1 Samuel 20 - Zanniat Bible

Jonathan In David Bawm I

¹ David tu Ramah khua hiang Naioth khua an tlan le Jonathan hnenah hleng ai a hnenah, “Ziang thil sual bawn ing? Ziang mawhhnak nai ing? Na pa vumah ziang thilsual bawn manin hetihin i rek tum i?” tiin ti i.

² Ciafangin Jonathan in, “Pathian in na thi tuh heh na siang maseh. I pa ai a bawnhnak hmuahhmuah heh thupui ituseh, thu nepnawi ituseh i rel sio de i. Rek na tum selai pheh tuh lo i. I rel tuh i,” tiin ti i.

³ Cen David in, “Nangmah in kai tu zaitluk i it isi ti khiah na pa in a ling manin a tumhnak tu na thin ur tuh a lau manin na lingruai tum lo i. I thi tuhhnak ah kal khat lek sam i, ti khiah Bawipa hming in thukham ngam ing,” tiin ti i.

⁴ Jonathan in, “Bawn tuh na i daihsahhnak hmuahhmuah bawn tuh ing,” tiin ti i.

⁵ Ciafangin David in, “Thangha tu Hla Thar puai i ai kumpibawi hnenah rong ai tuh ing. Ikhalselai lung na khim ve lekhaw hampalak ah feh tuhai tit nia zan lam tian relh tuh ing.

⁶ Rong ai can ah i um lo fangin na pa in i van lekhaw Bethlehem ai a inn ah a rang ngai in tlung i ta; zaimantifangin amahte songkhat in kum siar a sel dehnak hibawl sel can i ai kaimah i rel i, tiin ti tu.

⁷ Ciafangin na pa in, “Pha i,” ti lekhaw lau tuh zaikhai um lo i. Ikhalselai a thinraw lekhaw i siatsuah tum tengteng i, ti ling tuh isi.

⁸ Ning i hio tulai i hnenah Pathian hming sal in thukham na bawnhnak heh hlun tu hram. Ikhalselai kaimah lehlam i mawh lekhaw nangmah sawn in i rek tu. Zaiman na pa kut in thi tuh ing?” tiin ti i.

⁹ Ciafangin Jonathan in, “Ciatihin tu cang maseh. I pa in rek na tum rori i, ti ling fiang lengkhaw akontih in na rel loin um thil tuh ing,” tiin ti i.

¹⁰ Cen David in, “Na pa thinraw ngai in pong i, ti khiah aisu in i lingruai tuh i?” tiin Jonathan hnenah zawt i.

¹¹ Jonathan in, “Hampalak ah feh ngasing,” tiin sawm i. Ciamanin hampalak ah feh kawm i.

¹² Ciafangin David hnenah Jonathan in, “Israel ai Bawipa Pathian tu kin lingpuitu cang tuseh. Thangha le tit nia tun can fangin i pa heh thu zawt tuh ing. A thinlung na vumah pha lekhaw thu na than tuh ing.

¹³ Ikhalselai na siatsuah tum lekhaw, na rel tuhai tlan tu. Na lingruai lo ai siatsuahhnak tawk lesikhaw Pathian in i rek tuseh. I pa hnenah Bawipa a um bangin na hnen ahkhai um tu hram seh.

¹⁴ Cen i nung lai lekhaw na thukham cianghlim heh khoruai tulai kaimah caah rintlakmi cang tu hram. Ikhalselai i thi lekhaw,

¹⁵ a kumzangza in i innsangte hnenah na ninghiohnak hmuh tu hram law. Cen Bawipa in na ral hmuahhmuah amahte ci a hmit sio fangin khai,

¹⁶ kin thukhamhnak tu zaikom inkhai cat maseh. Cat lekhaw Bawipa in nangmah mawh na hluk tuh i,” tiin ti i.

¹⁷ Jonathan in David heh a ithnak thukham bawn leh i, zaimantifangin amah le amah a it bang rori in Jonathan in David heh it i.

¹⁸ Cen Jonathan in, “Thangha tu Hla Thar Puai i ai tel hlahle sikhaw na tohkham lawng tuhai na um lo lar tuh ze i.

¹⁹ Na tel lo heh tit nia ah lar tuh amam i. Ciamanin kin hnua ai na relh hmunah feh tulai ciata ah lung pumbialhnak a ber ah relh tu.

²⁰ Hmuisung bangin ciata heh thalte pathum in sai tuh ing.

²¹ Cen ciami thalte si tuhin i hnenum pa hlat tuh ing. A hnenah, ‘Thalte tu na umhnak an helam sawn ah um i; lang ta tu,’ ti lengkhaw nangmah caah zaikhai lau tuh um lo i, suak thil isi tihnak i. Lau tuh um lo i, ti khiah Bawipa hming sal in na rel ing.

²² Ikhalselai a hnenah, ‘Thalte tu na umhnak an khat lam sawn ah um i,’ ti lengkhaw tlan tu. Bawipa in hmundang ah feh tuh na daih sah i, tihnak i.

²³ Kin karlak ai thukham kin bawnhnak thu ah kumzangza in i nemhngethnak tuhin Bawipa in khimruai tuh i,’ tiin ti i.

²⁴ Ciamanin David tu hampalak ah relh i. Hla Thar Puai rong aihnak ah Saul kumpibawi lut ai,

²⁵ a to dehnak bangkhang hiangah to i. A sangtu ah Abner to ai, Jonathan tu khat lam hmur, Saul ai hmaicang ah to i. David ai tohkham tu lawng i.

²⁶ Ikhalselai cia nia ah Saul in zaikhai rel lo i, zaimantifangin, “A cianghlim lohnak pakhatkhat um i tuh i tiin ruat i.

²⁷ A thangha, Hla Thar Puai a ni hnihhnak ah, David tohkham heh lawng thotho i. Ciamanin Saul in, “Zaimanin mania ituseh, tunnia ituseh rong aihnak ah David suak lo i,” tiin Jonathan khiah zawt i.

²⁸ Ciafangin Jonathan in, “Bethlehem ah feh tuhin thupui ngai in i ngen ai,

²⁹ ‘I songkhatte kin khua ah hibawlhnak puai bawn tlang ai i upa in tel tuh tengteng in i cah i; ciamanin i rual pha ilesikhaw i hlat tulai i songkhatte tawk tuh ing,’ ti i. Ciamanin he rong aihnak ah a tel thil lohnak i,’ tiin rel i.

³⁰ Cia thu heh Saul in a za fangin a thinraw ze ai, “Nang mi lovang, raltho le rintlak lo nu ai fapa! Jesse ai fapa David ṭan isi ti khiah fiang ngai in ling zo ing. Na nu thangsiatiar ai nangmah lala khai thangsiatiar isi.

³¹ David a nun song hmuahhmuah he ramah kumpibawi na cang tuh awng lo i, ti ling lo isim? Tun rang ngai in feh tulai David tu heta ah hoi leh tu, thi kul i!” tiin Jonathan khiah hau dekdo i.

³² Ciafangin Jonathan in, “Zaimanin thi tuh i? Ziang sual i?” ti i.

³³ Ciafangin Saul in Jonathan rek tuhin a faipui lang ai khawh i. Cia hnuaah tu a pa in David rek tum tengteng i, ti Jonathan in fel ngai in ling i.

³⁴ Cabuai in Jonathan heh thinraw ngai in tho ai cia nia Hla Thar Puai a ni hnihhnak nia tu zaikhai ai loin um i. A pa Saul in David tu mualpho ze in a bawn manin Jonathan in a lungsiapui ngai i.

³⁵ Amahte lungkhimhnak bangin a thangha fangin Jonathan tu David tawk tuhin hampalak ah feh i. Jonathan in tlangval niu pakhat fehpui i.

³⁶ Ciami tlangval pa hnenah, “I sai tuhhnak thalte heh dawp tulai si ta tu,” tiin ti i. Tlangval pa khai dawp ai Jonathan in thal heh a hlapui ah sai i.

³⁷ Thal tlokhnak hmun a hleng fangin Jonathan tu cawm ngai in au ai, “Thal tu a hlapui ah um i.

³⁸ Ciata ah ding menma mah. Rang ngai in feh tu,” tiin ti i. Tlangval pa in thal heh khul ai a bawipa hnenah hlenpui i.

³⁹ Ikhalselai a sullam zaikhai ling lo i. Jonathan le David ca ahcen sullam nai sio i.

⁴⁰ Cen li le thalte tu khua songah tlun tuhin Jonathan in a tlangval pa hnenah pe i.

⁴¹ Tlangval pa a feh hnuaah a relhhmun lungpup in David tu tho ai laipua tong rori in vel thum tian a lu ut i. David le Jonathan tu thut dun ai kap kawm i. David ai lungsiahnak tu Jonathan lungsiahnak tahin luar sawn i.

⁴² Cen Jonathan in, “Na hnenah Pathian um tuseh. Bawipa in kin pahnih lakah le na tesinfa le i tesinfa karlak ai Bawipa hming sal in thukham kin bawnkawmhnak heh kin khoruai ṭio tuhin kin bawm tuseh,” tiin David hnenah ti i. Cen David khai feh ai Jonathan tu khua songah tlung leh i.