لواحي ن يوحنا 20 - ثريفيث 2020شِّيطَان يتْوَاقّن اَڒَاف ن يسݣّْوُوْسَا 1 ࢲْرِيغ يجّن ن لْمَلَاك يهْوَا-د زݣ وجنَّا غَارس ذݣ وفُوْس نّس ڒْمفْتَاح ن ڒَادْجغ بْڒَا ڒَاحدّ ذ يِجّن ن سّنْسْڒث ذ ثَمقّْرَانْت. 2 ئِطّف ونِّي يݣِّين اَم دَّيْنَاصُوْر نتَّا ذ فِيغر نِّي ن زْمَان يعْنِي إِبْڒِيس نِغ ذ شِّيطَان، ئِقّن-يث يحْبس-يث اَڒَاف ن يسݣّْوُوْسَا. 3 ئِنْضَر-يث ذِي ڒَادْجغ بْڒَا ڒَاحدّ، ئِبلّع خَاس ثَوَّارْث يشمّع-يت بَاش سّنِّي اَڒ ثْسَاونْت وَار يخدّع شَا ڒݣْنُوْس اَڒ غَا كمّْڒن اَڒَاف ن يسݣّْوُوْسَا نِّي. منْبَعْد إِ مَانَاينِّي لَابُد اَذ يتْوَاضْڒق شْوَايْت ن ڒْوقْث. 4 ࢲْرِيغ لْعَرْشَاث ذ يِنِّي خَاسن يقِّيمن ثمُّوْش-اَسن سُّلْطَا اَذ حكْمن. ࢲْرِيغ بُوْحْبڒ ن يِنِّي ؤُمِي يتْوَاقسّن يزدْجِيفن لِأَنَّا ذفَّارن مِينْخف يشْهذ عِيْسَى ذ وَاوَاڒ ن أَربِّـي. نِثْنِي تُوْغَاثن وَار سجّْذن شَا إِ ڒْوَحْش نِغ إِ لْأَصْنَام نّس، تُوْغَا وَار قْبِيڒن شَا طَّبَع نّس خ ثنْيَارث نْسن نِغ خ وفُوْس نْسن. كَّرن-د زِي ڒْموْث حكْمن اَك عِيْسَى اَڒَاف ن يسݣّْوُوْسَا. 5 مَانَاينِّي ذ لْقِيَامَا ثَمزْوَارُوْت. ئِمتِّينن نّغْنِي وَار د تكَّرن شَا زِي ڒْموْث حتَّا اَڒ غَا كمّْڒن اَڒَاف ن يسݣّْوُوْسَا. 6 يِنِّي د غَا يكَّرن ذِي لْقِيَامَا ثَمزْوَارُوت سَّعْذ نْسن، أَقَاثن صْفَان. ڒْموْث وِيس ثْنَاين وَار غَارس تِيڒِي شَا سُّلْطَا خَاسن. اَذ يڒِين ذ ڒْفُقَهَا ن أَربِّـي ذ لْمَسِيح، أَكِذس حكْمن اَڒَاف ن يسݣّْوُوْسَا. شِّيطَان يتْوَانْضَار ذِي ڒبْحَر ن ثْمسِّي 7 خْمِي غَا كمّْڒن اَڒَاف ن يسݣّْوُوْسَا نِّي، أَذ د يتْوَاضْڒق شِّيطَان زِي ڒحْبس نّس. 8 أَذ د يفّغ اَذ يخْذع ڒݣْنُوْس خ اَرْبعَا ن جْوَايه ن ثْمُوْرْث، يعْنِي هَاجُوْج أُو مَاجُوْج. أَثن يسْمُوْن اَذ حَارْبن، لْعَدَد نْسن يݣَّا اَم يِيْجْذِي ن ڒبْحَر. 9 نْفيّْضن-د هَاجُوْج أُو مَاجُوْج خ ثْمُوْرْث اَمن-ثكْمَاڒ، نّْضن مَانِي عزّْبن ڒْمُوْمِنِين صَّالِحِين يعْنِي ثَنْدِينْت نِّي يعِيزّن. ڒخْدّنِّي ثهْوَا-د خَاسن ثْمسِّي زݣ وجنَّا ثشّ-يثن. 10 إِبْڒِيس نِّي إِي ثن يخذْعن ئِمنْضَار-د ذِي ڒبْحَر نِّي ن ثْمسِّي ذ ڒكْبْرِيْيث مَانِي يدْجَا ڒْوَحْش نِّي ذ ونِّي يتَارَّان يخف نّس ذ نَّبِي. أَذ تْوَاعدّْبن ذِنِّي نْهَار ذ دْجِيڒث إِ ڒبْدَا ن ڒبْدَاث. يُوْم لْحِسَاب ذ لْعِقَاب 11 ࢲْرِيغ يجّن ن لْعَرْش ذ اَشمْڒَاڒ ذ اَمقّْرَان. ونِّي خَاس يقِّيمن ثَرْوڒ زَّايس ثْمُوْرْث ذ وجنَّا وَار ذَاسن يقِّيم بُو ومْشَان. 12 ࢲْرِيغ يمتِّينن بدّن زَّاث إِ لْعَرْش نِّي اَم ومزْيَان اَم ومقّْرَان. نُوْرْزْمن لْكُتُب، ئِنُوْرْزم يجّن ن لْكِتَاب نّغْنِي نتَّا ذ لْكِتَاب ن ثُوْذَارْث. تْوَاحَاسْبن يمتِّينن س مِين يُوْرِين ذِي لْكُتُب عْلَاحْسَاب ڒخْذَايم نْسن. 13 ڒبْحَر يسلّم يمتِّينن إِݣ يشَّا. ڒْموْث ذ لْأَخِرَا سلّْمنْت يمتِّينن نْسنْت. أُوْشَا كُڒ يجّن اَذ يتْوَاحَاسب عْلَاحْسَاب ڒخْذَايم نّس. 14 ثْمنْضَار-د ڒْموْث ذ لْأَخِرَا ذِي ڒبْحَر ن ثْمسِّي. قَا ڒبْحَر نِّي ن ثْمسِّي نتَّا إِݣ يدْجَان ذ ڒْموْث وِيس ثْنَاين. 15 ونِّي وَار غَار ؤُفِين شَا يسم نّس يزمّم ذِي لْكِتَاب ن ثُوْذَارْث قَا يمنْضَار-د ذِي ڒبْحَر ن ثْمسِّي. |