1 Samuel 19 - Zanniat Bible

Saul In David Harsahnak Pe I

¹ Saul in David rek tuh tengteng a tumhnak thu khiah a fapa Jonathan le a kuthnia tlangsuakte hnenah rel i. Jonathan in David heh a ngaih ze manin,

² “I pa in na rek tum i. Thangha tu ralring tulai hmunthup pakhatkhat ah relh tu.

³ Hampalak na umhnak ah i pa a kawi fangin hlun tuh ve ai na thula heh rel tuh ing. Thu linghnak nai lengkhaw na rel tuh ing,” tiin David hnenah ti i.

⁴ Cen a pa hnenah Jonathan in David phathnak rel ai, “Bawipa, David na sal pa heh a hnophnak bawn malaw. Ani in na vumah zaikhai hnophnak bawn awng lo ai a bawnhnak hmuahhmuah heh nangmah caah hnempuihnak sawn i.

⁵ Goliath a rek laiah a nunhnak rin ruat loin a bawnhnak i ai Bawipa in Israel caah ral lianpui neh i. Ciami na hmu fangin na ang ngai i. Zaimanin a thiangmi David tu ziang thu khai um loin rek tum isi?” tiin ti i.

⁶ Jonathan thurelhnak tu Saul in ngai ai Bawipa hming sal in, “David tu rekhnak tuar maseh,” tiin thutiam i.

⁷ Ciamanin Jonathan in David heh ko ai a pa ponghnak hmuahhmuah khiah rel sio i. Cia hnuaah a pa hnenah fehpui ai David tu a hlan bangin kumpibawi ai naruaihtu ah cang leh i.

⁸ Israel le Filistin mite raltho lehthio i, David in tawng ai a roh ngai in neh manin Filistin mite tu a suk a so ah tlan tlang sio i.

⁹ Ni khat ah Bawipa ai hlathnak rauhla sia in Saul heh pom lala ai a inn songah Saul tu faipui awh in to i. David tu Saul caah congcing tum hnelhno i.

¹⁰ Cialak ah Saul in a faipui in khawh ai David tu dawk man teu manin a faipui heh bangkhang ah ling muk i. David tu tlan ai luat i.

¹¹ Saul in cia zan ah David inn cul tuhin le a thangha ah David rek tuhin mi hrekkhat hlat i. Ikhalselai a nupui Michal in, “Tun zan ah tlan hlahle sikhaw thangha fangin tu na thi tuh rori ihang,” tiin ralringhnak pe i.

¹² A nupui in dawngkham niu in sumpua ah hla teu ai David tu tlan ai luat i.

¹³ Cen a innsang milim lang ai amahte khuahluan vumah Michal in dah i. Mehmul ai bawnhnak lukhum a lu lamah dah ai pon in khuk i.

¹⁴ Cen Saul ai minungte David pom tuhin kawi fangin Michal in, David a cak lo i,” tiin ti i.

¹⁵ Ikhalselai Saul in, “Ning mit rori in sik ta tu ih. A khuahluan thawn heta ah zawng tu ilai rek tuh ing,” tiin ti ai a minungte hlat leh i.

¹⁶ David inn songah a lut tlang fangin khuahluan vumah innsang milim le a lulam ai mehmul ai bawnhnak lukhum khiah hmu i.

¹⁷ Ciafangin Saul in, “Zaimanin hetihin i zawl ai i ral luatruai isi?” tiin Michal heh ti i. Cen Michal in, “I luat tuhhnak i bawm tu. Ciahlahle na rek tuh ing, iti man i,” tiin ti i.

¹⁸ David tu tlan betbo ai Ramah khua ah Samuel hnenah hleng i. Saul in a vumai a bawnhnak hmuahhmuah heh Samuel hnenah rel i. Cia hnuaah David le Samuel tu Naioth ah feh ai ciata ah um kawm i.

¹⁹ David tu Ramah khua hiang Naioth khua ah um i, tiin Saul hnenah rel i.

²⁰ Ciamanin David pom tuhin Saul in mi hlat i. Naioth khua a hleng tlang fangin Samuel hohnak in prophette tu prophet pon in pong tlang ai phun tlang cam tlang lianglo heh hmu i. Ciafangin Saul ai minungte khai Pathian rauhla in pom ai phun tlang cam tlang murhmo ve i.

²¹ Cia thu Saul in a za fangin mi tam deuh hlat lala i. Ikhalselai anite khai ciatih thotho in um i. Vel thum tian mi hlat ai ciatih thotho in um tlang i.

²² Cia hnuaah amah Saul kumpibawi rori tho ai Ramah ah feh i. Seku tihnak tikhur lianpui ah hleng ai, ciata ah Samuel in David umhnak a zawt fangin Ramah hiang Naioth khua ah um i, tiin mi in rel i.

²³ Lampui ah a feh laitak ah Bawipa ai rauhla in Saul khai pom ve ai prophet pon in pong ai phun kong le cam kongin Naioth ah hleng i.

²⁴ Samuel mithmuh ah a hnikpon hawk sek ai phuncam dekdo i. Ciatihin kawngkolh in sunnivui le zankhuavar in um ai zau i. Ciamanin, “Saul khai prophet i ve im?” tiin pong santehhnak ah a canghnak i.