1 Sansiarnak 19 - Zanniat Bible

David In Ammon Mi le Syria Mite Neh I

¹ Can tawkfang a rai hnuaah Ammon kumpibawi Nahash thi ai a fapa Hanun kumpibawi cang i.

² David in, “A pa Nahash heh i vumah a pha bangin Hanun vumah rualpui pha ihnak hmuh tuh ve ing,” ti i. Ciamanin Hanun topui tuhin David in a aiawh in palaite hlat i. Ammon ram hleng tlang ai kumpibawi Hanun hnen a kawi fangin,

³ Ammon ram hotu upate in amahte kumpibawi hnenah, “Na pa upathnak ah David in na topui tuhin he palaite, tiin ruat aw sim? Ciatihin ruat lesi na sual tuh tengteng i! Kin ram neh nuam in hemite heh micultu ah a hlat sawn i,” ti tlang i.

⁴ Ciafangin Hanun in David hlathnak a palaite heh pom ai amahte ka hmul met sah sio ai korfualpui khai el camcam in cem sah hnuaah hlat leh i.

⁵ Ciamanin zakthi in inn ah tlung ngam tlang lo i. Ciami thu heh David in a za fangin a ka hmul a sau hlanlo Jericho ah um tuhin thucah i.

⁶ Kumpibawi Hanun le Ammon mite in David amahte ral ai a cangruai khiah a ling tlang leh fangin ngun tangka cuai thawng hlairiat le za riat tluk pe in vum lam Masopotamia le Syria khuapui Maacah le Zobah in ralkap zawng i.

⁷ Amahte zawnghnak siphuhlengte thawng sawmthum le thawng hnih le Maacah kumpibawi ralkapte tu kawi tlang ai Medeba hmunah ṭanghmun khuar tlang i. Ammon mite khai amahte khua ṭen in suak tlang ai raltawng tuhin ralring i.

⁸ Ciami thu heh David in a za fangin ralbawi Joab le Israel ralkap a veksen in ciamite tawng tuhin fehruai i.

⁹ Ammon mite tu suak ai Rabbah khuapui hnarpua in ṭanghmun khuar tlang i. Anite bawm tuhin a kawitu kumpibawite tu hampalak in ṭanghmun khuar ve i.

¹⁰ Ralte in hmai lam le hnua lamin kin tawng tuh i ti khiah Joab in a ling fangin Israel ralkap songai ralkap pha ber pawl ril ai Syria ralkap tawng tuhin bawhruai i.

¹¹ A dang Israel ralkap hmuahhmuah a unau Abishai horuai ai Ammon ralkapte tawng tuhin bawh tlang ve i.

¹² Cen Joab in Abishai hnenah, “Syria ralkapte in kai i neh lekhaw i bawm tu. Ammon ralkapte in ning neh lekhaw kai in ning bawm tuh ing.

¹³ Hat ngai le ralpha ngai in um tu! Kin miphun le kin Pathian ai khuapuite hrangah a roh ngai in tawng tuh ising. Bawipa daihhnak bangin cang tuseh,” tiin ti i.

¹⁴ Ciaben sawng fangin Joab le a ralkapte in nor tlang dekdo ai Syria ralkapte tu tlan tlang sio i.

¹⁵ Syria ralkapte tlan tlang i ti khiah Ammon ralkapte in a ling fangin Abishai tawng ngam loin dawp tlang ai khuapui songah let sio i. Cia hnuaah Joab tu Jerusalem khua ah tlung i.

¹⁶ Israel mite in neh sek i ti khiah Syria mite in a ling fangin Euphrates Runpui in nisuah lamai a ummi Syria ramsong minungte ralkap tuhin lang ai Zobah peng kumpibawi Hadadezer ai ralkap hotu upa ber Shobach horuai tlang i.

¹⁷ Ciami thu David in a za fangin Israel ralkapte tu kokhawm tlang lala ai Jordan Runpui a tan hnuaah Syria ralkap tawng tuhin ṭanghmun khuar tlang i. Tawng dun dekdo ai,

¹⁸ Israel mite in neh lala i. David le a ralkapte in Syria siphuh vumto ralkapte thawng sarih le ke ralkap thawng sawmli rek i.

¹⁹ Kumpibawi Hadadezer kuthnia ai kumpibawite in Israel ralkap in kin neh sek ihang, ti a ling fangin David thawn remhnak bawn ai a ukhnak ah cang i. Cia hnuaah Syria mite in Ammon mite tu bawm nuam nawn lo i.