1 Samuel 1 - Zanniat Bible

Siloh Ai Elkanah Le A Innsang

¹ Epharaim tihnak tlang vum ramah Ramah tihnak khua um ai cia khua ah Epharaim miphun songin Elkanah tihnak mipa pakhat um i. Ani tu Zuph miphun Tohu ai nam Elihu ai fa Jeroham ai fapa i.

² Elkanah in nupuite pahnih nai ai Hannah le Peninnah i. Peninnah in fa nai ai, Hannah in fa pakhat khai nai lo i.

³ Cen Elkanah tu a khua an Shiloh khua ah kum siar in Cungnungber Bawipa bia tuhin le hibawlhnak sel tuhin feh de i. Shiloh khua ah Bawipa ai suangbawi tu Eli ai fapate pahnih Hophni le Phinehas i.

⁴ Cen Elkanah in Bawipa hnenah hibawlhnak a sel fangin a nupui Peninnah le a fate hnenah amahte covo ṭen pe i.

⁵ Ikhalselai a nupui Hannah tu it ngai napui a covo pakhat lek pe i, zaimantifangin Bawipa in fate pe lo manin i.

⁶ Ciatihin fa nai lo manin a huatu Peninnah in Hannah heh zohsuam de ai zakthiruai de i.

⁷ Ciatihin kum khat hnua kum khat thu um ciahco de i. Bawipa ai inn ah feh tlang fangin Peninnah in Hannah heh a lungsiaruai de ai Hannah tu rong khai ai zuam loin kap de i.

⁸ Ciafangin a pasal Elkanah in, “Hannah zaimanin kap ai rong ai lo isi? Zaimanin lungsia in um de isi? Nangmah ca kaimah heh fapate pahra tahin i songlawi sawn lo im?” ti i.

Hannah Le Eli

^9-10 Vaikhat tu Shiloh khua ah rong ai ben fangin Hannah tu tho ai a thinhar ze manin Bawipa hnenah kap kongin sawngen i. Suangbawi Eli tu Bawipa biakinn dawngkham hiangai tohkham vumah to i.

¹¹ Ciafangin Hannah tu sawngen ai, “Aw Bawipa, Cungnungber Pathian, kai na sal nu tu i hmu tu law. I rimsuhnak tu i ling sah in i hih tu hram. I hai lio malaw. Fapaniu i pe lesikhaw a nun song hmuahhmuah nangmah caah na pe tuhai a sam khai met tuh lo i, tiin thu na kham ing,” tiin ti i.

¹² Hannah tu Bawipa hnenah a rai ngai sawngen ai Hannah kahmur heh Eli in sik ngio i.

¹³ Dapniu in sawngen manin a hmur tu mer ziapzo napui a aw tu suak lo i. Ciatihin a um heh zu ri i tiin Eli in a ruat manin,

¹⁴ Hannah hnenah, “Zu ri in mualpho in um nawn mah. Feh tulai fim tuhang,” tiin ti i.

¹⁵ Ciafangin Hannah in, “I lo i, bawipa, zu i ri lo i. Zu hrimhrim ding lo ing, cabitti khai ding lo ing. I thinhar ze manin Bawipa hnenah i vansanghnak bung sek ing.

¹⁶ Nupang lovang i tiin i ruat malaw. I thinpit ai i vansang ze manin hetihin sawngen ing,” tiin ti i.

¹⁷ Ciafangin Eli in, “Thin muang niu in feh tulai Israel ai Pathian in a hnenai na ngenhnak heh na pe tuseh,” tiin ti i.

¹⁸ Cen Hannah in, “I vumah ninghiohnak thinlung nai tu law,” tiin ti ai feh i. Cia hnuaah rong tlawmniu ai ai a lung khai sia nawn lo i.

Samuel Tehnak Le Aphnak

¹⁹ A thangha fangin Elkanah le a innsangte tu tho tlang ai Bawipa Pathian bia tlang i. Cia hnuaah Ramah khua amahte inn ah tlung tlang i. Cen Elkanah le a nupui Hannah tu pawl dun ai Hannah ai sawngenhnak khiah Bawipa in ling sah i.

²⁰ Ciatihin Hannah in naupai ai fapa in nai i. A fapa tu Samuel tiin a hming bawn i, zaimantifangin, “Bawipa hnenah i ngenhnak i,” tiin ti i.

²¹ Cen Elkanah le a innsangte tu kumsiar amahte selhnak de hibawlhnak le thukhamhnak bangin a tumce in hibawlhnak Bawipa hnenah sel tuhin Shiloh khua ah feh tlang lala i.

²² Ikhalselai Hannah tu feh lo i. A pasal hnenah, “I fapa hnawihlat sawng fangin Bawipa inn ah fehpui tuhai ciata ah a nun song hmuahhmuah um tuh i,” tiin ti i.

²³ Ciafangin Elkanah in, “A pha ber na tihnak bawn tulai nau hnawi na hlat hlan tu inn ah um tu hlen. Cen Bawipa in na thukhamhnak heh khimruai tuseh,” tiin ti i. Ciatihin Hannah tu inn ah um ai a fapa heh phatak ngai in sik i.

²⁴ Hnawi a hlat fangin a nu in Samuel heh Shiloh ah fehpui ai kumthum khim kawlpawcang lu khat, sangvut han khat le cabitti thawl khat khai keng i. Naupangniu napui Samuel tu a nu in Shiloh khua Bawipa ai inn ah fehpui i.

²⁵ Kawlpawcang ro tlang ai Samuel tu Eli hnenah fehpui i.

²⁶ Ciafangin Hannah in, “Bawipa, i hai zo isim? Heta ah ding in Bawipa hnenah saw a ngentu nupang nu khiah kaimah ing.

²⁷ Bawipa hnenah fapaniu ngen ai tunin i ngenhnak i pe zo i.

²⁸ Ciamanin amah khiah Bawipa hnenah pe ing. A nun song hmuahhmuah ani tu Bawipa ai tuh ihang,” tiin ti i. Cen Bawipa khiah ciata ah bia tlang i.