1 Samuel 13 - Zanniat Bible

Filistin Mite Tawng Tlang I

¹ Saul tu kumpibawi a cang fangin kum sawmthum khim ai kum sawmli le kum hnih song uk i.

² Saul in Israel mite songin minung thawng thum ril ai midangte tu amahte inn ah tlungruai i. Minung thawng hnih tu Bethel tlang ramai Miksmash tihnak hmun amah hnenah dah i. Cen a dang thawng khat tu Benjamin ram Gibeah khua, a fapa Jonathan hnenah dah i.

³ Geba khua ah Jonathan in Filistin ralbawipa rek ai cia thu heh Filistin mite in ling sio i. Ciafangin Saul in Hebrew mite ral tho tuh ko tuhin mi hlat ai amahte ram songah thirhlung tum in feh tlang diamdo i.

⁴ Filistin ralbawipa Saul in rek i tiin le Israel mite tu Filistin mite in nautat ngai i, tiin Israel mite hmuahhmuah hnenah rel tlang sio i. Ciamanin raltho tuhin a ko fangin Saul hnen Gilgal ah feh tlang i.

⁵ Israel mite tawng tuhin Filistin mite tu pumkhawm tlang diamdo ai raltawnghnak siphuhleng thawng sawmthum, siphuh to ralkap thawng ruk le tifingriat ai runsiat zah ralkap khawm tlang i. Bethaven in nisuah lamai a umhnak Mikmash ah feh ai ciata ah zancam tlang i.

⁶ Israel mite heh a roh ngai in tawng tlang i. Filistin mite hat deuh manin Israel mite tu vansang ai a hrek tu lungkhukua le khukua ah, a hrek tu lung ber le laipua kua songah le tikhur songah khai relh tlang i.

⁷ A hrek tu Jordan runpui ti tan tlang ai Gad le Gilead ram ahkhai hleng tlang i. Saul tu Gilgal ah um ai amah thawn a umtute tu a thinlau in hlawng tlang i.

⁸ Samuel in iang tuhin a cahhnak bangin ni sarih song Saul in iang i; ikhalselai Samuel tu Gilgal ah hleng nia rel lo i. Saul tu a minungte in zam betbo ihang.

⁹ Ciamanin anite hnenah Saul in, “Maitai hibawlhnak le rualrem hibawlhnakte koih tucuk ih,” ti i. A koih tlang fangin amah in hibawlhnak sel i.

¹⁰ A sel ben sawng fangin Samuel hleng i. Samuel a hleng sawng fangin Saul in a hmuak tuhin tho i.

¹¹ Cen Samuel in, “Ziang bawn isi?” tiin ti i. Ciafangin Saul in, “Hleng tuh ing, na ti can ah hleng lo ai i minungte in i zam amam ai hlaiah Filistin mite Mikmash ah khawm tlang diamdo fawn i.

¹² Cen Filistin mite in Gilgal ah kin tawng tuh i tiin um ai Pathian bawmhnak le ngen lai lo manin hibawlhnak sel lo fangin tu cang thil nawn lo i, tiin ruat le kaimah hlanlam in hibawlhnak sel ing,” tiin ti i.

¹³ Ciafangin Samuel in, “Na bawnhnak heh voithu i. Bawipa na Pathian ai thupeciahnak hlun lo isi. Hlun ta silai nangmah le na tesinfate tu Pathian in a kumzangza in Israel ning ukruai tuh napui i.

¹⁴ Ikhalselai tun tu na ukhnak heh rai tuh nawn lo i. Pathian in amah daihhnak minung si tuhai a minungte uktu tuhin bawn tuh i. Zaimantifangin Bawipa thu ngai lo isi,” tiin ti i.

¹⁵ Samuel tu Gilgal in feh i. Midang hmuahhmuah in Saul hlun tlang ai a ralkapte hnenah Saul le a misenpui feh tlang i. Gilgal in Benjamin ramai umhnak Gibeah ah feh tlang i. Saul in a ralkapte tu khawm ai zaruk khim i.

¹⁶ Saul le a fapa Jonathan le a ralkapte tu Benjamin ramsong Geba khua ah zancam tlang i. Filistin mite tu Makmash ah zancam tlang i.

¹⁷ Filistin ralkapte tu raltawng tuhin feh fangin bur thum in khan tlang i. Bur khat tu Shual ram Ophrah khua lamah feh tlang i.

¹⁸ Bur hnihhnak tu Beth Horon khua lamah feh tlang ai, bur thumhnak tu Zeboiim phairawn in khat lam ral hampalak lamah feh tlang i.

¹⁹ Cia san laiah Israel ram songah pumsu pakhat khai um lo i; zaimantifangin Filistin mite in vang le faite bawn tuh loin Hebrew mite heh kham i.

²⁰ Ciamanin Israel mite tu tuhmui, taruang, haihpui le tongmungte sandir in pumsu ruai tuhin Filistin mite hnenah fehpui de i.

²¹ Pumsu man tu haihpui le tongmung hrangah ngun tangka tamat i ai tuhmui le taruang tu ngamu i.

²² Ciamanin ral a tawng fangin Israel mite songah Saul le a fapa Jonathan siarlo, aisu khai fai le vang a awhtu um lo i.

²³ Cen Mikmash lampui kiltu tuhin Filistin mite in ralkap bur khat hlat i.