أيث-روما 7 - ثريفيث 2020نتْوَافكّ زِي شَّرِيعَا 1 آي اَيثْمَا، سَّاوَاڒغ اَكِذْوم ثسّْنم شَّرِيعَا. مَا وَار ثسِّينم إِلَّا شَّرِيعَا ثْحكّم خ بْنَاذم إِي يدَّرن وَاهَا؟ 2 مَثَلَان ذِي شَّرِيعَا، ثَمْغَارْث ثمْڒش مڒَا اَرْيَاز نّس اَقَاث عَاذ يدَّر، أَقَات خ يِيرِي نّس. مڒَا اَرْيَاز نّس يمُّوْث اَقَا تْوَافكّ زِي ڒْقَانُوْن ن ڒمْڒَاش. 3 س مَانَايَا، مڒَا ثْرُوْح غَار شَان يِجّن نّغْنِي، أَرْيَاز نّس اَقَاث عَاذ يدَّر، أَتَاف تْوَاحْسَاب ثزْنَا. وَلَكِن مڒَا يمُّوْث ورْيَاز نّس، أَتَاف تْوَافكّ زِي ڒْقَانُوْن-أَ. ڒخْدّنِّي مڒَا ثمْڒش اَك شَان ورْيَاز نّغْنِي اَتَاف وَار تْوِيحِيسِيب شَا ثزْنَا. 4 آي اَيْثْمَا، أَمنِّي إِي ثدْجَام ؤُڒَا ذ كنِّيو. يعْنِي تْوَافكّم زِي شَّرِيعَا ن مُوْسَى وَامِي ثمُّوْث دَّات ن لْمَسِيح، أَقَاوم خ يِيرِي ن يِجّن نّغْنِي نتَّا ذ يِيرِي ن لْمَسِيح إِي د يكَّرن زِي ڒْموْث، حمَا أَ نَارو ڒخْذَايم ثِصبْحَانِين إِ أَربِّـي. 5 لِأَنَّا قْبڒ وَامِي تُوْغَا نْتݣّ اَرَّاي إِ طَّبِيعَا ثَعفَّانْت نّغ، اَرْنِينْت ذَايْنغ شّهَاوَاث ثِعفَّانِين عْلَاحْسَاب مِين ذَانغ ثنَّا شَّرِيعَا، خدّْمنْت شّهَاوَاث نِّي ذِي دَّات نّغ أُوْشَا نْتَارو ڒخْذَايم يتَاوِين غَار ڒْموْث. 6 وَلَكِن ڒخُّو، نشِّين نتْوَافكّ زِي شَّرِيعَا-يَا إِي ذَانغ يقّْنن، نمُّوْث-اَس إِ مَانَاينِّي. نشِّين نْعبّذ س يِجّن ن وبْرِيذ ذ جْذِيذ ن اَرُّوْح ن أَربِّـي، مَاشِي س نِّظَام نِّي اَقْذِيم إِي يُوْرِين ذِي لْكِتَاب. ڒْمُعْصِيّث ثْسظْهَار-يت-يد شَّرِيعَا 7 إِيوَا مِين غَا نِينِي؟ مَا شَّرِيعَا ن مُوْسَى نتَّاث س يِيخف نّس ذ يجّن ن ڒْمُعْصِيّث؟ لَّا، عمَّارْص! مَعْلِيك شَّرِيعَا وَار ثدْجِي، أَتَاف وَار سِّينغ مِين ثعْنَا ڒْمُعْصِيّث. مَعْلِيك وَار ذَايس ڒُوْصِيّث نِّي <وَار عشّق>، أَتَاف وَار سِّينغ مِين يعْنَا وعشَّاق. 8 ثُمَّا ڒْمُعْصِيّث ثُوْفَا ذَايِي لْفُرْصَا س ڒُوْصِيّث-أَ، ثرْنِي ذَايِي زِي كُڒ نُّوْع ن وعْشَّاق إِي يدْجَان لِأَنَّا ڒْمُعْصِيّث بْڒَا شَّرِيعَا اَخْمِي ثمُّوْث. 9 نش قْبڒ مَا ٱذ سّْنغ شَّرِيعَا، تُوْغَايِي دَّرغ. وَلَكِن وَامِي د ثُوْسَا ڒُوْصِيّث ن أَربِّـي، ڒْمُعْصِيّث اَخْمِي ثكَّر-د زِي ڒْموْث أُوْشَا نش اَخْمِي مُّوْثغ. 10 ثُمَّا ؤُفِيغ ڒُوْصِيّث نِّي إِي د يُوْسِين اَذَايِي ثُوْش ثُوْذَارْث، لَّا، قَا نش ثُوْوِي-يَايِي غَار ڒْموْث. 11 لِأَنَّا ڒْمُعْصِيّث ثُوْفَا ذَايِي لْفُرْصَا س ڒُوْصِيّث-أَ ثشْمث-اَيِي أُو عَاوذ زَّايس زِي ڒُوْصِيّث-أَ ثْنغ-اَيِي. 12 س مَانَايَا شَّرِيعَا ن مُوْسَى ثصْفَا، ڒُوْصِيّث ن أَربِّـي ثصْفَا، ثصْڒَح، ثصْبَاح. ئِج ومنْغِي غَار ذَاخڒ ن بْنَاذم 13 إِيوَا، مَا يذْوڒ مِين يصبْحَان ذ سَّبَاب إِي زِي غَا مّْثغ نش؟ لَّا، عمَّارْص! لْعَكْس، ذ ڒْمُعْصِيّث إِي يݣِّين مَانَاينِّي، ثسْخدَّام مِين يصبْحَان حمَا اَذَايِي ثْنغ. مَايمِّي؟ حمَا اَذ تسْمظْهَار يخف نّس نتَّاث ذ ڒْمُعْصِيّث. ثُمَّا س لْفُرْصَا ن ڒُوْصِيّث-أَ ڒْمُعْصِيّث ثسْمظْهَار-د بْڒَا ڒَاحدّ مشْحَاڒ يقْبح شَّرّْ نّس. 14 فَا نشِّين نسّن شَّرِيعَا ن مُوْسَى زِي أَربِّـي، وَلَكِن نش ذ بْنَاذم تْوَامّنْزغ إِ ڒْمُعْصِيّث. 15 وَار سنْت تفْهِيمغ شَا إِ ڒخْذَايم ينُو لِأَنَّا نش وَار تݣّغ مِين خْسغ اَث ݣّغ، تݣّغ مِين تْعِيفِّيغ. 16 أُو خْمِي تݣّغ مِين وَار خْسغ شَا اَذ ݣّغ، أَتَاف وَافْقغ بلِّي شَّرِيعَا ن مُوْسَى ثصْبَاح. 17 ثُمَّا زِي سَّا اَڒ ثْسَاونْت اَتَاف مَاشِي ذ نش يتݣّن مَانَايَا، ذ ڒْمُعْصِيّث نِّي إِي ذَايِي يزدّْغن. 18 نش طَّبِيعَا ثَعفَّانْت ينُو سّْنغ وَار ذَايس ثزْذِيغ ؤُڒَا ذ يجّن ن ثْمسْڒَايْث ذ ثَصبْحَانْت. لِأَنَّا رزُّوْغ اَذ ݣّغ ثِمسْڒَايِين ثِصبْحَانِين، وَلَكِن وَار زمَّرغ اَثنْت ݣّغ. 19 ثِمسْڒَايِين نِّي ثِصبْحَانِين إِي تخْسغ اَثنْت ݣّغ وَار ثنْت تݣّغ شَا؛ لَّا، شَّرّْ نِّي إِي وَار تخْسغ اَث ݣّغ تݣّغ-ث. 20 مڒَا تݣّغ مِين وَار تخْسغ، أَتَاف نتَّاث ذ ڒْمُعْصِيّث نِّي إِي ذَايِي يزدّْغن؛ مَاشِي ذ نش يتݣّن مَانَاينِّي. 21 فَلِهَذَا نش ؤُفِيغ ذݣ يِيخف ينُو يجّن ن طَّبِيعَا، يعْنِي خْمِي تخْسغ اَذ ݣّغ شَان ثْمسْڒَايْث ذ ثَصبْحَانْت، ؤُفِيغ ذِنِّي شَّرّْ يُوْذس. 22 لِأَنَّا ذِي نّفْس ينُو نش فَرْحغ س شَّرِيعَا ن أَربِّـي، 23 وَلَكِن تَافغ يجّن ن طَّبِيعَا نّغْنِي ذݣ يخف ينُو إِݣ يتْمنْغَان اَكذ مِين غَارِي ذِي ڒَعْقڒ ينُو. س طَّبِيعَا-يَا تقّن-اَيِي ڒْمُعْصِيّث نِّي إِي ذَايِي يزدّْغن ذݣ يِيخف ينُو. 24 يَا ڒفْضِيحث ينُو نش! وِي ذَايِي غَا يسْنجْمن زِي دَّات-أَ ثَانِيتَا ن ڒْموْث؟ 25 تْشكَّرغ أَربِّـي عْلَاحْسَاب سِيذِيثْنغ عِيْسَى لْمَسِيح! س مَانَايَا ذِي ڒَعْقڒ ينُو نش ذ يسْمغ ن شَّرِيعَا ن أَربِّـي، نش ذِي دَّات ينُو ذ يسْمغ ن طَّبِيعَا ن ڒْمُعْصِيّث. |