1 Korin 16 - Zanniat Bible

Sangtute Caah Thawhhlawm

¹ Judea ramai a ummi Pathian sangtute caah paisa bur tuh thu lai ning nganhnak ah: Galati pawlpuite hnenai thu i cahhnak bangin bawn tu ih.

² Nipui nia cang fangin ning ngahhnak a tam le a tlawm songin paisa suah tlang tu ṭen ilai khawl cia tu ih; ciatihin i hleng fangin paisa bur kul tuh nawn lo i.

³ I hleng hnuaah ning rilhnakte kut ah lai ken tuhai ciatihin Jerusalem ah ning lehsawng heh phur tuh i.

⁴ I feh man um tuh lekhaw feh tlang leh tuh ising.

Paul Ai Tumtekhnak

⁵ Macedonia ramsong feh kong tuh manin, ciatih ai i feh hnuaah ning hnenah hleng leh tuh ing.

⁶ Ning hnenah can cateng dung hmang tuh ing; khuasik cu song hmuahhmuah khai i thai pang i; cia hnuaah khual i tlawng tuhhnak heh a konteng lam ita inkhai i ngaisung bawm leh tu ih.

⁷ Tlawng menma ilo in, Bawipa ai khuakhanhnak lekhaw, ning hnenah can tawkfang hmang i hiam i.

⁸ Hemi Ephesa khua ah Pentecost nia tian um tuh ing.

⁹ Engsantu tampui um napui heta ah a phahnemhnak naper um i.

¹⁰ Ning hnenah Timothy hleng lekhaw lauhnak nai tuh loin sik tu ih, zaimantifangin ani khai kaimah bangin Pathian caah napertu i.

¹¹ Aisu inkhai nautat mah ih; muang niu in i hnenah a hlengthilhnak tuhin a khualtlawnhnak ah bawm tu ih. Heta ah a hleng tuh heh sangtu unaute thawn umlam tlang ngai i ing.

¹² Kin unau Apollos ai thu ah, unau dangte thawn ning hnen tlawng tuhin forh dekdo de napui tunah kawi tuh tu a lungkhim lai lo i. A remcang deuh fangin kawi leh tuh i.

Thu Tawphnak

¹³ Fimkhur bik in um tu ih, ning sanghnak songah kho ngai in ding tu ih; ralpha le hat ngai in um tu ih.

¹⁴ Thil ning bawnhnak hmuahhmuah heh ithnak thawn bawn tu ih.

¹⁵ Stephanas le a innsangte tu ning linghnak i. Amahte khiah Achaia peng songah Khristian hmasaber pawl i ai Pathian ai minungte caah amahte thinlung le thazang veksen in pe i. U le naute,

¹⁶ anite ituseh, a naperpuite ituseh, mi a konghoi dan khiah hlun tu hram ih tiin ning forh ing.

¹⁷ Stephanas, Fortunatas le Achaicus hleng tlang manin i ang i; ning um lo khai ling hang lo ing.

¹⁸ Thin ning nuamruai bangin kai khai thin i nuamruai ve i. Hebang mi heh thangphat tlak i.

¹⁹ Asia ramai pawlpuite in hnuk ning sat tlang i; Aquila, Prisilla le amahte inn ai a khawmtu pawlpui in Khristian ithnak thawn hnuk ning sat ing.

²⁰ Heta ai unaute in hnuk ning sat tlang i. Pakhat le pakhat thuthnak cianghlim thawn hnuksatdun tu ih.

²¹ Hetihin Kaimah Paul in hnuk ning sat ing tihnak i kut rori in ngan ing.

²² Aisu khai Bawipa a it lotu heh a vumah cukcamhnak hleng tuseh. Maranatha: kin Bawipa, kawi tuhang.

²³ Bawi Jesuh ai ninghiohnak heh ning hnenah um tu hram seh.

²⁴ Khrih Jesuh thawmin i ithnak heh ning vumah um tuseh. Amen.