لواحي ن يوحنا 2 - ثريفيث 2020

ثَبْرَات إِ جْمَاعث ن ڒْمُوْمِنِين ذِي ثنْدِينْت ن ؤُفَسُوْس

¹ "أَرِي-يَاس إِ لْمَلَائِكَا ن جْمَاعث ن ڒْمُوْمِنِين إِي يدْجَان ذِي ثنْدِينْت ن ؤُفَسُوْس، إِنِي-يَاس قَا ونِّي إِي يطّْفن سبْعَا ن يِيثْرَان ذݣ وفُوْس نّس اَفُوْسِي، يݣُّوْر ذي ڒْوسْط ن سبْعَا ن ڒقْنَاذڒ ن دّْهب، ئِقَّار-اَش:

² نش سّْنغ ڒخْذَايم نّش ذ تَمَارَا نّش ذ صّْبَار نّش. سّْنغ وَار ثْقبّْڒذ شَا يِنِّي يدْجَان ذ يعفَّانن، ثْجَرّْبذ يِنِّي يقَّارن قَا نشِّين ذ اَرُّسُل ثُوْفِيذ-ثن سْخرِّيقن وَاهَا.

³ ثصْبَرذ، ثيْسِيذ تَمَارَا عْلَاحْسَاب يسم ينُو بْڒَا مَا ٱذ تَاحْرذ.

⁴ وَلَكِن عيّْبغ خَاش وَامِي ثْسمْحذ ذِي ڒمْحِبّث نّش ثَمزْوَارُوْت.

⁵ فكَّر مشْحَاڒ ثْغلْطذ، تُوْب، اݣّ ڒخْذَايم نّش ثِمزْوُوْرَا. مڒَا ثُوْݣِيذ اَذ تُوْبذ، أَذ د اَسغ غَارك اَذ يْسِيغ ڒْقنْدِيڒ نّش زݣ ومْشَان نّس.

⁶ وَلَكِن ثݣِّيذ مْلِيح وَامِي ثْعِيفّذ ڒخْذَايم ن ينِيْكُوْلَاثن إِي عِيفّغ ؤُڒَا ذ نش.

⁷ صنّط مْلِيح آ ونِّي يتْسْڒَان مِين يقَّار أَرُّوْح ن أَربِّـي إِ ثْجُمَاع ن ڒْمُوْمِنِين. ونِّي غَا يربْحن اَذَاس ؤُشغ اَذ يشّ زِي ثْشجَّارْث ن ثُوْذَارث إِي يدْجَان ذِي جّنّث ن أَربِّـي.

ثَبْرَات إِ جْمَاعث ن ڒْمُوْمِنِين ذِي ثنْدِينْت ن سْمِيْرْنَا

⁸ أَرِي-يَاس إِ لْمَلَائِكَا ن جْمَاعث ن ڒْمُوْمِنِين إِي يدْجَان ذِي ثنْدِينْت ن سْمِيْرْنَا، إِنِي-يَاس قَا ونِّي يدْجَان ذ اَمزْوَارُو ؤُڒَا ذ اَنݣَّارُو، يمُّوْث أُوْشَا يكَّر-د زِي ڒْموْث، ئِقَّار-اَش:

⁹ نش سّْنغ ڒمْحَاين نّش، شك ذ ڒْمسْكِين، وَلَكِن لَّا شك ذ تَّاجَر! سّْنغ ڒْبَاطڒ إِي خَاوم قَّارن يِنِّي يحسّْبن يخف نْسن زِي أَيث-إِسْرَائِيل. لَّا، نِثْنِي وَار دْجِين شَا زِي جْمَاعث ن أَيث-إِسْرَائِيل؛ نِثْنِي غِير ذ يجّن ن جْمَاعث إِݣ يعبّْذن شِّيطَان.

¹⁰ وَار تݣّْوذ شَا زِي مَامّش إِي غَا تْوَاعدّْبذ. أَقَا إِبْڒِيس اَذ يسِيذف ڒبْعَاض زَّايْوم غَار ڒحْبس حمَا اَذ تْوَاجَرّْبم. أَذ تْسعْذُوْم ڒمْحَاين ذي عشْرَايَّام. اَرْنِي ذِي لْإيْمَان نّش وَاخَّا اَش نْغن، نش اَذَاش ؤُشغ تَّاج ن ثُوْذَارْث.

¹¹ صنّط مْلِيح آ ونِّي يتْسْڒَان مِين يقَّار اَرُّوْح ن أَربِّـي إِ ثْجُمَاع ن ڒْمُوْمِنِين. ونِّي غَا يربْحن، وَار ث تْضَرِّي شَا ڒْموْث نِّي وِيس ثْنَاين.

ثَبْرَات إِ جْمَاعث ن ڒْمُوْمِنِين ذِي ثنْدِينْت ن بَرْغَامُوْس

¹² أَرِي-يَاس إِ لْمَلَائِكَا ن جْمَاعث ن ڒْمُوْمِنِين إِي يدْجَان ذِي ثنْدِينْت ن بَرْغَامُوْس، إِنِي-يَاس قَا ونِّي غَار يدْجَا سِّيف يقْضع خ ثْنَاين ن جِّهَاث، ئِقَّار-اَش:

¹³ نش سّْنغ مَانِي ثْزدّْغذ، ذِنِّي لْعَرْش ن شِّيطَان. شك تطّْفذ ذݣ يِيسم ينُو. وَار ثنْكَرذ شَا لْإِيْمَان إِي زَّايِي ثݣِّيذ، وَاخَّا ذݣ وُوْسَّان نِّي إِي ذِي نْغِين يجّن ن شَّهِيذ ينُو ذَايس ڒَامَان قَّارن-اَس أَنْتِپَـاس. نْغِين-ث زَّاثْوم مَانِي يزدّغ شِّيطَان.

¹⁴ وَلَكِن عيّْبغ خَاش شَان ثْمسْڒَايِين وَامِي اَكِذش شَان يوْذَان إِي تْبَاعن تَّعْلِيم ن بَلْعَام. نتَّا تُوْغَا يسْڒمَاذ-اَس إ بَارَاك مَامّش غا يݣّ ثَخْشبْث إِ اَيث-إِسْرَائِيل بَاش اَذ شّن دْبِيحث يتْقدَّامن إِ لْأَصْنَام اَذ فسْذن.

¹⁵ عَاوذ اَكِذش شَان يِوْذَان إِي تْبَاعن تَّعْلِيم ن ينِيْكُوْلَاثن.

¹⁶ تُوْب! مڒَا لَّا، أَغَارك د اَسغ ذغْيَا وَار تْعطَّاڒغ شَا، أَذ حَارْبغ يوْذَان-أَ س سِّيف إِي د يتفّْغن زݣ وقمُّوْم ينُو.

¹⁷ صنّط مْلِيح آ ونِّي يتْسْڒَان مِين يقَّار أَرُّوْح ن أَربِّـي إِ ثْجُمَاع ن ڒْمُوْمِنِين. ونِّي غَا يربْحن، أَذَاس ؤُشغ اَذ يشّ اَغْرُوْم ن لْمَنَّا ونِّي يتْوَاسْنُوْفّرن. أَذَاس ؤُشغ اَزْرُو ذ اَشمْڒَاڒ يُوْرَا ذَايس يجّن ن يِيسم ذ جْذِيذ وَار ث يسِّين حَدّ إِلَّا ونِّي إِي ث غَا يقبْڒن.

ثَبْرَات إِ جْمَاعث ن ڒْمُوْمِنِين ذِي ثنْدِينْت ن ثِيَاتْرَا

¹⁸ أَرِي-يَاس إِ لْمَلَائِكَا ن جْمَاعث ن ڒْمُوْمِنِين إِي يدْجَان ذِي ثنْدِينْت ن ثِيَاتْرَا، إِنِي-يَاس قَا ونِّي يدْجَان ذ مِّيس ن أَربِّـي، ثِيطَّاوِين نّس ݣِّينْت اَم ؤُحَذُوْق ن ثْمسِّي، ئِضَارن نّس ݣِّين اَم نّحَّاس يصْفَان، ئِقَّار-اَش:

¹⁹ نش سّْنغ ڒخْذَايم نّش ذ ڒمْحِبّث نّش ذ لإِيْمَان نّش ذ صّْبَار نّش قَا سّْنغ ڒخْذَايم نّش ثِنݣُّوْرَا كْتَار زِي ثِنِّي ثِمزْوُوْرَا.

²⁰ وَلَكِن عيّْبغ خَاش وَامِي ثجِّيذ إِزَابِيل ثَمْغَارْث تَارَّا يخف نّس ذ نَّبِـيَا. ثْخدّع لْعِبَاد ينُو، ثْسڒْمَاذ-يثن اَذ فسْذن، أَذ شّن زِي دْبِيحث يتْقدَّامن إِ لأَصْنَام.

²¹ ؤُشِيغ-اَس ڒْوقْث اَذ تْتُوْب زِي لْفَسَاد نّس، وَلَكِن ثُوْݣِي اَذ تْتُوْب.

²² س مَانَاينِّي اَت نضَرغ ذِي ثَاسُّوْث ن ڒحْڒِيق ذ يِنِّي اَكِذس غَا يزْنَان مڒَا وَار تُوْبن شَا زِي ڒفْعَايڒ نْسن اَتَاف اَثن نْضَرغ ذِي ڒمْحَاين.

²³ أَذ نْغغ ثَارْوَا نّس. أَذْ سّْنن مَارَّا ثِجُمَاع ن ڒْمُوْمِنِين بلِّي ذ نش إِݣ يتْميَّازن مِين ذَايس ذِي ڒَعْقڒ ذ وُوْڒ. كُڒ يجّن زَّايْوم اَذَاس ؤُشغ عْلَاحْسَاب ڒخْذَايم نّس.

²⁴ أَمَّا كنِّيو نّغْنِي إِي يدْجَان ذِي ثِيَاتْرَا وَار ثقْبِيڒم شَا تَّعْلِيم نِّي وَار ثسِّينم شَا مَانَاينِّي ؤُمِي قَّارن يِوْذَان <لْأَسْرَار ن شِّيطَان يُودْجْغن.> قَّارغ-اَوم نش وَار خَاوم تݣّغ بُو شَا ن دْقڒ نّغْنِي.

²⁵ إِنَّمَا، لْإِيمَان نْوم طّْفم ذَايس مْلِيح وَاهَا اَڒ د غَا اَسغ.

^26-27 ونِّي غَا يربْحن ذ ونِّي غَا يصْبَرن ذِي ڒْخذْمث ينُو حتَّا اَڒ ونݣَّارُو اَذَاس ؤُشغ نش سُّلْطَا خ ڒݣْنُوْس، أَمّش ذَايِي ثمُّوْش إِ نش زِي بَابَا: أَثن يَرْوس س وعكَّاز ن ڒحْذِيذ، أَثن يرز اَم يقْنُوْشن ن وشَاڒ.

²⁸ أَذَاس ؤُشغ يثْرِي ن ڒفْجَر.

²⁹ صنّط مْلِيح آ ونِّي يتْسْڒَان مِين يقَّار اَرُّوح ن أَربِّـي إِ ثْجُمَاع ن ڒْمُوْمِنِين.