1 Korin 8 - Zanniat Bible

Milim Hnenah Selhnak Rong

¹ Milim hnenai selhnak rong thula lai ning kuathnak ah: aisusu inkhai, “Kin lingciahnak i,” tihnak bangin ling tlang ṭen peu ngai ising. Ikhalselai ciabang linghnak in mi hngalruai ai ithnak cenin mi tungding i.

² Ling ve ing, a titu hmuahhmuah in a ling tuhhnak zah in ling awng lo i.

³ Ikhalselai Pathian a ittu heh Pathian in ling i.

⁴ Milim hnenai selhnak rong ai le ai lo thu ah hetihin ruat ing: milim tihnak tu a um taktak lomi thil pakhat aiawh in dahhnak i; cen Pathian tu pakhat lek um i, ti ling ing.

⁵ Van ah ituseh laivum ah ituseh, cen “khuavang” tampui le “Bawi” tampui khai um napui khaw,

⁶ kin caah zaizongza semsuahtu le kin nungsanhnak Pa Pathian pakhat ian um i; cen Bawipa pakhat Jesuh Khrih ian um ai Amah manin zaizongza semsuah i ai Amah manin a nungmi ising.

⁷ Ikhalselai he thudik heh mi zongzong in ling lo i. Mi pakhat heh milim thawn a ciah dun ze manin tunnia tian ah milim hnenai selhnak rong ai fangin cia rong heh milim ai i, tiin sang tlang lai i. Amahte ai hnawm le pha thiathiamhnak thinlung heh a niar lai manin ciami ti le rong in kin rimruai i tiin ruat tlang i.

⁸ Aih le din in Pathian thawn kin pehzomdunhnak heh pharuai cuang tuh peu lo i. Ai lo inkhai kin sunghnak um cuanglo i; Kin ai inkhai kin hlawkhnak um cuanglo i.

⁹ Ikhalselai ralring tu ih: miluat ning ihnak heh sanghnak lamai a niar pawl sualhnak songah bahhnak ah cangruai mah ih.

¹⁰ Linghnak a naitu ningte in milim biahnak hmunai rong ning ai khiah hnawm le pha thiathiamhnak a niar lai mite in ning hmu tibang singlai, ciami pa tu milim hnenai selhnak rong ai poi lo i, tiin a forhtu ah cang tuh ilo im?

¹¹ Ciatihin ciami na linghnak in sanghnak ai a niar laimi, Khrih ai a nunhnak a pe sanhnak na unau pairalruai tuh i si!

¹² Ciatihin a niar lai mite ai a hnawm le a pha thiathiamhnak ning hnawmruai manin le Khristian unau vumai ning sual manin Khrih vumah sualhnak bawn i si.

¹³ Ciatih imanin rong i aihnak in i unau sualruai lengkhaw ciami i unau heh sualhnak songah i tloktiar lohnak tuhin zaikom inkhai ciabang rong heh ai tuh nawn lo ing.