ثبرات غار تيتوس 1 - ثريفيث 2020

لْمُقَدِّمَا

¹ نش ذ بُوْلُس ذ اَخدَّام ن أَربِّـي ذ اَرَّسُوْل ن عِيْسَى لْمَسِيح خدّْمغ عْلَاحْسَاب يِنِّي إِݣ يخْضَر أَربِّـي بَاش اَذ اَمْنن اَذ سّْنن لْحَقِيقَا إِي ثن يسݣُّوْرن غَار مِين يدْجَان نِيشَان ذِي لْإِيمَان.

² لْإِيمَان-أَ ذ ثُوْسْنَا-يَا ثْبدَّا خ لْأَمَال ن ثُوْذَارْث نِّي وَار يفنِّين عمَّارْص، ثنِّي إِي زِي يوْعذ أَربِّـي يعْنِي ونِّي وَار يسْخرِّيقن شَا. ئِوْعذ س ثُوْذَارْث نِّي قْبڒ مَا ٱذ بْذَان زْمَانَاث قَاع.

³ أُو ذِي لْوقْت نِّي إِݣ يخْضَر نتَّا يسْمظْهَار-د لْوَاعد-أَ س تّبْشِير نِّي إِي زِي ذَايِي يتْوَاكلّف س لْأَمَر ن أَربِّـي ونِّي إِي ذَانغ يسْنجْمن.

⁴ تَارِيغ ثَبْرَات-أَ إِ تِيتُوْس ونِّي إِي يدْجَان اَم ممِّي ذ صَّح ذِي لْإِيمَان-أَ إِي ذِي نْشَرّش. أَكِذش يِيڒِي اَرْضَا ذ ڒهْنَا زِي أَربِّـي بَابَاثْنغ ذ عِيْسَى لْمَسِيح ونِّي إِي ذَانغ يسْنجْمن.

ڒُوْصِيَاث خ يمقّْرَانن ن جْمَاعث ن ڒْمُوْمِنِين

⁵ خ مَانَاينِّي جِّيغ-شك ذِي ثيْزِيرْث ن كْرِيت، أَذ تْعذْڒذ مِين تُوْغَا رزُّوْغ نش اَذ عذْڒغ وَار ؤُوِيضغ شَا أُو عَاوذ بَاش اَذ تِخْضَرذ يمقّْرَانن ن جْمَاعث ن ڒْمُوْمِنِين ذِي مْكُڒ اَبِيلَاج اَم مَامّش إِي ش وصِّيغ.

⁶ أَمقّْرَان-أَ مَاشِي اَذ يِيڒِي ذ يجّن ن بْنَاذم تْعيَّابن-ث يِوْذَان. أَغَارس ثِيڒِي يجّن ن ثمْغَارْث وَاهَا اَذ يڒِين يحنْجِيرن نّس ذ ڒْمُوْمِنِين. مَاشِي اَخَاسن ينِين يِوْذَان تݣّن لْمَدلَّا ن سّكْرَا نِغ وَار تْسذْحِين شَا.

⁷ أَقَا اَرَّايس ن جْمَاعث يتْكلَّاف نتَّا س لْمسْؤُلِيَا زِي أَربِّـي أُو لَابُد اَذ يِيڒِي بْڒَا ڒْعِيب، وَار ذَايس يتِيڒِي بُو تَّكبُّر، وَار يتْعصِّيب شَا ذغْيَا، وَار يسكَّر شَا س شّْرب، وَار يشِّيث شَا، وَار يضمّع شَا ذِي تْمنْيَاث.

⁸ وَاه، ئِتخصَّا اَذ يتْرحَّاب زݣ ينوْجِيون، أَذَاس يتعْجِيب مِين يدْجَان ذ اَصبْحَان، أَذ يحْكم خ ثْنفْسِيث نّس، أَذَايس يِيڒِي لْمَعْقُوْل، أَذ يِيڒِي يصْفَا، أَذ يربَّا يخف نّس.

⁹ ئِتْخصَّا أُو لَابُد اَذ يطّف مْلِيح ذݣ وَاوَاڒ نِّي إِي ذِي ثدْجَا تِّقث إِي ذَاس يتْوَاسْڒمْذن حمَا اَذ يشجّع يوْذَان س يِجّن ن تَّعْلِيم نِيشَان اَذ ينْهَا يِنِّي يتْعَارَّاضن إِ تَّعْلِيم-أَ.

¹⁰ لِأَنَّا يِنِّي إِي ذِي ثدْجَا ثْغنَّانْت اَقَاثن مُجُوْدِين، سَّاوَاڒن وَاهَا نِثْنِي ذ يغدَّارن خَاصَّتَان ذ يِنِّي يتِيشّن لْهِمَّا اَطَّاس إِ طَّهَارث.

¹¹ يِيْنَا اَقمُّوْم نْسن يتْخصَّا-يَاسن اَذَاسن يتْوَاقّن. نِثْنِي مشْحَاڒ ن لْعَائِلَاث كمْڒنْت إِي سْپَـرْذْڒن وَامِي ذَاسن سڒْمَاذن ثِمسْڒَايِين يتْخصَّا-يَاسن وَار ذَاسن ثنْت سڒْمِيذن شَا، نِثْنِي ضمّْعن ذِي تْمنْيَاث وَاهَا.

¹² ئِجّن زَّايْسن حسّْبن-ث ذ نَّبِي نتَّا س يِيخف نّس ينَّا: "نِثْنِي أَيث-كْرِيت ڒبْدَا ذ أَيث-بُوْيخَرِّيقن ذ ڒُوْحُوْش يوْعَارن ذ يمَعْݣَازن ذَايْسن اَعدِّيس وَاهَا."

¹³ أَقَا شْهَاذث نِّي إِي ينَّا نِيشَان إِي ثدْجَا. إِذن، نْهَا-ثن س ڒقْسَاحث حمَا اَذ يڒِين نِيشَان ذِي لْإِيمَان.

¹⁴ مَاشِي اَذ ݣّن اَرَّاي إِ ثْحُوْجَا نِّي ن أَيث-إِسْرَائِيل نِغ اَذ ݣّن اَرَّاي إِ ڒُوْصِيَاث نِّي ن يِنِّي يسْبعَّاذن يخف نْسن زِي لْحَقِيقَا.

¹⁵ أَقَا يِنِّي إِݣ يدْجَان صْفَان اَتَاف قَاع ثِمسْڒَايِين اَذَايْسن يڒِينْت صْفَانْت. وَلَكِن يِنِّي يخنْزن وَار ؤُمِينن شَا اَتَاف وَار ذَايْسن تِيڒِي ؤُڒَا ذ يجّن ن ثْمسْڒَايْث ثصْفَا. أَتَاف ڒْعَقُوْرَاث نْسن ذ ضَّمِيرَاث نْسن س ثْنَاين تخْنِيزن.

¹⁶ قَّارن قَا نسّن أَربِّـي وَلَكِن نكَّرن-ث س ڒفْعَايڒ نْسن. نِثْنِي تْوَاعِيفّن، وَار تْطِيعِين شَا، وَار نفّْعن شَا ؤُڒَا ذݣ يِجّن ن ڒْخذْمث ذ ثَصبْحَانْت.