1 Samuel 24 - Zanniat Bible

David In Saul Ai Nunhnak Zuah I

¹ Filistin mite tawnghnak in Saul a let fangin David tu Engedi ramcar ah relh i, ti khiah rel tlang i.

² Ciafangin Saul in Israel ralkapte lakai a pha ber pawl thawng thum thawn David le a minungte khiah Sathar Liang tihnak hmun an nisuah lamah si i.

³ Ciami lampui hiangah tuu khawk um bial ai ciami hiangah lungkhukua pakhat um i. Ciami lungkhukua a tong hmunah David le a minungte relh tlang i. Saul tu ciami lungkhu a hleng fangin buruk to tuhin lungkhukua songah lut i.

⁴ Ciafangin David tu a minungte in, “Can remcang ngah isi. Na ral heh na kut songah na pe tuh ing, tiin Bawipa in a tihnak bangin na pe ngaingai manin a vumah na nuam bangin bawn thil ihang si,” tiin ti tlang i. Cen David tu a thupniu in vak ai Saul ai ling thai loin a kor fualpui ai a hmur niu tan sah i.

⁵ Ikhalselai Saul ponhmur ciatihin a tan sah manin David tu a thinhar ai,

⁶ a minungte hnenah, “Pathian in kumpibawi in a rilhnak i bawipa heh tuahmawh tuh loin Bawipa Pathian in i kil tu hram seh. Pathian ai a rilhnak kumpibawi imanin ani tu siatsuah tuh hrimhrim lo ing,” tiin ti i.

⁷ Cen David in a minungte tu Saul rek tuh loin rel i. Saul tu tho ai lungkhukua songin suak ai feh i.

⁸ Cen David in hlun ai, “Aw kumpibawi,” tiin ko i. Saul tu a khel her ai ciafangin David tu upathnak thawn lailak ah bok ai,

⁹ “Bawipa, David in na rek tum i, ti ai na reltute thu tu zaiman sang isi?

¹⁰ Tunnia lungkhukua songah nangmah heh Bawipa Pathian in i kut songah na hlengruai i, na mit rori in hmu isi. Mi hrekkhatte in nangmah rek tuhin i forh tlang i, ikhalselai na ninghio ai Pathian ai rilhnak kumpibawi na imanin tlawmniu khai tuahmawh tuh lo ing, tiin ti ing.

¹¹ Sik tu, i bawipa, na korfual hmur niu i awhhnak heh! Kaimah rori in cem ing. Ikhalselai na rek lo ing. Hemi na hmu fangin na tawng tuhin le siatsuah tuhin tumhnak nai lo ing, ti na fiang tuh i. Nang cenin rek tuhin i si hnelhno napui khalsikhaw kai cenin zaikhai na ti awng lo ing.

¹² Aisu sawn kin mawh i, ti Bawipa Pathian in rel tuseh. Nangmah heh tlawmniu khai na tuahmawh lo ai nang cenin i ral manin Pathian in na cawh tu hram seh.

¹³ ‘Thil siava heh mi pha lo pawl in bawn tlang i,’ ti ai santehhnak pon heh ling hlen isi. Ikhalselai kai cenin na tuahmawh tuh hrimhrim lo ing.

¹⁴ Cen Israel kumpibawi ai a rek tumhnak thliahthlo mi heh sik tu! a hnawhhnak hnelhno heh sik tu! Uico thi cia ang menma i. Uihik tluk fang i.

¹⁵ Aisu sawn kin mawh i, ti khiah Bawipa Pathian in kin sik kawm tuhai kin rel sah tuh i. Hemi thula tu Bawipa in tawlrel tuseh; i ṭan tu selai i o tuseh,” tiin ti i.

¹⁶ Ciatihin David thu a rel ben fangin Saul in, “I fapa David ngaingai i aw sim? tiin ti ai kap i.

¹⁷ Cen Saul in David hnenah, “Nangmah na dik ai kaimah i sual i. I vumah na pha bik napui kai tu na vumah i siava ze i.

¹⁸ Bawipa Pathian in na kut songah i dah napui i rek lo manin i vumah zaitlukin mi pha isi ti khiah tunnia ah larruai zo isi.

¹⁹ Aisu in a ral pom ngah hnuaah himniu in hlat leh awng pa? I vumah tunnia ai na bawnhnak manin Pathian in hmuifu na pe tuseh.

²⁰ Israel kumpibawi na cang tuhai Israel ram na ukhnak heh cat tuh awng lo ihang, ti khiah tunin fiang ngai in ling zo ihang ing.

²¹ Ikhalselai i hming le i innsang hming heh pairal tuh loin, ‘Na tesinfate tu zuah tuh ing,’ tiin Bawipa hmaiah thu i kham tu,” tiin ti i.

²² A tihnak bangin David in thukham i. Cen Saul tu a inn ah tlung ai David le a minungte tu a relhhnak hmunah tlung tlang i.