1 Samuel 14 - Zanniat Bible

Jonathan In Ralpha Bik In Tawng I

¹ Nikhat ah Jonathan in a ralthuam awhtu tlangval pa hnenah, “Filistin mite riahbuk ah feh kawm tuh ising,” tiin ti i. Cia thu heh Jonathan in a pa hnenah rel lo i.

² Saul tu Gibeah hiangniu Nigron khua ai tale kung lianpui hniaah zan cam i. A hnenah ralkapte zaruk um i.

³ Cen suangbawi kangbet angki a phurtu heh Ahitub ai fapa Ahijah i; Ahitub tu Ikhabod ai unau i ai Ikhabod tu Phinehas ai fapa i. Phinehas tu Shiloh khua Bawipa ai suangbawi Eli ai fapa i. Ciata ai a ummi ralkapte in Jonathan feh zo i ti khiah ling tlang lo i.

⁴ Filistin ralkapte riahbuk ah feh tuhin Jonathan ai hlun tuhhnak tlangkawn ai khat lam veve ah a zum roh lung lianpui pahnih um i. Lungto pakhat ai hming tu Bozez ti ai a dang pakhat tu Seneh ti i.

⁵ Bozez tu lampui sak lam, Mikmash lamah um ai, Seneh tu lampui hlang lam, Geba lamah um i.

⁶ Jonathan in tlangval pa hnenah, “Pathian sang lo Filistin ralkapte ai riahbuk ah feh kawm tuh ising. Pathian in kin bawm thai pang i. Kin bawm ngaingai lekhaw zaitlukin mi tlawmniu kin ita inkhai neh tuh thotho ising. Bawipa ai a kin bawmhnak tu aisu inkhai kham ben tuh lo i,” tiin ti i.

⁷ Tlangval pa in, “Na tumhnak bawn tu; na hnenah i thinlung veksen in ṭang ing,” tiin ti i.

⁸ Ciafangin Jonathan in, “Pha i! Feh kawm ngasing khaw kin hmu tu hrim seh.

⁹ ‘Kin iang rih tu ih, ning hnenah kawi tuh i ing,’ kin ti lekhaw heta in iang tuh ising.

¹⁰ ‘Kin hnenah kawi tu ih,’ kin ti lekhaw feh tuh ising; zaimantifangin ‘Kawi tu ih,’ kin ti lekhaw Pathian bawmhnak in neh tuh ising,” tiin ti i.

¹¹ Ciatihin Filistin mite hmu thai in lar hrim ai ciafangin Filistin mite in, “Sik tu ih, a relhhnak khukua songin Hebrew mi hrekkhat suak zo i,” tiin ti i.

¹² Cen Filistin ralkapte in Jonathan le a ralthuam phurtu tlangvalpa khiah, “Heta ah kawi tu ih. Thu ning rel tuh nai i ing,” tiin ti i. Ciafangin Jonathan in tlangval pa hnenah, “I hlun tu taito. Pathian in nehhnak kin pe zo ihang,” tiin ti i.

¹³ Jonathan tu bok vak in vak ai tlangval pa in hlun betbo i. Jonathan in Filistin mite heh tawng in vit dekdo ai tlangval pa in rek kong betbo i.

¹⁴ Hmasaber ai a rekhnak inn hmun tia dungah Jonathan le tlangval pa in Filistin mite kul dung rek kawm i.

¹⁵ Filistin mi hmuahhmuah in thinlau ngai ai ralviltu ralkapte le riahbuk ai a umtu ralkapte khai hlawng sio i. Lai tianin hlin ai Filistin mite tu a lau le hlawng in buai tlang murhmo i.

Filistin Mite Neh I

¹⁶ Benjamin ram, Gibeah khua ah Saul ai ralviltute in Filistin mite suk le so ah a tlan tlang murhmo a hmu fangin,

¹⁷ Saul in, “Ralkapte, siar dun tucuk ih; a khim lo um aw i sim!” tiin ti i. Siar dun tlang fangin Jonathan le a ralthuam phurtu tlangvalpa um kawm lo i ti khiah ling i.

¹⁸ Ciafangin Saul in suangbawi Ahijah hnenah, “Suangbawi kangbet angki heta ah koih tu,” tiin ruai i. Zaimantifangin Israel mite hmai ai suangbawi angki phurtu heh amah i.

¹⁹ Suangbawi Abijah hnenah Saul a pong thliahthlo laitak ah Filistin ralkapte tu a riahbuk ah buai tlang amam i. Ciamanin Saul in Abijah hnenah, “Na tlahsan com rih tu,” tiin ti i.

²⁰ Cen Saul le a ralkapte tu cammalak ah Filistin mi tawng tuhin feh tlang i. Filistin mite tu buai ze manin a minung khai ling dun nawn loin amahte lala rek dun thliahthlo i.

²¹ Filistin mite hnenai a ṭangtu Hebrew mite khai Saul le Jonathan hmu kawm fangin amahte hnenah let i.

²² Cen Epharaim tlangram ah tlan ai a relhtu Israel ralkapte khai Filistin mite sung i ti a za fangin Saul le Jonathan hnenah ṭang tlang leh ai Filistin mite khiah tawng tlang i.

²³ Cia nia ah Israel tu Bawipa in osuak ai Israel mite in Bethaven khua kan tianin hnawh tlang i.

Raltawng Hnua Thilcanghnak

²⁴ Saul in, “Kin ralte vumah phu kin zul hlanlo, tunnia ah aisu inkhai rong ai mah ih. Ai le i sikhaw ning sual tuh i,” tiin cukcam in thupe i. Ciamanin cia nia tu Israel mite rikam zeze ai helhep tlang sio i. Sunnivui zaikhai ai tlang lo i.

²⁵ Tupui song hleng tlang ai ciata ah khoitizu tampui um bial i.

²⁶ Tupui song tu khoitizu in dim napui Saul ai cukcamhnak lau manin aisu inkhai ai ngam lo i.

²⁷ Ikhalselai Jonathan in a pa ai cukcam thupeciahnak ling lo manin a awhhnak fung in khoihnar heh dawt ai khoitizu tlawmniu ai i. Ciatihin a rikam lawmcang deuh i.

²⁸ Ciami a hmu fangin ralkap pa pakhat in, “Aisu khai rong ai lo manin tha nai nawn lo i ing. Na pa in, ‘Tunnia ah rong a aitu heh cukcamhnak tuar tuseh,’ ti manin ai tlang lo i ing,” tiin rel i.

²⁹ Ciafangin Jonathan in, “Kin minungte vumah i pa in thil sual ngai bawn i. Sik hlah i sim, khoitizu i ai manin tha i tlung deuh rori i.

³⁰ Tunnia Filistin mite neh ai a suthnak rong hmuahhmuah heh lang in ai tlang selai zaitlukin amahte caah hnempui tuh i. Zaitlukin Filistin mite tampui rek ben tuh amam i, ruat hlah i sim,” tiin ti i.

³¹ Cia nia ah Israel mite in Filistin mite heh Mikmash in Aijalon tian nor tlang i. Israel mite tu rikam ze manin helhep tlang sio i.

³² Ciamanin ralte ai a suthnak tuu le kawlpawte a hmunah ro ai a sa tu a thisan thawn ai tlang dekdo i.

³³ Cen Saul hnenah, “Na ralkapte in a thisan thawn sa ai dekdo ai Bawipa hmaiah sual tlang zo ihang,” tiin mi in rel i. Ciafangin Saul in, “Kin miphun zuartu i si,” tiin hau i. Ciahlaiah, “Lungto lianpui heta ah leu tu ih,” ti i.

³⁴ “Mi zongzong hnenah feh tu ilai a kawlpaw le a tuute heta ah koih tuhin rel tu ih. Sa tu a thisan thawn ai tuh loin le Bawipa hmaiah sual lohnak tuhin amahte sumhnam heh heta ah ro tu selai ai tlang tuseh,” tiin ti i. Ciamanin cia zan ah amahte veksen in a kawlpaw koih ai ciata ah ro tlang i.

³⁵ Saul in puleng tiang ai Bawipa ca a hmasaber dawlhnak i.

³⁶ Saul in a ralkapte hnenah, “Feh ngasing khaw zan ah Filistin mite tawng tuh ising. Zing lam khuavar tian sim ngasing khaw rek tuh sek ising,” tiin ti i. “A pha ber na tihnak khiah bawn tu,” tiin ti tlang i. Ikhalselai suangbawi in, “Pathian zawt hmasa tuh ising,” tiin ti i.

³⁷ Ciamanin Saul in Pathian hnenah, “Filistin mite tawng nga ing maw? Tawng le ingkhaw neh nga ing maw? tiin zawt i. Ikhalselai cia nia tu Bawipa in sawn lo i.

³⁸ Ciafangin Saul in Israel konghoitute hnenah, “Kawi tucuk ih, tunnia ah ziang mawhhnak bawn tlang i si, si tu ih.

³⁹ A nungmi Bawipa, Israel otu hmingin thu ning kham ing: i fapa Jonathan rin mawh lekhaw rekhnak tuar tuseh,” tiin ti i. Midangte tu zaikhai pong tlang lo i.

⁴⁰ Cen Saul in, “Ning veksen in khia lamah ding ta tu ih. Kai le i fapa Jonathan tu heta ah ding kawm tuh i ing,” ti i. “Na daih bangin ituseh,” tiin mizapui in ti tlang i.

⁴¹ Ciafangin Saul in Bawipa, Israel ai Pathian hnenah, “Bawipa, zaimanin tunnia ah zaikhai i sawn lo isi? Bawipa, Israel ai Pathian, tunin Urim le Thummim in i sawn tu hram. Kaimah ai mawh, ihlahle Jonathan ai mawh lekhaw Urim in i sawn tu. Israel mizapui mawh lekhaw Thummim in i sawn tu,” tiin ti i. Urim in sawn manin Jonathan le Saul tu mimawh cang kawm ai Israel mite tu mawh lo ah cang tlang i.

⁴² Ciafangin Saul in, “Kaimah le i fapa Jonathan aisu sawn kin mawh i,” tiin a zawt lala fangin Jonathan vumah tlu i.

⁴³ Cen Saul in Jonathan khiah, “Ziang bawn sual isi?” tiin zawt i. Ciafangin Jonathan in, “Khoitizu tlawmniu ai ing. Thi kul lekhaw thi bang ngang,” tiin ti i.

⁴⁴ Saul in, “Nangmah na thi hlah lekhaw kaimah heh Pathian in i rek tuseh,” tiin cukcam i.

⁴⁵ Ikhalselai Israel mite in Saul hnenah, “Israel caah ral a nehtu Jonathan thi tuh im? Thi hrimhrim hlah! A lu vumai samfang pakhat khai laipua vumah tlok maseh, tiin a nungmi Bawipa hmingin thukham i ing. Tun nia ai a bawnhnak tu Bawipa bawmhnak in a bawnhnak i,” tiin ti tlang i. Ciatihin Israel mite in Jonathan heh thi loin hup ngah tlang i.

⁴⁶ Cia hnuaah Saul in Filistin mite khiah hnawh nawn loin let ai Filistin mite tu amahte ramah tlung tlang i.

Saul Ai Ukhnak Le A Innsang

⁴⁷ Saul tu Israel kumpibawi a cang hnuaah khuahacang ah raltawng i. Moab mite, Ammon mite, Edom mite tawng ai Filistin mite le Zobah kumpibawite khai tawng i. Ral a tawnghnak cangah nehtu ṭiode i.

⁴⁸ Ral pha bik in raltawng de ai Amalech mite khai neh i. Israel mite a simtute kut in hup ngah i.

⁴⁹ Saul ai fapate tu Jonathan, Ishvi le Malkhishua i. A fanu upa sawntu Merab i ai a nauta sawn tu Michal i.

⁵⁰ A nupui tu Ahimaaz ai fanu Ahinoam i. A ralkap uktu bawipa tu a pakhatta Ner ai fapa Abner i.

⁵¹ Saul ai pa Kish le Abner ai pa Ner tu Abiel ai fapate i.

⁵² Saul in a nun song hmuahhmuah a roh ngai in Filistin mite tawng i. Mithahat le miralpha a hmuhnak le a tawkhnak hmuah in a ralkap ah lang de i.