1 Sansiarnak 20 - Zanniat Bible

David In Rabbah Lang I

¹ Khuakhal cu hang ai kumpibawite raltawng cu fangin, Joab le a ralkapte tu feh ai Ammon ram tawng i. Amahte khuapui Rabbah kulh sio i. Cialai ah David tu Jerusalem ah um i. Joab in Rabbah khua heh tawng ai siatsuah sek i.

² Cen Ammon mite in Molech tihnak khuavang lim nai ai a sui lukhuk tu cuai kul rit i. A songah lung mankhung um ai ciami heh David in lang ai a kumpibawi lukhuk ah mun i. Khuapui songai sumsaw tampui khai lang i.

³ Khuasong mite heh fehpui tlang ai hluah le taruang le haihpui thawn naper ruai i. Ammon khua dangdang mite khai cia bangpah in bawn i. Cia hnuaah a ralkapte thawn Jerusalem ah tlung tlang i.

Filistin Mihampuite Tawng Tlang i

⁴ Cia hnuaah Filistin mite thawn Gezer ah tawng dun i. Israel mite in neh i. Ciami can ah Hushah mi Sibbecai in tlami tia Sippai tihnak rek i.

⁵ Cen Filistin mite thawn tawng dun lala ai Jair ai fapa Elhanan in Gath mi Goliath ai unau Lahmi rek i; a faimung tu thiamkawng tia i.

⁶ Gath ah tawng dun lala ai ciami khua ahcen a kut khat lamah kutzung paruk veve, a ke khat lamah kezung paruk veve a naimi um i. Ani tu khuahlan miham bikbik pawl ai tesinfa i.

⁷ Israel mite heh tawngcai ai David ai unau Shammah ai fapa Jonathan in ciami pa heh rek i.

⁸ Hemi minungte pathum, David le a ralkapte in a rek awnghnak heh Gath khua ai miham bikbik pawl ai tefate i.