1 Johan 5 - Zanniat Bible

Lailung Nehtu Ising

¹ Aisu khai Jesuh tu Messiah i ti a sangtu heh Pathian ai fa i. Cen aisu khai ituseh amahte pa a ittu in a fate khai it i.

² Pathian fate it ising ti kin linghnak heh kin in amah Pathian it ai a thupehnak hlunhnak in i.

³ Zaimantifangin Pathian it ising ti khiah a thupehnak hlun ising tihnak i. A thupehnak tu kin caah hlun har ilo i,

⁴ zaimantifangin Pathian fate hmuah in laivum heh neh thil i. Cen kin sanghnak thawmin kin tu sakhua nehtu ising.

⁵ Laivum a nehtu heh aisu i? Jesuh tu Pathian ai Fapa i tiin a sangtute hmuah heh sakhua nehtute i.

Jesuh Khrih Thu Lingtu

⁶ Ti le thisan thawn a hlengtu heh Jesuh Khrih i. Ti thawn lek hleng lo i, ti le thisan ceem in hleng i. Hetih ai a hlenghnak heh a dikmi i tiin Rauhla rori in lingpui i, zaimantifangin Rauhla tu thutak i.

⁷ Lingpuitute pathum um i;

⁸ Rauhla le ti le thisan i ai a pathum in a lingpuihnak bang dun tlang i.

⁹ Minung ai lingpuihnak sang tlang ising; cen Pathian ai lingpuihnak tu thupui amam ai a Fapa thu a lingpuihnak tu amah rori in larruai zo i.

¹⁰ Ciamanin aisu khai Pathian ai fapa a sangtu in a thinlung songah linghnak nai i; ikhalselai Pathian a sang lotu in, Pa in a Fapa thu a relhnak sang lo manin, Pathian heh thudonrel ah cangruai i.

¹¹ Ciatih ai a lingruaihnak tu hetihin i: Pathian in kumkhua nunhnak kin pe ai ciami nunhnak tu a Fapa songah um i.

¹² Aisu khai a Fapa a naitu in nunhnak nai i; Pathian ai Fapa a nai lotu in nunhnak nai lo i.

Kumkhua Nunhnak

¹³ Pathian ai Fapa a sangtute in kumkhua nunhnak nai ising, ti ning linghnak tuhin he laikuat heh ning hnenah ngan ing.

¹⁴ Kin tu Pathian hmaiah ralphahnak nai ising, zaimantifangin amah ai daihhnak thawn deng in ngen lesingkhaw kin ngenhnak kin za sah sio i ti khiah fiang ngai in ling ising.

¹⁵ Amah kin ngen cang fangin kin ngai sah i; cen kin ngai sah i ti ling manin kin ngenhnak hmuahhmuah kin pe i, ti khai ling ising.

¹⁶ Ning unau pakhatkhat thihpuitlak ilomi sualhnak a bawn hmu lesikhaw Pathian hnenah sawnget tulai Pathian in luathnak pe tuh i. Hemi tu thihpuitlak sualhnak a bawn lotute caah i. Ikhalselai thihpuitlak sualhnak um ai ciami a bawntute caah Pathian hnenah sawnget tu ih ning ti lo ing.

¹⁷ Thil bawn sualhnak hmuahhmuah sualhnak i, ikhalselai sualhnak hmuahhmuah heh thihpuitlak sualhnak ilo i.

¹⁸ Pathian ai fate in sualhnak bawn betbo in nung nawn lo i ti ling i si, zaimantifangin Pathian ai Fapa in hup ai Satan in siatsuah thil lo i.

¹⁹ Laivum pumpuhluk tu Satan kuthnia ah um i; ikhalselai kin tu Pathian ai ising ti ling ising.

²⁰ Pathian ai fapa tu hleng zo ai lingthiamhnak kin pe manin Pathian taktak ling ising, ti kin fiang i. A Fapa Jesuh Khrih thawn pehzomhnak kin nai manin a dikmi Pathian thawn pehzomhnak nai thil ising. Amah tu a dikmi i ai kumkhua nunhnak khai i.

²¹ I fate, milimte khiah pial tu ih.