1 Johan 2 - Zanniat Bible

Khrih Tu Bawmtu I

¹ I fate, sual ning bawn lohnak tuhin he lai heh ning hnenah ning kuat ing. Ikhalselai pakhatkhat in sualhnak bawn le i sikhaw a dikcangmi Jesuh Khrih, kin tumrul in Pa Pathian hnenah thu kin rel sahthaitu nai ising.

² Cen Khrih amah manin kin sualhnak tu ngaithiam ai kinmah ai sualhnak lek zolo in mi zongzong ai sualhnak khai ngaithiam i.

³ Pathian thupehnak hlun lesingkhaw amah a lingtu ising ti fiang i.

⁴ Mi pakhatkhat in Pathian ling ing tiin ti napui a thupehnak hlun hlah lekhaw thudonrel i ai a songah thutak um lo i.

⁵ Ikhalselai Pathian thu a hluntu heh a songah Pathian a ithnak a semkhim in um i tihnak i. Pathian thawn pawlkomhnak nai i ing ti kin ling fianghnak tu hetihin i:

⁶ Aisu khai Pathian thawn pehzomhnak nai ing a titu in Jesuh Khrih bangin nung tuh i.

Thukham Thar

⁷ I ithnakte, ning hnenai i nganhnak thukham heh a thar ilo i; a hampan in ning naiciahnak thukham hlun i. Ciami thukham hlun heh ning lingciahnak i.

⁸ Ikhalselai tun ning hnenah i nganhnak thukham heh thukham thar i, zaimantifangin he thukham thar a dik zia heh Khrih song le ningmah songah hmu thil i. Akontih i tifangin khuathim tu bo zianzo ai tleuhnak taktak tleu zo i.

⁹ Aisu khai tleuhnak songah um ing ti napui a unau a cimtu heh khuathim songah um i tihnak i.

¹⁰ Aisu khai a unau ittu heh tleuhnak songah um ai ciamanin midang sualruaihnak tuh a songah zaikhai um lo i.

¹¹ Ikhalselai a unau a cimtu heh khuathim songah um i; khuathim songah vak ai thimhnak in a mit cawruai manin akon lam feh ing ti rin ling lo i.

¹² I fate, Khrih thawmin ning sualhnak tu ngaithiam zo manin he laikuat heh ning hnenah ngan ing.

¹³ Pate, a hampan ai a um zomi Amah ning ling manin he laikuat heh ning hnenah ngan ing. Tlangvalte, Satan ning neh ben manin he laikuat heh ning hnenah ngan ing.

¹⁴ I fate, Pa Pathian ning ling manin he laikuat heh ning hnenah ngan ing. Pate, a hampan in a um awng zomi Amah ning ling manin he laikuat heh ning hnenah ngan ing. Tlangvalte, mihat ning imanin he laikuat heh ning hnenah ngan ing; Pathian thu ning songah um ai Satan khai neh zo i si.

¹⁵ Hemi laivum le a songai thilri heh daih mah ih; he laivum daih le i sikhaw Pathian ithnak nai lo i si.

¹⁶ Laivum ai thil hmuahhmuah: sualhnak tisa in a hiamhnak, minung in hmuhnak le amahte daihhnak thil, minung ai tluangkhawnghnak ai ruathnak thil hmuahhmuah heh pakhatniu bangkhai Pa hnenin a hlenghnak ilo i. A veksen in laivum in a hlenghnak ciang i.

¹⁷ Laivum le a songai um thilri, minung ai daihhnak tepawl heh pairal zianzo zo i; ikhalselai Pathian daihhnak a bawntu heh kumzangza in nung tuh i.

Khrih Ai Ral

¹⁸ I fate, ni tawphnak nong zo i. Khrih ai ral hleng tuh i ti ling i si; tunah Khrih ai ral tampui lar zo ai ciamanin hnuataber can nong zo i ti ling ising.

¹⁹ Hemite heh kinmah mi ngaingai ilo manin kin hlum i. Kinmah songai a telmi taktak iselai kin pawl tuh ṭio i. Hetih ai hlumhnak in kin pawl songai minung ngaingai ilo i, ti larruai i.

²⁰ Ikhalselai ning tu Khrih in Rauhla Thianghlim ning burh zo manin ning veksen in thutak lingtu i si.

²¹ Ning hnenah laikuat i nganhnak heh thutak ning ling lo manin ilo i; ning in thutak ling ai thudon heh thutak in hleng awng lo i ti, ning ling man sawn in i.

²² Ciatih ilekhaw aisu heh thudonreltu ini? Jesuh tu Messiah ilo i, a titu hmuah heh thudonreltute i. Ciapa tu Khrih ai Ral i ai Pa le Fapa a hnawltu i.

²³ Zaitin tifangin, Fapa a hnawltu in Pa khai hnawl i. Aisu khai Fapa a pomtu heh Pa khai pom ve i.

²⁴ Ciatih imanin a hampan ai ning zahnak thuthang heh ning thin songah dah tu hlen ih. Ciatihin phatak niu in dah le i sikhaw Pa le Fapa thawn a pehzomtu ngio i tuh i si.

²⁵ Ciami kumkhua nunhnak tu Khrih amah rori in a thukhamhnak i.

²⁶ Ning zawl tumtu hnelhno pawl ai thu ah he laikuat heh ning hnenah ngan ing.

²⁷ Ning tu Khrih ai rauhla ning vumah burh zo manin ciami Rauhla ning songai a um songah midang ai zirh hnelhno ning kul lo i. Zaimantifangin a Rauhla in zaizongza ning zirh ai a zirhhnak khiah thudon ilo i, thudik sawn i. Ciamanin Rauhla ai zirhhnak hlun tu ilai Khrih thawn pehzom ngio in um tu hlen ih.

²⁸ I, i fate, amah thawn ning pawlkomhnak ah kho tu ngio ih; ciatihin amah a hleng fangin ralphahnak in kin dim tuhai a hleng Nia ah zakthi in a hmai in relh hnelhno kul tuh lo i.

²⁹ Khrih tu a dikcang i ti ling i si; ciamanin aisu khai dikcanghnak bawntu heh Pathian ai fate i ti ling tuh i si.