لواحي ن يوحنا 22 - ثريفيث 2020

¹ ئِسْمظْهَار-اَيي-د لْمَلَاك نِّي يغْزَار ن وَامَان ن ثُوْذَارْث صْفَان اَم جَّاج، ئِتفّغ-د زِي لْعَرْش ن أَربِّـي ذ يِزْمَار

² يتَازّڒ ذِي ڒْوسْط ن شَّارِع ن ثنْدِينْت. خ ثْنَاين ن يغزْذِيسن ن يِغْزَار-أَ ذِنِّي ثْشجَّارْث ن ثُوْذَارْث. تَارو ثنْعَاش ن ثْوَاڒَاثِين كُڒ شْهَار يجّن ن ثْوَاڒَا، أَفَر نّس ئِسْݣنْفَا ڒݣْنُوْس.

³ زِي سّنِّي اَڒ ثْسَاونْت وَار ذِنِّي تِيڒِي بُو نَّعْڒث. لْعَرْش ن أَربِّـي ذ يِزْمَار اَذ يِيڒِي ذِي ثنْدِينْت-أَ، أَث عبْذن لْعِبَاد نّس.

⁴ أَذْ ࢲرن اَغمْبُوْب نّس، ئِسم نّس اَقَاث خ ثنْيَارْث نْسن.

⁵ زِي سّنِّي اَڒ ثْسَاونْت وَار ذِنِّي تِيڒِي بُو دْجِيڒث، وَار تحْذِيجِين شَا ثْفَاوْث ن ڒفْنَار نِغ ذ ثْفَاوْث ن ثْفُوْشْت ڒَاحقَّاش سِيذِي أَربِّـي نتَّا اَخَاسن يݣّ ثْفَاوْث نّس. أَذ حكْمن إِ ڒبْدَا ن ڒبْدَاث.

سِيذِيثْنغ عِيْسَى يتَاس-د

⁶ ينَّا-ٱيِي لْمَلَاك ونِّي: "أَوَاڒن-أَ ذَايْسن ڒَامَان ذَايْسن ڒْحَقّ. أَربِّـي نتَّا ذ مَوْلَانَا إِي د يسهْوَان لْوَاحِي خ لْأَنْبِيَا، ئِسّكّ-د لْمَلَاك نّس حمَا اَذ د يسْمظْهَار إِ يِنِّي ث يعبّْذن مِين لَابُد غَا يوقْعن عْڒَاين."

⁷ "نش اَقَا ؤُسِيْغ-د وَار تْعطَّاڒغ شَا! سَّعْذ ن يِنِّي يتݣّن اَرَّاي إِ وَاوَاڒن ن لْوَاحِي يدْجَان ذِي لْكِتَاب-أَ."

⁸ ذ نش يُوْحَنَّا إِي سْڒِيغ، ࢲْرِيغ ثِمسْڒَايِين-أَ. وَامِي سْڒِيغ، ࢲْرِيغ مَانَايَا، هْوِيغ اَذ سجّْذغ غَار يضَارن ن لْمَلَاك نِّي إِي ذَايِي د يسْمظْهَارن ثِمسْڒَايِين-أَ.

⁹ ينَّا-ٱيِي: "لَّا! قَا نش ذ ڒْعَبْذ، أَم نش اَم شك اَم أَيثْمَاش لْأَنْبِيَا ذ مَارَّا يِنِّي يتݣّن اَرَّاي إِ وَاوَاڒن ن لْكِتَاب-أَ. سجّذ-اَس إِ أَربِّـي."

¹⁰ ينَّا-ٱيِي: "وَار سْنُوْفَّر شَا اَوَاڒن-أَ ن لْوَاحِي ذِي لْكِتَاب-أَ، ڒَاحقَّاش ڒْوقْث ثُوْذس-د.

¹¹ ونِّي يتݣّن شَّرّْ اَذ يقِّيم يتݣّ شَّرّْ. ونِّي يخنْزن اَذ يقِّيم يتخْنِيز. ونِّي يدْجَان نِيشَان اَذ يقِّيم نِيشَان. ونِّي يدْجَان ذ اَمْقدّس اَذ يقِّيم ذ اَمْقدّس."

¹² ئِنَّا عِيْسَى: "نش اَقَا ؤُسِيغ-د وَار تْعطَّاڒغ شَا! أَذ د اَوِيغ تخْڒِيسث، أَذ جَازِيغ كُڒ يجّن عْلَاحْسَاب ڒخْذَايم نّس.

¹³ نش ذ لْأَلِف نش ذ لْيَاء، نش ذ اَمزْوَارُو ذ اَنݣَّارُو. نش كُڒْشِي زَّايِي إِݣ يبْذَا، كُڒْشِي زَّايِي إِي غَا يكمّڒ.

¹⁴ سَّعْذ ن يِنِّي يتْصبَّانن يتْشَامِّيرن نْسن، حمَا اَغَارْسن يِيڒِي ڒْحَقّ ذِي ثْشجَّارْث ن ثُوْذَارْث اَذ اَذْفن ثَنْدِينْت زِي ثوُّوْرَا نّس.

¹⁵ غَار بَارَّا ن ثنْدِينْت دْجَان ذِنِّي يقْزِينن ذ يسحَّارن ذ يِنِّي يفسّْذن ذ يِنِّي ينقّن يوْذَان ذ ينِّي يعبّْذن لْأَصْنَام ذ مَارَّا يِنِّي يسْخرِّيقن إِي تْحِبَّان يخَرِّيقن.

¹⁶ ذ نش عِيْسَى سّكّغ-د لْمَلَاك ينُو حمَا اَذَاوم يشْهذ خ ثْمسْڒَايِين-أَ ذِي ثْجُمَاع ن ڒْمُوْمِنِين. نش ذ لْأَصْل ن دَاود أُو زِي دُّوْرِّيث نّس. نش ذ يثْرِي ن ڒفْجَر يتْشعْشِيعن."

¹⁷ أَرُّوْح ذ ثْسْڒِيث قَّارن: "أَرَاح-د!" ونِّي يتْسْڒَان اَذ يِينِي: "أَرَاح-د!" ونِّي يفُوْذن اَذ د يَاس، ونِّي يرزُّون اَمَان ن ثُوْذَارْث اَذ يسو بَاطڒ!

¹⁸ شهّْذغ نش خ مَارَّا يِنِّي يتْسْڒَان إِ وَاوَاڒن-أَ ن لْوَاحِي ذِي لْكِتَاب-أَ: ونِّي خَاسن غَا يَرْنِين، أَتَاف أَربِّـي اَس يَرْنِي لْمُصِيبَاث إِي د يُوْسِين ذِي لْكِتَاب-أَ.

¹⁹ ونِّي غَا يكّْسن زݣ وَاوَاڒن-أَ ن لْوَاحِي ذِي لْكِتَاب-أَ، أَتَاف أَربِّـي اَس يكّْس ڒْحَقّ نّس زِي ثْمسْڒَايِين إِݣ يُوْرِين ذِي لْكِتَاب-أَ، يعْنِي ڒْحَقّ نّس ن ثْشجَّارْث ن ثُوْذَارْث ذ ڒْحَقّ نّس ن ثنْدِينْت يقدّْسن.

²⁰ ئِقَّار عِيْسَى يعْنِي ونِّي يخبَّرن خ ثْمسْڒَايِين-أَ: "وَاه، نش أَقَا ؤُسِيغ-د وَار تْعطَّاڒغ شا!" آمِين، أَرَاح-د آ سِيذِيثْنغ عِيْسَى.

²¹ أَذ يِيڒِي اَرْضَا ن سِيذِيثْنغ عِيْسَى اَك كُڒ يجّن. آمِين.