1 Johan 4 - Zanniat Bible

Rauhla Dik Le Dik Lo

¹ I ithnakte, Rauhla nai ing a titute hmuah sang mah ih. Amahte naihnak rauhla heh Pathian hnenin a hlenghnak i maw ilo tiin cu hmasa tu ih. Zaimantifangin prophet dik lote khuahacang ah hleng tlang zo i.

² Pathian Rauhla i le ilo hetihin ling thil tuh i si: aisu khai Jesuh Khrih tu minung in hleng i tiin a phuangtu heh Pathian hnenai hlenghnak rauhla naitute i.

³ Ikhalselai aisu khai ciatihin a phuang nuam lotute tu Pathian hnenin a hlenghnak Rauhla nai lotu i. A naihnak rauhla tu Khrih ai ral hnenin a hlenghnak i. Khrih ai ral tu hleng tuh i tiin ningmah in za zo ai tun heh laivum ah hleng zo i.

⁴ Ikhalselai i fate, ning tu Pathian ai fate i si; prophet dik lo pawl khai neh zo i si, zaimantifangin ning songai a ummi Rauhla tu laivum mite songai rauhla tahin hat sawn i.

⁵ Prophet dik lo pawl in laivum thula rel tlang ai laivum mi te in amahte thu ngai tlang i, zaimantifangin sakhua ai naihnakte i.

⁶ Ikhalselai kin tu Pathian ai ising. Pathian a lingtute hmuah in kin thu ngai tlang i; Pathian ai lote in kin thu ngai tlang lo i. Ciatihin rauhla dik le dik lo kin thiathiamhnak i.

Pathian Tu Ithnak I

⁷ I ithnakte, Pakhat le pakhat it dun ngasing, zaimantifangin ithnak tu Pathian hnenin hlenghnak i. Mi a ittu heh Pathian fa i ai Pathian lingtu i.

⁸ Mi a it lotu heh Pathian ling lo i, zaimantifangin Pathian tu ithnak i.

⁹ Pathian ai kin ithnak tu a Fapa naihsun heh laivum ah hlat in larruai ai amah thawmin nunhnak kin co thil tuhin i.

¹⁰ Ithnak kin tihnak tu hetihin i: Kinmah in Pathian it ising tihnak ilo i, amah sawn in kin it ai a Fapa hlat i; ciami tu kin sualhlat hibawlhnak tuhin i.

¹¹ I ithnakte, he bangin Pathian in kin it lekhaw kinmah khai pakhat le pakhat it dun tuh ve ising.

¹² Aisu inkhai Pathian tu mit in hmu awng lo i, ikhalselai pakhat le pakhat it dun lesingkhaw Pathian tu kin songah nung ai a ithnak heh kin songah a semkhim i.

¹³ A Rauhla kin hnenah kin pe zo manin Pathian tu kin songah um ai kin khai a songah um ising, ti fiang niu in ling ising.

¹⁴ Pa in a fapa heh laivum nunotu tuhin hlat i, ti a hmutu le a reltu heh kinmah ising.

¹⁵ Aisu inkhai Jesuh tu Pathian ai Fapa i ti a phuangtu heh Pathian songah um ai Pathian khai a songah um ve i.

¹⁶ Cen kinmah rori in Pathian ai kin ithnak heh ling ai sang tlang ising. Pathian tu ithnak i, cen ithnak thawn a nungmi hmuahhmuah heh Pathian songah a nungmi i ai Pathian khai a songah nung ve i.

¹⁷ Thukhanhnak Nia ah ralphahnak kin nai thil tuhin ithnak tu kin songah khimruai zo i. Cen laivum ah kin nunhnak heh Khrih nunhnak bang imanin ciami ralphahnak heh nai tuh rori ising.

¹⁸ Ithnak songah thinlauhnak um lo i, a semkhimmi ithnak in thinlauhnak pairuai sek i. Ciamanin thinlauhnak a naimi songah ithnak tu a semkhim lai lo i, zaimantifangin thinlauhnak tu cawhhnak thawn pehzom i.

¹⁹ Pathian kin ithnak heh amah in kin it hmasa manin i.

²⁰ Aisu khai Pathian it ing tikong in a unau a huatu heh thudonrel i. Zaimantifangin a mit in a hmuhnak a unau rin it hlah lekhaw a hmu lohnak Pathian tu it thil tuh hrimhrim lo i.

²¹ Khrih ai kin pehnak thukham tu hetihin i: aisu khai Pathian a ittu in a unau khai it tuh ve i.