لواحي ن يوحنا 19 - ثريفيث 2020سَّعْذ ن يِنِّي يتْوَاعَرْضن غَار ومنْسِي ن ڒْفَارْح ن يِزْمَار 1 منْبَعْد إِ مَانَايَا سْڒِيغ إِ يِجّن ن ثْمِيجَّا اَمشْنَاو صُّوْت ن وَاطَّاس ن يِوْذَان يدْجَان ذݣ وجنَّا، ثقَّار س جّْهذ: "حمْذث أَربِّـي! أَسنْجم ذ لْعَظَمَا ذ جّْهذ إِ أَربِّـي نّغ. 2 ڒحْكَام نّس ذ ڒْحَقّ يدْجَا نِيشَان. ئِحَاسب لْفَسْدَا ثَمقّْرَانْت إِݣ يسفْسَاذن ثَمُوْرْث س لْفَسَاد نّس، ئِنْتَاقم زَّايس عْلَاحْسَاب يذَامّن ن يِنِّي يعبّْذن أَربِّـي." 3 نَّان ثْوَاڒَا وِيس ثْنَاين: "حمْذث أَربِّـي! دّخَّان نّس يتْݣَعَّاذ إِ ڒبْدَا ن ڒبْدَاث." 4 اَرْبعَا و عِشْرِين ن يمْغَارن ذ اَرْبعَا ن لْمخْلُوْقَاث سجّْذن إِ أَربِّـي يقِّيمن خ لْعَرْش، قَّارن: "آمِين! حمْذث أَربِّـي!" 5 ثُوْسَا-د يجّن ن ثْمِيجَّا زِي لْعَرْش ثقَّار: "حمْذث أَربِّـي يَا لْعِبَاد نّس مَارَّا، آ يِنِّي ث يتݣّْوْذن س ؤُمزْيَان ذ ؤُمقّْرَان!" 6 سْڒِيغ إِ يِجّن ن صُّوْت اَم صُّوْت ن وَاطَّاس ن ڒْغَاشِي نِغ اَم صُّوْت ن وَاطَّاس ن وَامَان نِغ اَم صُّوْت ن وَاجَّاج يجهْذن، ئِقَّار: "حمْذث أَربِّـي! سِيذِي أَربِّـي نّغ إِݣ يزمَّرن إِ كُڒْشِي قَا يحكّم. 7 يَالَّاهم أَ نْفَرْحث، أَ نزْهُوْث، أَث نْسمْغَارث! ڒْفَارْح ن يِزْمَار اَقَّا يُوْوض-د، ثَسْڒِيث نّس قَا ثْسوْجذ يخف نّس. 8 ئِمُّوْش-اَس اَخَاس ثݣّ ڒْكتَّان ن لُوْلَان اَصبْحَان، يرقّْ، يصْفَا." (ڒْكتَّان ن لُوْلَان اَصبْحَان يعْنِي نتَّا ذ ڒخْذَايم إِݣ يدْجَان نِيشَان ن ڒْمُوْمِنِين صَّالِحِين.) 9 ينَّا-ٱيِي لْمَلَاك ونِّي: "أَرِي مَانَايَا: سَّعْذ ن يِنِّي يتْوَاعَرْضن غَار ومنْسِي ن ڒْفَارْح ن يِزْمَار!" ينَّا-ٱيِي عَاوذ: "أَوَاڒن-أَ دْجَان ذ صَّح زِي أَربِّـي." 10 وْضِيغ-اَس غَار يضَارن نّس حمَا اَذَاس سجّْذغ. ئِنْدق-د ينَّا-ٱيِي: "لَّا! قَا نش ذ ڒْعَبْذ اَم نش اَم شك اَم اَيْثْمَاش إِي طّْفن خ مِينْخف يشْهذ عِيْسَى. سجّذ-اَس إِ أَربِّـي! ڒَاحقَّاش مِينْخف يشْهذ عِيْسَى نتَّا ذ اَرُّوْح ن لْأَنْبِيَا." ونِّي ينْيِيْن خ ؤُيِيْس ذ اَشمْڒَاڒ 11 ࢲْرِيغ اَجنَّا ينُوْرْزم ذِنِّي يجّن ن ؤُيِيْس ذ اَشمْڒَاڒ، ونِّي خَاس ينْيِيْن قَّارن-اَس ڒَامَان ذ ڒْحَقّ. ئِتْحَاسَاب يتْحَرَاب س ڒْحَقّ. 12 ثِيطَّاوِين نّس اَم ؤُحَذُوْق ن ثْمسِّي، خ ؤُزدْجِيف نّس اَطَّاس ن تَّاجَاث. يُوْرَا خَاس يجّن ن يِيسم وَار ث يسِّين حَدّ إِلَّا نتَّا. 13 ئِݣَّا خَاس يجّن ن تْشَامِّير يغضْسن ذݣ يذَامّن، س يِيْسم تْڒَاغَان-اَس أَوَاڒ ن أَربِّـي. 14 ڒْعَسْكَار ن وجنَّا ذفَّارن-ث نْيِيْن خ يِيْسَان ذ يشمْڒَاڒن، ݣِّين اَرُّوْض ن ڒْكتَّان ن لُوْلَان اَصبْحَان ذ اَشمْڒَاڒ ينْقَا. 15 ئِتفّغ-د زݣ وقمُّوْم نّس يجّن ن سِّيف يقْضع، اَزَّايس يُوْوث ڒݣْنُوْس. نتَّا اَثن يَرْوس س وعكَّاز نْ ڒحْذِيذ، اَخَاسن يعفّس ذِي ثْسِيرْث ن وَامَان ن وضِيڒ يعْنِي ذ لْعِقَاب اَمقّْرَان ن أَربِّـي إِݣ يزمَّرن إِ كُڒْشِي. 16 يُوْرَا خ وتْشَامِّير ذ ؤُمصَّاض نّس يجّن ن يِيْسم يعْنِي ذ أَزدْجِيذ ن يزدْجِيذن ذ مَوْلَانَا ن مَوْلَانَاث. 17 ࢲْرِيغ يجّن ن لْمَلَاك يبدّ خ ثْفُوْشْت، ئِسْنكَّر ثْغُوْيِّيْث س جّْهذ يقَّار-اَسن إِ مَارَّا يجْضَاض يطَّاون ذِي ڒْوسْط ن وجنَّا: "أَرَاحم-د، مُوْنث غَار ؤُمنْسِي اَمقّْرَان ن أَربِّـي 18 حمَا اَذ تشّم اَيْسُوْم ن يزدْجِيذن ذ ويْسُوْم ن اَرُّوْيَاس ن ڒْعَسْكَار ذ ويْسُوْم ن يِنِّي يجهْذن ذ ويْسُوْم ن يِيْسَان ذ يِنِّي خَاسن ينْيِيْن ذ ويْسُوْم ن مَارَّا يِوْذَان يعْنِي ذ يِنِّي غَار يدْجَا بَاب نْسن ذ يِنِّي غَار ثدْجَا لْحُرِّيَا نْسن، س ؤُمزْيَان ذ ؤُمقّْرَان." 19 ࢲْرِيغ ڒْوَحْش ذ يزدْجِيذن ن ثْمُوْرْث ذ ڒْعَسْكَار نْسن نْجمْعن حمَا اَذ حَارْبن ونِّي ينْيِيْن خ ؤُيِيْس ذ ڒْعَسْكَار نّس. 20 يتْوَاطّف ڒْوَحْش ذ اَمحْبُوْس، أَكِذس ونِّي يتَارَّان يخف نس ذ نَّبِي إي تُوْغَا يتݣّن لْمُعْجِزَاث زَّاث إِ ڒْوَحْش. س لْمُعْجِزَاث نِّي يخْذع يِنِّي إِي ذِي يدْجَا طَّبَع ن ڒْوَحْش تْسجَّاذن-اَس إِ لْأَصْنَام نّس. ڒْوَحْش ذ ونِّي يتَارَّان يخف نّس ذ نَّبِي منْضَارن س ثْنَاين إِذْسن ذِي ڒبْحَر ن ثْمسِّي يرقّن س ڒكْبْرِيْيث أُو نِثْنِي اَقَاثن عَاذ س بُوْحْبڒ نْسن. 21 سِّيف نِّي إِي د يفّْغن زݣ وقمُّوْم ن ونِّي ينْيِيْن خ ؤُيِيْس ينْغَا مَارَّا يِنِّي يقِّيمن، ؤُسِين-د يِجْضَاض جِّيْوْنن مَارَّا زݣ ويْسُوْم نْسن. |