1 Samuel 27 - Zanniat Bible

Filistin Mite Hnenah David Hleng I

¹ David in a thinlung niu in, “Nikhat khat ah Saul in i rek tuh i. Kaimah ca Filistin ramah tlan heh a pha ber tuh i. Ciatihin tlan lio lengkhaw Israel ram songah Saul in i si tuh nawn lo ai i him tuh i,” tiin ruat i.

² Ciamanin David le a ralkapte zaruk tu rang ngai in Gath kumpibawi Akhish, Maock ai fapa, hnenah feh tlang i.

³ David le a ralkapte tu a innsangte thawn Gath ramah um tlang i. David tu nupuite pahnih nai i: Jezreel khuami Ahinoam le Karmel khuami Nabal ai thihsanhnak Abigail i.

⁴ David tu Gath ramah tlan zo i, ti Saul in a ling fangin David si tuh heh tum nawn lo ihang.

⁵ Cen David in Akhish hnenah, “Na rualpui ngaingai in i ruat lesikhaw i umhnak tuhin khua pakhat i pe tu ve law. Kumpibawi nangmah thawn na khua ah um tlang tuh tu mawi lo i,’ tiin ti i.

⁶ Ciamanin Achish in David heh Ziklag tihnak khua pe i. Cia san ai panin Ziklag khua heh Judah kumpibawi ai cang hlen ihang.

⁷ Filistin ramah David tu kum khat le hla li song um i.

⁸ David le a minungte in cia ram songai kum raipui a um zomi Geshur mi, Girzi mi le Amalech mite heh tawng de i. Egypt ram hleng tianin sim de ai,

⁹ nupang ituseh, pasal ituseh rek berh de i. Cen amahte tuu, kawlpaw, laak le kalaukte lang ai a hnikpon tianin sut sio i. Cen Achish hnenah a hleng fangin,

¹⁰ Achish in, “Tun ṭum tang kon ram sim isi? tiin a zawt fangin David in, Judah ram hlang lamah feh ing, ti thul; ihlahle Jerahmeel miphunte ramah feh ing, ti thul; ihlahle Ken mite ramah feh ing, ti tuak de i.

¹¹ David in nupang ituseh, pasal ituseh rek berh de ai Gath ram feh in David le a ralkapte ai thil bawnhnak a reltu um de lo i. Filistin ram songai a um song hmuahhmuah David in ciatihin bawn de i.

¹² Ikhalselai Achish in David tu a um ze manin a thinlung niu in, “Amah ai minung Israel mite in hua tlang ze manin a nun song hmuahhmuah na i ruaih in um tuh i,” tiin ruat i.