1 Samuel 23 - Zanniat Bible

David In Kailah Khuapui O I

¹ Filistin mite in Kailah khua sim ai rong thar khawm sawng niu khai ru tlang dekdo i, ti khiah David in za i.

² Ciamanin Bawipa Pathian hnenah, “Filistin mite tawng tuh ing maw?” tiin zawt i. Ciafangin, “Tawng tulai Kailah khua heh o tu,’ tiin Bawipa in ti i.

³ Ikhalselai a minungte in David hnenah, “Judah ram songah lau pha tampui nai ising khaw, Kailah khua ah feh in Filistin mite tawng lesingkhaw kin harsa tuh amam i,” tiin ti tlang i.

⁴ Ciamanin David in Bawipa hnenah thu zawt lala ai Bawipa in, “Kailah ah Filistin mite tawng tu; zaimantifangin neh tuh isi,’ tiin ti i.

⁵ Ciamanin David le a ralkapte tu Kailah ah feh tlang ai Filistin mite tawng i. Filistin mite tu tampui thi ai sumhnam tampui khai sut i. Ciatihin Kailah khua tu David in o i.

⁶ Ahimelech ai fapa Abiathar tu tlan ai David hnenah a hleng fangin suangbawi kangbet keng i.

⁷ Cen Kailah khua ah David hleng i ti khiah Saul hnenah rel tlang fangin Saul in, “Ukkhe ai kulhhnak, kotkalh le ving ai kulhhnak khua ah David hleng zo ai amah le amah kharhkhum zo i. Bawipa in i kut songah i pe zo ihang,” tiin ti i.

⁸ Ciamanin Saul in Kailah khua tawng tuhin le David le a ralkapte pom tuhin a ralkapte heh ko sio i.

⁹ Saul in i tawng tum i, ti khiah David in a ling fangin, “Suangbawi korfual kangbet koih tu,” tiin suangbawi Abithar heh ti i.

¹⁰ Cen David in, “Aw Bawipa, Israel ai Pathian, na sal pa kaimah manin Saul tu Kailah khua ah kawi tuhai siatsuah tuh sek i, tiin za ing.

¹¹ Kailah khuasong mite in Saul kut songah i pe nga im? I zahnak bangin Saul tu kawi rori nga im? Aw Bawipa, Israel ai Pathian, i zawthnak heh i sawn tu hram law,” tiin ngen i. “Saul tu kawi tuh rori i,” tiin Bawipa in sawn i.

¹² Ciafangin David in, “Kailah khuasong mite in Saul kut ah kaimah le i minungte heh kin pe nga im?” tiin zawt i. “Ning pe tuh i,” tiin Bawipa in ti i.

¹³ Ciafangin David le a ralkapte zaruk dung heh Kailah khua an rang ngai in suak tlang ai tlan i. David tlan zo i ti khiah Saul in a ling fangin a tumhnak ṭul leh i.

Hampalak Ah David Um I

¹⁴ David tu relh ai Ziph khua hiang hampalak ah um i. Saul in a sun a zan in David heh si napui Saul kut songah hleng tuh Pathian in siang lo i.

¹⁵ Ikhalselai Saul in a rek tuh ian in a tum manin David tu a thinlau thotho i. Ziph khua hiang hampalak ai Horesh tihnak hmunah David a um laitak ah,

¹⁶ Jonathan heh a hnenah feh ai Bawipa hming in thin nau tuh loin tha pe i.

¹⁷ David hnenah, “Na thin lau mah. I pa Saul in na rek thil tuh lamlam lo i. Israel kumpibawi na cang tuhai kaimah khai nangmah sangtu i cang tuh i. Ciami tu i pa in ling sio hlen i,” tiin Jonathan in ti i.

¹⁸ Cen rualpui phadunhnak heh Pathian hmaiah thukham leh i. David tu Horesh ah um ai Jonathan tu inn ah tlung i.

¹⁹ Ziph khua mite hrekkhat tu Gibeah khua ah Saul hnenah feh tlang ai, “David tu kin ram songah um ai Juadea hlang lam hmur, Halkhilah tlang, Horesh tihnak hmunah relh i.

²⁰ Aw kumpibawi pa, David pom ngah tuh zaitlukin na nuam i ti khai ling sio i ing. Ciamanin kin ramah kawi tulai na pomthilhnak tuhin bawn tuh i ing,” tiin ti i.

²¹ Ciafangin Saul in, “Hetlukin i ruat tlang manin Pathian in hmuifu ning burh tuseh.

²² Feh tu ilai akonteng ber ah um ai aisu in hmu i, ti phaniu in hliah ta tu ih. David tu mileple roh i ti za ing.

²³ Ciamanin a relhhnak hmun rori si tu ilai pelh loin i hnenah i thu i than leh tu ih. Cen ning hnenah feh tuhai Judah ram pumpuhluk si kul inkhai cia ram dunghlun ah um lai lekhaw si tuh rori ing,” tiin ti i.

²⁴ Ciamanin Saul hleng hlanah Ziph khua ah let tlang i. David le a minungte tu Juadea hampalak hlang lam hmur Maon tihnak ah um tlang i.

²⁵ Cen Saul le a ralkapte tu David si tuhin feh tlang i. Cia thu heh David in a za fangin Maon hampalak ai lungto lek ai dimhnak phairawn ah feh ai ciata ah um tlang i. Cia thu tu Saul in a za ve fangin David heh hnawh i.

²⁶ Lungto tlang ai a khat lam mual ah Saul le a ralkapte hleng ai David le a minungte tu khat lam mual ah um tlang i. David le a minungte tu pom tuh lau manin tlan ai Saul le a ralkapte in hnawh betbo ai pom ngah dawn ihang.

²⁷ Cialai ah mi pakhat Saul hnenah kawi ai, “Rang ngai in let tu, Filistin mite in kin ram kin tawng ihang,” tiin rel i.

²⁸ Ciamanin Saul in David tu hnawh nawn loin Filistin mite tawng tuhin let i. Ciamanin cia hmun heh Sela Hammah- lekoth tiin ko i.

²⁹ David tu ciata in feh ai Engedi tihnak lungkhukua ah relh i.