لواحي ن يوحنا 21 - ثريفيث 2020ئِجّن ن وجنَّا ذ ثْمُوْرْث ذ جْذِيذ 1 ࢲْرِيغ يجّن ن وجنَّا ذ جْذِيذ ذ يجّن ن ثْمُوْرْث ذ جْذِيذ، ڒَاحقَّاش اَجنَّا اَمزْوَارُو ذ ثْمُوْرْث ثَمزْوَارُوْت صَافِي تْوَاكّْسن، ڒبْحَر وَار يقِّيم شَا. 2 ࢲْرِيغ ثَنْدِينْت يقدّْسن نتَّاث ذ لْقُدْس ذ جْذِيذ. ثهْوَا-د زݣ وجنَّا زِي أَربِّـي ثݣَّا اَم ثسْڒِيث ثعْذڒ يخف نّس بَاش اَذ تڒْقَا مُوْڒَاي. 3 سْڒِيغ إِ يِجّن ن ثْمِيجَّا زِي لْعَرْش ثقَّار س جّْهذ: "أَقَا ثَزدِّيغْث ن أَربِّـي اَك يِوْذَان، أَذ يزْذغ جَارَاسن اَذ يڒِين ذ شَّعْب نّس. أَربِّـي س يِيخف نّس اَكِذْسن يِيڒِي، أُو عَاوذ اَذ يِيڒِي ذ أَربِّـي نْسن. 4 أَذ يمْسح كُڒ اَمطَّاو زِي ثِيطَّاوِين نْسن. وَار تْغِيمِي شَا عَاذ ڒْموْث نِغ ذ لْحُزن نِغ ذ يمطَّاون نِغ ذ ڒحْرِيق. أَقَا ثِمسْڒَايِين نِّي ثِمزْوُوْرَا صَافِي تْوَاكّْسنْت." 5 ينَّا-ٱيِي ونِّي يقِّيمن خ لْعَرْش: "أَذ ݣّغ كُڒْشِي ذ جْذِيذ!" أُوْشَا ينَّا: "أَرِي مَانَايَا قَا اَوَاڒن-أَ ذَايْسن ڒَامَان ذَايْسن ڒْحَقّ." 6 ينَّا-ٱيِي: "صَافِي، ئِتْوَاكمّڒ. نش ذ لْأَلِف نش ذ لْيَاء. نش كُڒْشِي زَّايِي إِݣ يبْذَا، نش كُڒْشِي زَّايِي إِي غَا يكمّڒ. أَذ ؤُشغ إِ ونِّي يفُوْذن زِي ڒْعُنْصَر ن وَامَان ن ثُوْذَارْث بَاطڒ. 7 ونِّي غَا يربْحن اَذ يوَرث ذِي ثْمسْڒَايِين-أَ. نش اَذ يڒِيغ ذ أَربِّـي نّس، نتَّا اَذ يِيڒِي ذ مِّي. 8 وَلَكِن شّْمَايث ذ يِنِّي وَار يُوْمِينن شَا ذ يِنِّي يدْجَان ذ يعفَّانن ذ يِنِّي ينقّن يوْذَان ذ يِنِّي يفسّْذن ذ يسحَّارن ذ يِنِّي يعبّْذن لْأَصْنَام ذ مَارَّا يِنِّي يسْخرِّيقن قَا اَمْشَان نْسن اَذ يِيڒِي ذِي ڒبْحَر يرقّن س ثْمسِّي ذ ڒكْبْرِيْيث. قَا ثنِّي ذ ڒْموْث وِيس ثْنَاين." ثَنْدِينْت ن لْقُدْس ذ جْذِيذ 9 يُوْسَا-د غَارِي يجّن زِي سبْعَا ن لْمَلَائِكَاث نِّي إِي غَار دْجَانْت سبْعَا ن ثْمجْمَارِين إِݣ يعمَّرن س سبْعَا ن لْمُصِيبَاث نِّي ثِنْݣُّوْرَا، ينَّا-ٱيِي: "أَرَاح-د، أَذَاش د سْمظْهَارغ ثَسْڒِيث، يعْنِي ثنِّي غَا يَاوِين يزْمَار." 10 ئِيْسِي-اَيِي اَرُّوْح غَار يِجّن ن وذْرَار ذ اَمقّْرَان يُوْعْڒَا، ئِسْمظْهَار-اَيِي-د ثَنْدِينْت يقدّْسن يعْنِي لْقُدْس، ثهْوَا-د زݣ وجنَّا زِي أَربِّـي. 11 ذَايس لْعَظَمَا ن أَربِّـي، نُّوْر نّس اَمشْنَاو ثَزْرُوْت ثَصبْحَانْت، أَمشْنَاو ثَزْرُوْت ن لْيَشب ثصْفَا اَطَّاس. 12 غَارس يجّن ن ڒْحِيض ذ اَمقّْرَان يُوْعْڒَا غَارس ثنْعَاش ن ثوُّوْرَا، ثنْعَاش ن ثوُّوْرَا نِّي خَاسنْت ثنْعَاش ن لْمَلَائِكَاث. يُوْرَا خ ثوُّوْرَا نِّي يسمَاون ن ثنْعَاش ن ثْقبَّاڒ ن أَيث-إِسْرَائِيل. 13 ذِي شَّرْق ثْڒَاثَا ن ثوُّوْرَا، ذِي شَّمَال ثْڒَاثَا ن ثوُّوْرَا، ذِي لْجَنُوْب ثْڒَاثَا ن ثوُّوْرَا، ذِي ڒْغَرْب ثْڒَاثَا ن ثوُّوْرَا. 14 ڒْحِيض ن ثنْدِينْت يبدّ خ ثنْعَاش ن دْسَاسَاث، يُوْرَا خَاسن يسمَاون ن ثنْعَاش ن اَرُّسُل ن يِزْمَار. 15 لْمَلَاك نِّي ونِّي إِي غَارِي د يسِّيوْڒن غَارس ذݣ وفُوْس نّس يجّن ن ڒَعْبَر ن ؤُغَانِيم ن دّْهب يعبَّار زَّايس ثَنْدِينْت ذ ثِوُّوْرَا نّس ذ ڒْحِيض نّس. 16 ثَنْدِينْت مُربَّع، أَم ثُوْزݣَّارْث نّس اَم ثِيْرِيْوْث نّس. يعْبَار ثَنْدِينْت س وغَانِيم نِّي يُوْفَا ذَايس اَڒفَاين أُو اَرْبعمِيَّات ن كِيْلُوْمِيت، أَم ثُوْزݣَّارْث نّس اَم ثِيْرِيْوْث نّس اَم ثُوْعْڒَات نّس. 17 يعْبَار ڒْحِيض نّس يُوْفَا ذَايس مِيَّا أُو اَربعَا أُو اَرْبعِين ن ذرَّاع، يعْنِي ڒَعْبَر لْمَلَاك نِّي اَم ڒَعْبَر ن بْنَاذم. 18 ڒْحِيض نّس يبْنَا س ثزْرَا ن لْيَشب، ثَنْدِينْت ثبْنَا س دّْهب يصْفَان اَمشْنَاو جَّاج يصْفَان. 19 دْسَاسَاث ن ڒْحِيض ن ثنْدِينْت زوّْقن س مْكُڒ نُّوْع ن ثزْرَا ثِصبْحَانِين. دْسَاس اَمزْوَارُو نتَّا ذ ثَزْرُوْت ن لْيَشب، دْسَاس وِيس ثْنَاين ذ لْيَقُوْت اَزيْزَا، دْسَاس وِيس ثْڒَاثَا ذ لْعَقِيق اَشمْڒَاڒ، دْسَاس وِيس أَربعَا ذ ثَزْرُوْت ثَزيْزَاوْث ن زُّمُرُّد، 20 دْسَاس وِيس خمْسَا ذ جَّزع اَزݣّْوَاغ، دْسَاس وِيس ستَّا ذ لَعْقِيق اَزݣّْوَاغ، دْسَاس وِيس سبْعَا ذ ثَزْرُوْت ن زَّبَرْجَد، دْسَاس وِيس ثْمنْيَا ذ ثزْرُوْت ن بِيْرِّيل، دْسَاس وِيس تسْعَا ذ لْيَقُوْت اَوْرَاغ، دْسَاس وِيس عشْرَا ذ لْعَقِيق اَمرْبِيع، دْسَاس وِيس حِطَاش ذ ثَزْرُوْت ن فَيْرُوْز، دْسَاس وِيس ثنْعَاش ذ ثَزْرُوْت ن جَّمَشْت. 21 ثنْعَاش نِّي ن ثوُّوْرَا نِثنْتِي ذ ثنْعَاش ن جُّوْهَرَاث، كُڒ ثَوَّارْث نتَّاث ذ جُّوْهَر. شَّارِع ن ثنْدِينْت نتَّا ذ دّْهب يصْفَان اَمشْنَاو جَّاج يصْفَان. 22 وَار ࢲْرِيغ شَا ثَمْزِيذَا ثَمقّْرَانْت ذِي ثنْدِينْت نِّي، مَايمِّي؟ لِأَنَّا سِيذِي أَربِّـي إݣ يزمَّرن إِ كُڒْشِي اَك يِزْمَار نِثْنِي إِݣ يدْجَان ذ ثَمْزِيذَا-يَا ثَمقّْرَانْت. 23 ثَنْدِينْت-أَ وَار تحْذِيجِي شَا ثْفَاوْث ن ثْفُوْشْت نِغ ن ثْزِيرِي ڒَاحقَّاش لْعَظَمَا ن أَربِّـي نتَّاث إِي يتݣّن ذِنِّي ثْفَاوْث، ئِزْمَار ذ نتَّا ذ ڒفْنَار نّس. 24 أَذ ؤُيُوْرن ڒݣْنُوْس ذِي ثْفَاوْث نّس، قَا يزدْجِيذن ن ثْمُوْرْث اَذ سِيذْفن لْهِمَّا نْسن ذِي ثنْدِينْت-أَ. 25 ثِوُّوْرَا نّس وَار تْبلِّيعنْت شَا نْهَار يكْمَاڒ قَاع ڒَاحقَّاش وَار ذِنِّي بُو دْجِيڒث. 26 ذِنِّي اَذ سِيذْفن لْهِمَّا ذ ؤُوقَّار ن ڒݣْنُوْس. 27 وَار ذِنِّي تَاذف ؤُڒَا ذ يجّن ن ثْمسْڒَايْث ثْوسّخ نِغ ذ يكْرُوْشَارن نِغ ذ يِنِّي يقَّارن يخرِّيقن. أَذ اَذْفن ذِنِّي غِير يِنِّي غَار دْجَان يسمَاون نْسن زمّْمن ذِي لْكِتَاب ن ثُوْذَارْث ن يِزْمَار. |