1 Johan 3 - Zanniat Bible

Pathian Ai Fate

¹ Pathian kin Pa in kin it zia heh ruat tu ih! A ithnak a thawmlian manin Pathian ai fate tiin kin ko heh; ciatih ai kin tihnak bangin i peupeu ising. Ciamanin i he laivum in kin ling lohnak heh! Pathian khai ling lo i.

² I ithnakte, tun tu Pathian ai fate ihang sing, inapui zaibang i tuhlai ti fiang lai lo i. Ikhalselai Khrih a hleng fangin amah bang i tuh ising ti ling ising; zaimantifangin amah ihnak bang cekci in hmu tuh ising.

³ Aisu khai Khrih songah hebang umlamhnak a naitu heh Khrih a thianghlim bangin amahte veve thianghlimruai ve i.

⁴ Aisu khai a sualtu heh Pathian ai dan baltu i, zaimantifangin sual tihnak tu dan balhnak i.

⁵ Khrih tu minung sualhnak ṭawlciang tuhin hleng i ti ling i si, a songah zai sualhnak khai um lo i.

⁶ Ciamanin Khrih songai a umtute hmuah in sualhnak bawn betbo lo i. Sualhnak a bawntu ṭio heh Khrih a hmu awng lo le a ling awng lo mite i.

⁷ I fate, aisu inkhai ning zawl maseh. Khrih tu midikcang a i bangin aisu khai dikcanghnak a bawntute hmuah in midikcang ve i.

⁸ Aisu khai sualhnak a bawntu ṭio heh Satan ai i, zaimantifangin a hampan in sual bawntu i. Pathian ai Fapa a larhnak heh Satan naperhnak hnawmcan tuh sek rori ah i.

⁹ Pathian fate aisu khai sualhnak bawn hnelhno nawn lo i, zaimantifangin Pathian nun zia heh cimu bangin a songah um i. Cen Pathian tu a Pa imanin sual in nung nawn lo i.

¹⁰ Pathian ai fate le Satan ai fate dangdunhnak ber tu hetihin i: a dikmi a bawn lotu le a unau a it lotu heh Pathian ai fate ilo i.

Pakhat Le Pakhat It dun Tu Ih

¹¹ A hampan ai ning lingciahnak thuthang heh pakhat le pakhat it dun tu ih, tihnak i.

¹² Cain bang imah ih; ani tu Satan fa ah cang ai a nau Abel rek i. Zaimanin Cain in Abel rek ini? Zaimantifangin a thil bawnhnak dik lo ai a naupa ai bawnhnak tu a dik manin i.

¹³ Ciamanin u le naute, laivum mite in ning hua lekhaw ngaihsunur mah ih.

¹⁴ Kin tu thihhnak songin suak zo ai nunhnak songah lut zo ising, ti ling ising; ciami kin linghnak tu kin u naute kin ithnak manin i. Ithnak a nai lomi tu thihhnak songah tang lai i.

¹⁵ A unau a huatu heh mirek i ai mirektu songah kumkhua nunhnak um lo i ti ling i si.

¹⁶ Ithnak taktak heh zaibang i ti kin linghnak tu hetih in i: Khrih in kin caah a nunhnak pe i. Ciabang thotho in kin khai kin nunhnak heh kin unaute caah pe tuh ve ising.

¹⁷ Milian pakhat in a hlawhsam ngai mi a unau hmu napui a thinlung in zaikhai siar loin um san menma lekhaw Pathian it ing tiin akontih in ti thil tuh i?

¹⁸ I fate, kin itdunhnak heh ponkam le awka menma tuh ilo i; ithnak ngaingai tu bawnhnak ah lar tuhhnak i.

Pathian Hmaiah Ralphahnak

¹⁹ Ciatih imanin thutak songah um i ing ti kin ling thil tuhhnak tu hetihin i; cen Pathian hmaiah thinnuam ngai in kin um tuhhnak tu hetihin i.

²⁰ Kin in a hnawm a pha thiathiamhnak thinlung in mawh kin hluk khalselai Pathian tu kin thinlung tahin ham deuh ngaingai ai zaizongza lingtu khai i, ti ling ising.

²¹ Ciamanin i ithnakte, kinmah ai a hnawm le a pha thiathiamhnak thinlung in mawh kin hluk hlah lekhaw Pathian hmaiah ralphahnak nai ising,

²² a hnenin kin ngenhnak tepawl hmuah ngah ising, zaimantifangin a thupehnak hlun tlang ai a anghnak kin bawnhnak manin i.

²³ A thupehnak tu Khrih ai thupehnak bangin, a Fapa Jesuh Khrih sang tlang ai pakhat le pakhat it dun tuhhnak ising.

²⁴ Pathian thupehnak a hluntute hmuah heh Pathian songah um ai Pathian khai amahte songah um ve i. Cen Pathian ai kin pehnak Rauhla manin Pathian tu kin songah um i, ti ling ising.