1 Korin 10 - Zanniat Bible

Milim Ralring Kul I

¹ U le naute, Moses a hluntu kin pupate hnenah ziang hleng awng i cang ta, ti khiah hih tu ngio ih, ti ning daih sah ing. Anite tu mairo in hup ai amahte veksen in Tipui San tansuak tlang i.

² Moses hluntute imanin mairo song le tipui songah baptisma lang in um tlang i.

³ Amahte veksen in rauhla rong phunkhat ai tlang ai,

⁴ amahte veksen in rauhla ti phunkhat ding tlang i. Amahte hnenah a teltu ṭio rauhla lungpui in ti ding tlang ai ciami lungpui tu Khrih i.

⁵ Ikhalselai mi tamsawn in Pathian lungawiruai lo manin amahte luang khiah nelrawn ah piakruai sek i.

⁶ Hemi hmuahhmuah heh kin caah santehhnak i: Anite bangin thil sual daih in um tuh ve loin le,

⁷ mi hrekkhat in milim bia bang ai bia tuh ve loin ralringhnak kin petu i. Lai Thianghlim in, “Ciami minungte tu zu le sa thawn lamai nunnuam tlang miahmo i,” ti i.

⁸ Mi hrekkhat in nupa sualhnak a bawn bangin bawn tuh ve lo ising; ciatihin anite bawn manin ni khat songah minung thawng kul hluanthum thi awng bang ta!

⁹ Mi hrekkhat in Bawipa cu tlang bangin kin inkhai cu tuh ve lo ising; ciatihin anite in ti manin rul in cik ai thi tlang i.

¹⁰ Mi hrekkhat in phuncam tlang miahmo bangin kin inkhai phuncam tuh ve lo ising; ciatihin anite cam manin hnawmcantu vancungmi in hnawmcan sek i.

¹¹ Hetih bangin amahte vumah thil a hleng awnghnak heh midang in santeh tuhin le ralring tuhin a nganhnak i. Zaimantifangin san hnuataber ah um zo ising.

¹² Mi pakhatkhat in kho ngai in ding ing tiin ruat dun lekhaw tlu tuh loin ralring tuseh.

¹³ Cuhnak ning tawk heh midang hnen ahkhai a hlenghnak sualsawmhnak bang pah i. Ikhalselai Pathian in a thukhamhnak khimruai ai ning tuar ben tuh lo tianin cuhnak hlengruai tuh lo i. Cuhnak ning tawk fangin ning tuar benhnak tuhin thazang ning pe tuhai ciatihin ning luathnak tuhin lampui ning sel sah tuh i.

¹⁴ Ciamanin ithnak rualpuite, milim biahnak pial tu ih.

¹⁵ Thuruat thiam ning imanin ning hnenah hetihin rel ing. I relhnak heh ningmah hlanlam thia thiam tu ih.

¹⁶ Bawipa ai zanfak ai ai kin hmanghnak anghnak khuat hrangah saw i ngen fangin Khrih thisan kawm dun tlang ilo ising maw? Cen sang kin khan fangin Khrih ai ruangpui kawm tlang ilo ising maw?

¹⁷ Sang hlomkhat manin kin veksen in mi tampui inapui singkhaw pumkhat ising, zaimantifangin sang hlomkhat a kawm tlang mite ising.

¹⁸ Israel mite thu khiah ruat tucuk ih: hibawlhnak ai sa a aitu hmuah heh Pathian hnenah puleng vumai a seltute thawn a kawm tlang ve i tihnak ilo im?

¹⁹ Ciatih ai i tifangin milim hnenai selhnak rong ituseh, sullam nai ve i tihnak i aw im?

²⁰ I hrimhrim lo i! I rel nuamhnak tu: sakhua mite puleng vumah hibawlhnak heh Pathian hnenah sel tlang lo i, Khuavang hnenah selhnak i, tihnak i. Cen khuavang thawn rualpui ning cang tuh i daih lo i.

²¹ Bawipa ai khuat le khuavang ai khuat heh ding tlang mah ih. Bawipa cabuai le khuavang cabuai khai hmang tlang mah ih.

²² Bawipa in kin umhlah tuseh tiin tok tuh hrim ising maw? Amah tahin kin hat sawn i tiin ruat dun ising maw?

²³ Mi in, “Zaizongza bawn thil ising,” ti tlang i. I, bawn thil i; ikhalselai zaizongza heh pha sio lo i. “Zaizongza heh bawn thil ising,” ikhalselai zaizongza heh bawmtu i sio lo i.

²⁴ Aisu inkhai mah hnempuihnak lek ruat tuhhnak ilo i; midang hnempuihnak ruat sah tuhhnak i.

²⁵ Sakhung ai zuarhnak tu zaikhai ai thil i; thin i nuam lo i, tiin a thu zawt mah.

²⁶ Zaimantifangin Lai Thianghlim in, “Laivum le a songai a ummi hmuahhmuah heh Bawipa ai i,” tiin ti i.

²⁷ Pathian sang lotute in rong ai ning sawm ai ning feh fangin ning hmaiah dahhnak rong heh ai tu ih; a hnawm a pha thiahnak thinlung manin thu zawt mah.

²⁸ Ikhalselai mi pakhat in, “Hemi rong heh khuasia hnenah selhnak nakhaw,” ning ti lekhaw ning titu zawnruat in le hnawm le pha thiahnak thinlung manin ai loin um tu sawn.

²⁹ A hnawm le pha thiahnak i tifangin ningmah ai thinlung ilo i; midang thinlung i ti nuamhnak i. Mihrekkhat in, “Ciatih ilekhaw zaimanin midang ai thinlung ruathnak in i luathnak heh hnaihnok tuh hnelhno i?

³⁰ Pathian hnenah anghnak rel hnuaah rong i aihnak manin zaimanin mi in i relsia nuam hnelhno i?” ti i.

³¹ Ciamanin ning ai fangin ituseh, ning ding fangin ituseh, zai thil ning bawnhnak cangcang ah Pathian songlawihnak hrangah bawn tu ih.

³² Fel ngai in nung tu ilai Judah mi hnenah le Gentile mite hnenah ituseh, Pathian Pawlpui hnen ahkhai ituseh, buaihnak suakruai mah ih.

³³ I bawn bangin bawn tu ṭen ih. Kaimah caah hnempuihnak ruat loin mizapui hnempuihnak ruat ai nunohnak ngah thil tuhin mi zongzong anghnak bawn zuam ing.