1 Samuel 7 - Zanniat Bible

¹ Ciamanin Bawipa ai Thutiam Kuang tu Kiriath Jearim khua mite in phur tlang ai, tlang vumai umhnak Abinadab ai inn ah dah tlang i. Abinadab ai fapa Eleazar heh a kiltu tuhin ruai ai Pathian hnenah pumpehnak khai bawn sah i.

Samuel In Israel Uk I

² Kiriath Jearim khua ah Bawipa ai Thutiam Kuang tu kum kul tha um i. Hemi song hmuahhmuah ah Israel mite in Pathian hnenah bawmhnak ngen in kap tlang de i.

³ Ciafangin Samuel in, “Ning thinlung taktak in Bawipa ben ning nuam lekhaw ramdang khuavangte le Astartes khuavang nu ai zukte heh lon tusek ih. Ning nunhnak a veksen in Bawipa hnenah pe tusek ilai amah lek bia tu ih. Ciatihin Filistin mite in nehhnak songin Bawipa in ning luatruai tuh i,” tiin ti i.

⁴ Ciamanin Israel mite in Baal khuavang le Astartes khuavang nu ai zukte heh lon sek ai Bawipa lek bia tlang ihang.

⁵ Cen Israel mite tu Mizpah khua ah taikhawm tuhin Samuel in cah ai, “Ciata ah Pathian hnenah ning ca saw ning nget tuh ing,” ti i.

⁶ Ciamanin Mizpah ah taikhawm tlang sio i. Ti cawi ai Bawipa hnenah hibawlhnak ah ti burh tlang i. Cen sunnivui rong ul tlang i. “Bawipa vumah kin sual i,” tiin amahte sualhnak phuang tlang i. Mizpah ah Israel mite ai thunaihnakte heh Samuel in khan sah i.

⁷ Israel mite Mizpah ah taikhawmhnak thu heh Filistin mite in za fangin raltawng tuhin Filistin ai miukte panga le a ralkapte feh tlang i. Cia thu heh Israel mite in za fangin lau tlang ai,

⁸ Samuel hnenah, “Filistin mite kut songin kin o tuhin Bawipa kin Pathian hnenah catloin sawngen tu,” tiin ti i.

⁹ Ciafangin Samuel in tuu faniu ro ai a pum pahin maitai hibawlhnak ah Bawipa hnenah sel i. Israel mite bawm tuhin Bawipa hnenah Samuel in sawngen ai a sawngenhnak heh Bawipa in ngai sah i.

¹⁰ Samuel in hibawlhnak a sel betbo laitak ah mangrinlo in Filistin mite in tawng dekdo i. Ciafangin Bawipa in van in khuaripui tlir dumdo ai Filistin mite tu thinlau in buai ai tlan tlang sek i.

¹¹ Cia sawng fangin Israel mite in Filistin mite tu Mizpah an Bethkar hleng tianin hnawh tlang i. Amahte hnawhhnak lamtluanah Filistin mite heh rek kong betbo i.

¹² Cen Samuel in lungto pakhat lang ai Mizpah le Shen khua karlak ah bir ai, “Bawipa in kin lamtluanah kin bawm i,” ti ai “Ebenezer” tiin a hming bawn i.

¹³ Ciatihin Filistin mite tu ral sung ai Samuel nunsong hmuahhmuah Israel tawng thil tuh loin Bawipa in kham i.

¹⁴ Ekron le Gath khua karlak ai umhnak khua hmuahhmuah Filistin mite ai suthnak khuate tu Israel mite hnenah pe leh ai ciatihin Israel mite in amahte ram hmuahhmuah ngah tlang leh i. Cen Israel mite le Canaan mite karlak ahkhai remhnak um i.

¹⁵ Samuel tu a nun song hmuahhmuah ah Israel uktu i.

¹⁶ Kum siar in Bethel, Gilgal le Mizpah ah feh in thubuai umhnakte thukhan de i.

¹⁷ Cia hnuaah Ramah khua amah inn ah tlung de ai Ramah ahkhai Israel mite thukhantu i. Cen Ramah khua ah Bawipa ca puleng bawn i.