak bawn i.

²⁹ Bawipa umhnak ponhlam, Moses in ramkhing ai a sahnak le hibawlhnakte a taihnak puleng cia can ah Pathian a biahnak hmun Gibeon ah a um teng i.

³⁰ Ikhalselai David tu Bawipa bia tuhin ciata ah heh feh ngam lo i; zaimantifangin Bawipa vancungmi ai vangsaupui khiah lau tata ihang.