ثبرات غار تيتوس 3 - ثريفيث 2020

أَبْرِيذ ن يِنِّي يذفَّارن لْمَسِيح

¹ سْفكَّر إِ ڒْمُوْمِنِين اَذ ݣّن اَرَّاي إِ ڒْحُكَّام ذ ڒْمخْزن، أَذَاسن طَاعن اَذ يڒِين وجْذن إِ كُڒ ڒْخذْمث ذ ثَصبْحَانْت.

² سْفكَّر-اَثن حمَا وَار تْعيِّبن حَدّ، وَار تْمنْغِين شَا س وَاوَاڒن، أَذ يڒِين تْرَانْكِيڒ، أَذ سْخذْمن يجّن ن تَّوَاضُع اَك مَارَّا يوْذَان.

³ شُوْف، نشِّين عَاوذ تُوْغَا ذَايْنغ يجّن ن ڒقْفَاڒث، وَار نتْطِيعِي شَا، نتْوَاشمّث، حكّْمنْت خَانغ اَطَّاس ن لْأَنْوَاع ن شّهَاوَاث ذ زّْهُو. تُوْغَا نتْعِيش ذݣ يِجّن ن ڒقْبَاحث ذ ڒحْسذ، عِيفّن-اَنغ يِوْذَان، نتْعِيفَّا اَيَاوْيَا.

⁴ وَلَكِن وَامِي د يمظْهَار ڒْخِير ذ لْحَنَانَا ن أَربِّـي ونِّي إِي ذَانغ يسْنجْمن

⁵ ڒخْدّنِّي يسنْجم-اَنغ مَاشِي عْلَاحْسَاب لْحَسَانَاث نِّي إِي نݣَّا؛ لَّا، تُوْغَا عْلَاحْسَاب اَرَّاحْمث نّس نتَّا. ئِسِّيْرذ-اَنغ س وَامَان ن ؤُخْڒَاق ذ جْذِيذ، يَارَّا-ٱنغ ذ جْذِيذ س وفُوْس ن أَرُّوْح يقدّْسن.

⁶ أَرُّوْح-أَ يفَرغ-يث-يذ خَانغ أَربِّـي س يِجّن ن ڒْخِير يمْغَر س وفُوْس ن عِيْسَى لْمَسِيح ونِّي إِي ذَانغ يسْنجْمن.

⁷ حمَا أَ نْوَارث زَّايس، أَغَارْنغ يِيڒِي يجّن ن لْأَمَال ن ثُوْذَارْث ثنِّي وَار يفنِّين شَا لِأَنَّا نْمصْڒَاح اَك أَربِّـي س اَرْضَا نّس.

⁸ أَوَاڒ-أَ إِي قَّارغ ذَايس تِّقث. نش خْسغ شك اَذ تْوكّْذذ خ ثْمسْڒَايِين-أَ إِ يِنِّي إِي يُوْمْنن زِي أَربِّـي بَاش اَذ د اَرّن ڒْبَاڒ نْسن اَذ طوّْعن يخف نْسن س لْحَسَانَاث. ثِمسْڒَايِين-أَ ذ ثِصبْحَانِين س وَاطَّاس نفّْعنْت يوْذَان.

⁹ وَلَكِن سِيْݣّْوج يخف نّش زݣ يمْنَاقَارن إِي ذِي ثدْجَا غِير ثُوْبُوْهْڒِيَا أُو عَاوذ زِي لْبَحْت نِّي ن ثْشجُّوْرَا ن ڒجْذُوْذ ذ يمنْغِيْون ذ يمْخَرْوَاضن خ شَّرِيعَا لِأَنَّا نِثْنِي ذ ڒْبَاطڒ وَاهَا وَار نفّْعن شَا قَاع.

¹⁰ ونِّي يسْمنْغَان يوْذَان اَݣ وَايَاوْيَا شك عْڒم-اَس ثْوَاڒَا ثَمزْوَارُوْت ذ وِيْس ثْنَاين ڒخْدّنِّي اَوْݣّْوج زَّايس قَاع.

¹¹ ثسّْنذ إِلَّا بْنَاذم-أَ يعصَّا ذ اَمْعوَّاج، لْعِقَاب نّس خ يِيڒِي نّس.

لْخِتَام ن ثبْرَات-أَ

¹² خْمِي ذَاوم د غَا سّكّغ ؤُمَاثْنغ أَرْتِيْمَاس نِغ ذ تُوْشِيق، اݣّ لْمجْهُوْد نّش اَغَارِي د ثَاسذ غَار ثنْدِينْت ن نِيكُوْپْـرِيس مِنْزِي نش تُوْغَا فكَّرغ اَذ سعْذُوْغ ذِنِّي ڒْمشْتَا.

¹³ عْلَاحْسَاب أَيثْمَاثْنغ أَپُـوْلُّوْس ذ زِيْنَّاس ونِّي إِي يدْجَان ذ اَوْكِيڒ، اݣّ لْمجْهُوْد نّش بَاش اَثن ثْعَاوْنذ ذݣ وبْرِيذ نْسن؛ خْزَر مَا غَارْسن مَارَّا مِين تحْذَاجَان.

¹⁴ ئِوْذَان نّغ يتْخصَّا وَار تْعِيشن شَا بْڒَا نّْفَع، ئِتْخصَّا اَذ طوّْعن يخف نْسن س لْحَسَانَاث حمَا اَذ دبَّرن إِ يِيْنَا يتحْذَاجَان.

¹⁵ سَاوَّاضن-اَش-د سْڒَام مَارَّا يِنِّي يدْجَان اَكِذِي. سِيوض-اَسن سْڒَام إِ يِنِّي إِي ذَانغ يتخْسن ذِي لْإِيمَان. أَكِذْوم يِيڒِي اَرْضَا إِ مَارَّا كنِّيو.