1 Samuel 26 - Zanniat Bible

David In Saul Nunhnak Zuah Lala I

¹ Gibeah khua Saul hnenah Ziph khuami hrekkhat kawi tlang ai Judea ramkhing hiangai mual pakhat Hakhilah mual ah David tu relh hlen i, tiin rel tlang i.

² Cammalak in Saul tu Israel ralkapte lakai a pha ber ralkap thawng thum thawn Ziph ram lakah David si tuhin feh i.

³ Hakhilah mual kaihnak lampui ah Saul cam i. Ciami hampalak ah David tu um lai ai amah si in Saul kawi ihang ti a ling fangin,

⁴ David in micultute hlat ai Saul um ngaingai i ti ling i.

⁵ Ciafangin David tu feh ai Saul le Saul ralkapte uktu Ner ai fapa Abner ai mitmuhnak hmun rori heh fel ngai in sik i. Saul tu amahte cam hmun laita ber ah mitmu ai a ralkapte tu a kimvel ah cam tlang i.

⁶ Cen David in, “Kaimah thawn Saul riahbuk ah aisu feh tuh i si? tiin Hit mi Ahimelech le Joab ai unau Zeruiah ai fapa Abishai hnenah zawt i. “Kaimah feh tuh ing,” tiin Abishai in ti i.

⁷ Cia zan ah David le Abishai tu Saul riahbuk lamah kawi ai a riahbuk laiteng ah Saul heh hmu kawm i. A lu hiangah a faipui khai a khun vung in hmu kawm i. Saul hiangai Abner le a ralkapte khai mitmu tlang sio i.

⁸ Ciafangin Abishai in, “Tun zan ah Pathian in na ral heh na kut songah na pe ihang. Amah faipui lala in hlehpet in dawt tuh ing. Vel khat dawt in tawk tuh ngawn i, vel hnih kul tuh lo i,” tiin David hnenah ti i.

⁹ Ikhalselai David in, “Tuahmawh hrimhrim malaw. Bawipa ai rilhnak kumpibawi a tuahmawhtu hmuahhmuah heh cawhhnak tuar tuh rori i.

¹⁰ Amah ai thihcam khim fangin thi tuhin, cialo talah raltawnghnak ah thi tuhin Bawipa in Saul tu a nunhnak boruai tuh ngawn i, ti khiah a nungmi Bawipa ai hming sal in rel ngam ing.

¹¹ Pathian in kumpibawi a cangruaimi tuahmawh tuh heh Bawipa Pathian in i siang hram maseh. A faipui le a tithawl lang ngasing khaw feh ngasing,” tiin ti i.

¹² Cen David in Saul lu hiang rori ai umhnak faipui le tithawl heh lang ai Abishai thawn feh kawm i. Aisu inkhai hmu lo ai ling fawn lo i. A ihtleptu peu khai um lo i. Zaimantifangin Bawipa in anite veksen in mitmu ur ngai in mitmuruai manin i.

¹³ Cen David tu a hla thahpui ah feh ai khat lam ral mualvum a hleng fangin,

¹⁴ “Aw Abner! I za aw sim?” tiin Abner le Saul ai ralkapte heh auh dekdo i. “Ciatihin kumpibawi a auhtu dekdo heh aisu i?” tiin Abner in zawt i.

¹⁵ Ciafangin David in, “Pasalpui ilo sim? Israel mite lakah mi cungcuangber ilo sim? Ikhalselai zaiman in kumpibawi na bawipa heh phaniu in kil lo isi? Na bawipa rek tuhin tun niu rori in ning cam hmun ah mi lut i.

¹⁶ Abner, na ṭuanvo pelh zo isi! A nungmi Bawipa ai hming sal in na rel ing: thi tlak isi; ning veksen in thi tlak i si. Zaimantifangin Bawipa Pathian in kumpibawi ah a cangruaimi ning bawipa heh phaniu in kil tlang lo i si. Sik tu! Akonah kumpibawi ai faipui um ipa? A lu hiangai tithawl tang akonah ipa?” tiin ti i.

¹⁷ David aw heh Saul in za ai, “David i fapa, nangmah i aw sim?” ti i. Ciafangin David in, “Aw kumpibawi, kaimah ing.

¹⁸ Bawipa, zaimanin kai na sal pa heh i hnawh betbo isi? Zaibang sualhnak bawn manin hetihin i kan thliahthlo isi?

¹⁹ Aw bawipa, i thurelhnak ngai tu law. Hetihin na i ral heh Bawipa Pathian in na ruai manin ilekhaw hibawlhnak sel selai a thinnem deuh thai hmio i. Ikhalselai minung forhhnak manin lekhaw Bawipa ai cukcamhnak amahte vumah hleng tuseh. Zaimantifangin ramdang khuavangte bia tuhin hnawt sek ai Bawipa in a miphun hnenai a pehnak ram songin kai i covo hmuahhmuah i sung zo ihang.

²⁰ Bawipa Pathian a um lohnak, a dang miphunte ai ram songah i thisan luangruai hram mah. Uihik tluk fang menma kaimah heh nangmah Israel kumpibawi in zaimanin i rek tum hnelhno isi? Hampalak vaniu zul bangin zaimanin i zul thliahthlo isi?” tiin ti i.

²¹ Ciafangin Saul in, “I sual zo i. David i fapa, let tu law. Tunnia ah i nunhnak i zuah manin nangmah siatsuah tuh heh tum tuh nawn lo ing. I voi lawmlam i! Thil tisual zo ing,” tiin David hnenah ti i.

²² Cen David in, “Aw kumpibawi, na faipui tu heta ah um i. Na minung pakhat hlat tulai lang tuseh.

²³ Midik le rinsantlak minung tu Bawipa in a phatman pe i. Nang tu tunnia ah Bawipa in i kut songah na dah i. Ikhalselai Bawipa ai rilhnak kumpibawi na imanin zaikhai na ti lo ing.

²⁴ Na nunhnak songloih ai tunnia ah na nunhnak i zuah bangin Bawipa in i nunhnak tu songloih in i zuah tu ve hram seh, rimsu harsahnak in i luatruai tu ve seh,” tiin ti i.

²⁵ Ciafangin Saul in, “Pathian in hmuifu na burh tuseh, i fapa. Thil ngaihsunurkul bawn tuh isi ai na bawnhnak cangcang ah hlawh na tling tuh i,” tiin ti i. Cia hnuaah David tu feh ai Saul khai a inn ah tlung i.