1 Samuel 11 - Zanniat Bible

Saul In Ammon Mite Neh I

¹ Hlakhat dung a rai fangin Ammon kumpibawi Nahash tu Gilead ram songai umhnak Jabesh khua tawng tuhin feh i. Nahash ai ralkapte in Jabesh khua kulh tlang sio i. Ciamanin Jabesh khuasong mite in Nahash hnenah, “Lungkhimhnak laikhen bawn tlang ngasing khaw kin uktu ah na hmang tuh i ing,” tiin ti tlang i.

² Ciafangin Nahash in, “Ning kiahhan lam mit ṭen ning phorh sek ai Israel miphun vumah zakthihnak i hlengruai hnua lek ah ningmah thawn lungkhimhnak laikhen bawn tuh ing,” tiin ti i.

³ Ciafangin Jabesh khua upate in, “Israel ram song hmuahhmuah ah mi hlat tuhin ni sarih song can kin pe tu hram. Aisu inkhai kin bawm tuh lo ilekhaw na hnenah lut tlang tuh i ing,” tiin ti tlang i.

⁴ A hlathnak palaite tu Saul umhnak khua Gibeah ah hleng tlang ai a thula a rel tlang fangin khuasong mite tu a lungsia in kap tlang murhmo i.

⁵ Cialak ah Saul tu a lo an a kawlpawte thawn tlung i. Cen Saul in, “Ziang thupoi um i? Zaimanin mi zongzong in kap tlang murhmo ipa? tiin zawt i. Jabesh khua ai hlathnak palaite in thusia khiah rel tlang i.

⁶ Ciami thu heh Saul in a za fangin Pathian ai rauhla in pom ai a thin tu mai bangin ko i.

⁷ Kawlpawcang lu hnih ro ai a sate cip sek in a cem hnuaah Israel ram song hmuahhmuah ah fehpui tuhin mi hlat ai, “Raltawnghnak ah Saul le Samuel a hlun lotu pa ai kawlpawcang khiah hetih bangin cem tuh sek i,” tiin thucah sio i. Bawipa in akontih in kin bawn ni, tiin Israel mite in lau ai amahte veksen in thinlung khat in suakkhawm tlang i.

⁸ Saul in Bezek ah hoikhawm ai Israel mite ting thum khim tlang ai, Judah mi thawng sawmthum khim i.

⁹ Jabesh khua an a hlathnak palaite hnenah, “Ning khua mite rel tu ih; thangha sun hlanah osuak tuh i,” tiin ti i. Ciami thu a za fangin Jabesh khua mite tu ang ngai i.

¹⁰ Cen Nahash hnenah, “Thangha tu na hnenah lut tlang tuhai na nuam bangin kin bawn bang menma nga hang si,” tiin ti tlang i.

¹¹ A thangha fangin Saul in a ralkapte tu bur thum in khan ai zing khuahma niu in a ralte heh tawng tlang dekdo i. Sun a khim fangin Ammon mite heh rek ben sio i. A luatmi hnihkhat tepawl tu piak tlang sek ai a dang ṭen ah tlan tlang sek i.

¹² Cen Israel mite in Samuel hnenah, “Saul kumpibawi cang maseh, a titu aisu i? Kin hnenah kin pe tulai rek tuh sek i ing,” tiin ti tlang i.

¹³ Ikhalselai Saul in, “Tunnia ah aisu khai rek tuh lo i si, zaimantifangin tunnia tu Bawipa in Israel a osuak nia i,” tiin ti i.

¹⁴ Cen Samuel in, “Kin veksen in Gilgal ah feh tuhai Saul heh kin kumpibawi i tiin khoruai leh ngasing,” ti i.

¹⁵ Ciamanin amahte veksen in Gilgal ah feh ai ciata hmun Bawipa ai hmaiah Saul heh kumpibawi in khoruai i. Rualrem hibawlhnak khai Bawipa hnenah sel tlang ai Saul le Israel mite tu ang ngai in puai bawn tlang i.