1 Samuel 30 - Zanniat Bible

Amalech Mite Thawn Raltawng I

¹ Ni hnih rai hnuaah David le a ralkapte tu Ziklag khua ah hleng i. Amalech mite in Judah ram hlang lam khiah rok ai Ziklag khua khai lang in mai in tai sek i.

² Nupang hmuahhmuah pom sek ai, aisu khai rek lo napui amahte veksen in fehpui sek i.

³ David le a ralkapte hleng fangin a khua tu kang sek hang ai amahte nupui, fanu le fapate tu fehpui zo sek i.

⁴ Ciaben fangin David le a minungte tu cawm roh in kap ai a tha bo ai a kap ben nawn lo tianin kap tlang i.

⁵ David ai nupuite pahnih Ahinoam le Abigail khai a fehpuihnak songah tel kawm ve i.

⁶ David tu vansang in um i. Zaimantifangin a minungte ai fate tu sal ah hoi sek manin thin ur tlang ngai ai David khiah lungto in sep tum i. Ikhalselai a Bawipa Pathian hnenin thahathnak ngah i.

⁷ Cen David in Ahimelech ai fapa suangbawi Abiathar hnenah, “Suangbawi kangbet korfual i pe tu,” tiin ti ai, Abiathar in pe i.

⁸ David in Bawipa hnenah, “Kin roktute heh hnawh tuh ing maw? Hnawh lengkhaw pom ngah ngang maw?” tiin zawt i. Ciafangin Bawipa in, “Hnawh tu; pom ngah tuhai amahte fehpui mite khai o tuh isi,” tiin ti i.

⁹ Ciamanin David tu a ralkapte zaruk thawn suak ai Besor rawn ah hleng i; ciata ah mi hrekkhat tang tlang i.

¹⁰ A minungte songin zahnih tu cawl tlang ze ai rawnti tan ben lo manin tang i. David le a minungte za li in hnawh betbo i.

¹¹ Cen a minungte in hampalak ah Egypt naupang paniu khul ai David hnenah fehpui i. Ti le rong pe i.

¹² Thaihmin ro tlawmniu le a carruaihnak cabit bawr hnih khai pe i. A ai ben fangin a helhep lawm i. Ni thum song zaikhai ai lo le ding loin um zo i.

¹³ Cen David in, “Na bawipa tu aisu i? Akonan kawi isi?” tiin zawt i. Ciafangin ani in, “Egypt mi ing ai Amalech mipa pakhat ai sal ing. I ur manin i bawipa in heta ah i zam i. A i zamhnak ni thum ihang.

¹⁴ Kereth ram hlang lam dunghlun, Judah ram hlang lam le Kaleb miphunte ram khai rok tlang ai Ziklag khua khai mai in tai sek i ing,” tiin rel i.

¹⁵ David in, “Ciami mi roktute hnenah i hoi nga sim?” tiin zawt i. Naupang pa in, “Na rek tuh hrimhrim lo ai i bawipa hnen ahkhai na pe tuh lo ing, tiin Pathian hming sal in thu i kham lesikhaw na hoi tuh ing,” tiin ti i.

¹⁶ Ciamanin ciami pa in David khiah hoi i. Amalech mite in Filistin ram le Judah ram an ral suthnak thilrite tu a tam ze manin, aih tlang ai zu ding tlang, sa ai tlang, puai bawn in nuamhmuncang ah piak tlang sio i.

¹⁷ Cialak ah David in sim ai zingniu in zan lam khuathim tian tawng i. Tlangvalte za li tu kalauk to in tlan sek i. Ciamite siarlo, pakhat khai tang loin rek berh i.

¹⁸ Amalech mite in a pomhnak le a langhnak hmuahhmuah, a nupuite pahnih thawn o sio i.

¹⁹ Zaikhai a paihnak um lo i. A fanu le fapate ituseh, thilrite ituseh, David in lang leh sek i.

²⁰ Tuu le kawlpawte khai a rualrual in ngah leh sek i. A minungte in sumhnamte tu hmaiah khor betbo ai, “David ai i,” tiin au tlang kong betbo i.

²¹ Cen David hlun ben nawn lo ai Besor rawnti ai a tangmi minungte zahnih hnenah David tu hleng leh i. Ciami minungte in David le a ralkapte khiah hmuak tlang ai David inkhai amahte hnen a hleng fangin lungawi ngai in hnuksat i.

²² Ikhalselai David hnenah a fehtu ve mi iksik nai le mi lak kep lo milovang pawl hrekkhat in, “Anite tu kin hnenah feh ve lo manin thilri kin langhnakte heh zem tuh ve lo ising. Amahte nupui le a fate khiah lang tu selai feh tuseh,” tiin ti i.

²³ Ikhalselai David in, “Unaute, Bawipa ai pehnak thilri vumah ciatihin bawn thil tuh lo i si. Amah in kil kin khawl ai kin roktute vumah nehhnak kin pe i.

²⁴ Ning relhnak tu aisu inkhai lungkhim tuh lo i. Aisu khai ituseh bangvek ṭen in co tuhhnak i. Thilri kin hlumhnak hnenai a tangmi inkhai raltawnghnak ai a fehtu co zah thotho in co tu ve seh,” tiin ti i.

²⁵ Ciami tu David in dan ah bawn ai Israel ram songah tun tianin hlun tata ihang.

²⁶ David tu Ziklag ah a hleng leh fangin ralte hnenin a longhnak thilrite hrekkhat tu Judah mi hotu, a rualpuite hnenah kuat ai, “Bawipa ai ralte hnenin kin longhnak thilri tlawmniu lehsawng in ning sum i ing,” tiin cah betbo i.

²⁷ Bethel ai ummi, Judah ram hlang lamai a ummi, Jattir peng khuate ai a ummi,

²⁸ Aroer khua, Siphmoth khua, Esthemoa khua,

²⁹ Rakal khua, Jerahmeel miphun ai khuate, Ken miphun ai khuate,

³⁰ Hormah peng, Borashan peng le Athak peng le,

³¹ Hebron ram songai a ummi khuasong mite hmuahhmuah hnenah kuat i. Amah David le a minungte hlenghnak khua hmuahhmuah ah kuat sio i.