1 Samuel 2 - Zanniat Bible

Hannah Ai Sawngenhnak

¹ Hannah in hetihin sawngen i: “Bawipa i thinlung tu anghnak in dimruai zo i; A bawnciahnak manin lung i awi i. I ralte hnihsan thil zo ing; I bawm zo manin lung i awi i.

² Bawipa bang a thianghlimmi aisu khai um lo i; I Pathian bangin Lungpui dang aisu khai um lo i.

³ Cawm ngai ai ning tluangkhawnghnak com tuhang ih; A puarthau ngai ning ponkam com tuhang ih. Zaimantifangin zaizongza a lingtu Pathian i; Minungte ai bawnhnak hmuahhmuah vumah thureltu i.

⁴ A hat ngai ralkapte ai li le thal ek sio i; Ikhalselai miṭawnṭaite hat leh i.

⁵ Rong a kham ngai mite in rong hlawhtu hlawhfa ah cang ai, Rikam mite in rongkham leh i. Fa nai lo nu in fate pasarih nai ai, Fate tampui a naitu in fa nai lo ah cang leh i.

⁶ Bawipa in thiruai ai nunhnak pe leh i. Mithi khua ah hlengruai ai mithi khai nungruai leh i.

⁷ Mi hrekkhat farahruai ai a hrek tu lianruai i; A hrekkhat minauta cangruai ai, A dang tu mithupui cangruai i.

⁸ Minautate laivut lakin khaisang ai, Mi hlawhsamte vutkuang lakin cawisang i. Kumpibawi fapate thawn toruai ai, Upathnak hmunah toruai i. Laivum hampanhnakte khiah Bawipa ai i; Ciami vumah laipua heh toh i.

⁹ “A thianghlim mite ke vakhnak kilkhawl i; Ikhalselai misiavate tu khuathim lakah pai tlang sek i; Minung hathnak lekin hlawhtlinghnak um lo i.

¹⁰ Bawipa a raltute tu siatsuah tuh sek i; Vancung in khuari bangin tlir tuh dumdo i. Bawipa in laivum pumpuhluk thu rel tuh i; A kumpibawi hnenah hathnak pe tuh i; A rilciahnak kumpibawi tu nehtu cangruai tuh i,” ti i.

¹¹ Elkanah tu Ramah ah tlung i. Ikhalselai Samuel tu Shiloh ah um ai suangbawi Eli kuthnia ah Bawipa ruaih i.

Eli Ai Fapate

¹² Eli ai fapate tu misual ngaingai i. Bawipa Pathian khai zaisiar tlang lo i.

¹³ Israel mite hnenin suangbawite ai covo ngahdan pawl khai tisual sio i. Amahte dan bangin Pathian hnenah hibawlhnak a sel tlang fangin suangbawi ai hnenum pa tu kak thum nai dar hai thawn kawi i. Hibawlhnak sa a suang thliahthlo laiah,

¹⁴ bel songai sa khiah darkeu in sawh ai a thurthilhnak hmuah heh suangbawi ca i. Hibawlhnak a sel tuhin Shiloh khua ai a kawitu Israel mite hmuahhmuah caah ciatihin bawn ṭiode i.

¹⁵ Ikhalselai Eli fapate ai san ahcen amahte rohnak sa ai a thau khai mai ah tai hlanah suangbawipa hnenum kawi ai hibawlhnak bawntu pa hnenah, “Suangbawi ca em tuhhnak sa i pe tu. Suangciahnak tu sang tuh lo i. Sa hing lek sang i,” tiin ti i.

¹⁶ Ciafangin hibawlhnak a seltu pa in, “A thau tu mai in tai hmasa ngasing khaw cia hnuaah na daihhnak lang leh tu,” tiin a ti fangin, suangbawi hnenum pa in, “I lo i, tun i pe tu. I pe hlahle sikhaw khengkhebel in lang tuh ing,” tiin ti de i.

¹⁷ Ciatihin Eli ai fapate sualhnak tu Bawipa hmaiah lian ngai ihang, zaimantifangin Bawipa hnenah hibawlhnak heh nautathnak thawn ningrimtiar i.

Shiloh Khua Ah Samuel

¹⁸ Naupang pa Samuel tu Bawipa ruaih in pon nemniu ai bawnhnak kangbet angki sil de i.

¹⁹ Kum siar in a nu in korfual khui de ai, kum khat vel khat hibawlhnak a pasal thawn a pe fangin cia korfual heh a fapa pe de i.

²⁰ Cen Elkanah le a nupui tu Eli in hmuifu pe ai Elkanah hnenah, “Bawipa hnenah na pehnak na fapa aiawh in he na nupui songin Bawipa in a dang fate na pe tuseh,” tiin ti i. Cia hnuaah amahte khua ah tlung de i.

²¹ Bawipa in Hannah tu hmuifu pe ngaingai ai a dang fapate pathum le fanute pahnih nai leh i. Naupang pa Samuel tu Bawipa ruaih in khang betbo i.

Eli Le A Fapate

²² Eli tu a tar ze ihang. Israel mite vumai a fapate nuncan ziaza le Pathian Ponhlam song luthnak dawngkham ai napertu nupangte rin sualpui ṭiode i ti ling i.

²³ Ciafangin a fapate hnenah, “Zaiman hetihin nung i si? Mi zongzong in thilsual ning bawnhnak thu i rel i.

²⁴ I fate, ciabang heh bawn nawn mah ih. Bawipa ai minungte in ning thu a relhnak de tu thu pha ilo i.

²⁵ Mi pakhat in midang vumah sual lekhaw remreltu a Pathian um i. Ikhalselai mi pakhat in Pathian vumah sual lekhaw aisu in remhnak thu bawn thil tuh i? tiin ti i. A pa in hau hnelhno de napui ngai nuam tlang lo i, zaimantifangin anite tu thiruai tuhin Bawipa in ruat cia zo i.

²⁶ Naupang pa Samuel tu Pathian hmai le minung hmaiah mithmai pha co in khang betbo i.

Eli Ai Innsang Vumah Thusia Hleng I

²⁷ Prophet pakhat Eli hnenah hleng ai Bawipa ai thu hetihin rel i, “Na pu Aaron le a songkhatte Egypt ram songai Pharoah sal a cang laiah Aaron hnenah lar ing.

²⁸ I suangbawi cang thil tuhin le puleng ah i na ruaih in rimhmui khai tai ai kaimah caah korfual cianghlim a phurtu cang thil tuhin amah ai songkhatte le Israel miphun hmuahhmuah songin ril zo ing. Ciahlaiah puleng vumah mai tai in hibawlhnak songin amahte ngahhnak covo pe ing.

²⁹ Ciatih inapui zaimanin kaimah thupeciahnak bangin amahte hibawl le sazarh selhnak duhhamhnak thawn sik in iksik lai i si? Zaimanin i miphun Israel mite ai hibawl sa selhnak hmuahhmuah lakin sa ur ber ning fapate airuai in ningmah hmuah ning thau tlang sio i? Kaimah tahin na fapate khiah songlawiruai sawn isim?

³⁰ Na songkhat ituseh, na phunpui ituseh catloin kaimah ai suangbawi tuh i si tiin Israel ai Bawipa Pathian, kaimah hrimhrim in thu ning kham zo ing. Ikhalselai ciatihin i tuh nawn lo ihang, tiin tunin ning rel ing. I songlawiruaitu sawn songlawiruai tuhai i zohsuamtu khiah zohsuam tuh ve ing.

³¹ Ruat tu, na songkhat songah tarkun in a nungmi um tuh loin na songkhat le na phunpui songai tlangval hmuahhmuah i thiruai berh can hleng tuh i.

³² Ciafangin lung ning sia tlang tuhai Israel mite hnenah hmuifu i pehnak iksik tlang tuh i si, ikhalselai na songkhat lakah tarkun tian a nungmi um tuh awng lo i si.

³³ Na tesinfate songin mi pakhat lek nungruai tuhai i suangbawi tuh i. Amah tu a mitvai tuhai thinpit vansang in um tuh i. Na tesinfa dangte tu sarthih in thi tlang tuh sek i.

³⁴ Cen na fapate pahnih Hophni le Phinehas khai ni khat song rori ah thi kawm fangin i thurelhnak a dik i, ti lar tuh i.

³⁵ Cia hnuaah kaimah ca rinsantlak mi suangbawi pakhat ril tuhai bawn i nuamhnak hmuahhmuah bawn tuh sio i. Tesinfa tampui pe tuhai anite tu i rilhnak kumpibawi hmaiah na ruaih tuh de i.

³⁶ Na tesinfate songin a nungmi um lekhaw rong aih a ngahthilhnak tuhin kumpibawi hnenah kawi in paisa le rong ngen tlang tuhai suangbawite bawmtu cangthilhnak tuhin khai ngen tlang tuh i,” tiin ti i.