لواحي ن يوحنا 18 - ثريفيث 2020ثَنْدِينْت ن بَابِل ثْوطَّا 1 منْبَعْد إِ مَانَايَا ࢲْرِيغ يجّن ن لْمَلَاك نّغْنِي يهْوَا-د زݣ وجنَّا غَارس سُّلْطَا ذ ثَمقّْرَانْت. ثْشعْشع ثْمُوْرْث س نُّوْر ن لْعَظَمَا ن لْمَلَاك نِّي. 2 ئِسْنكَّر ثْغُويِّث س جّْهذ ينَّا: "قَا ثوْضَا قَا ثوْضَا بَابِل ثَمقّْرَانْت! ثذْوڒ ذ ثَزدِّيغْث ن شَّيَاطِين، ذ ثَنْوَاڒْث إِ مْكُڒ جّنّ اَعفَّان، ذ اَخْبُوْش إِ مْكُڒ اَجْضِيض إِݣ يدْجَان حْرَام إِݣ يعِيفّن. 3 ڒَاحقَّاش مَارَّا ڒݣْنُوْس سْوِين زݣ وَامَان ن وضِيڒ ن لْفَسَاد نّس وَار يحْڒِي، فسْذن اَكِذس يزدْجِيذن ن ثْمُوْرْث. يسبَّابن ن ثْمُوْرْث ؤُوِين-د اَطَّاس ن وَاݣْڒَا زݣ وفلّس نّس اَمقّْرَان." 4 سْڒِيغ إِ يِجّن ن ثْمِيجَّا نّغْنِي زݣ وجنَّا ثقَّار: "فّْغم زِي ثنْدِينْت نِّي يَا شَّعْب ينُو حمَا وَار ثْشَرّْشم شَا ذِي ڒْمُعْصِيَاث نّس، حمَا وَار كنِّيو تڒْقِيفنْت شَا لْمُصِيبَاث نّس. 5 ڒْمُعْصِيَاث نّس اَرْنِينْت حتَّا اَڒ وَامِي ؤُوْضنْت غَار وجنَّا، أَربِّـي وَار يتُّو شَا شَّرّْ نّس. 6 أَرّم-اَس مِين ذَاوم ثݣَّا نتَّاث، دُوْبْلَام-اَس ثْنَاين ن ثْوَاڒَاثِين ڒفْعَايڒ نّس. ڒْكَاس نِّي إِي زِي ثْسسّو إِ يِوْذَان، سسّْوم-اَس-ث مَارْثَاين. 7 مشْحَاڒ مَا ثْسمْغَار يخف نّس، مشْحَاڒ مَا ثْعِيش ذِي شّهْوث نّس، أَنشْتـنِّي إِي ت غَا ثْعدّْبم، أَنشْتـنِّي إِي ت غَا ثسْخيّْقم. لِأَنَّا نتَّاث ثقَّار ذݣ وُوڒ نّس: أَقَا قِّيمغ ذَا اَم لْمَلِكَا، نش وَار دْجِيغ شَا ذ ثَاجَّاڒْث، عمَّارْص أذ حزْنغ. 8 خ مَانَايَا اَخَاس د مُوْننْت لْمُصِيبَاث ذݣ يِجّن ن نْهَار، يعْنِي ڒْموْث ذ لْحُزن ذ بُوْهيُّوْف. أَذ تحرق س ثْمسِّي ڒَاحقَّاش سِيذِي أَربِّـي إِي خَاس غَا يحكْمن نتَّا يجْهذ. 9 ئِزدْجِيذن ن ثْمُوْرْث إِي كِذس يفسّْذن إِي كِذس يتْعِيشن ذِي شّهْوث نّس، أَخَاس رُون اَخَاس حزْنن خْمِي غَا ࢲرن دّخَّان ن ثْمسِّي نّس. 10 أَذ بدّن غَار ڒݣّْوَاج س ثِيݣّْوْذِي ن ڒَعْذَاب نّس نِثْنِي قَّارن: يَا لَطِيف، يَا لَطِيف! يَا ثَنْدِينْت ثَمقّْرَانْت، يَا بَابِل ثَنْدِينْت يجهْذن! ذݣ يِجّن ن ثْسَعَّات يهْوَا-د خَام لْحِسَاب ذ لْعِقَاب! 11 ئِسبَّابن ن ثْمُوْرْث اَخَاس رُوْن اَخَاس حزْنن ڒَاحقَّاش سّڒْعَث نْسن وَار تِيفن وِي ت غَا يسْغن. 12 سّڒْعَث نِّي ن دّْهب، ذ نُّقَارْث، ذ لْوِيز، ذ جُّوْهَر، ذ ڒْكتَّان ن لُوْلَان اَصبْحَان، ذ ڒْكتَّان ݣْرُوْنَا، ذ ڒحْرِير، ذ ڒْكتَّان اَزݣّْوَاغ يحذْقن، ذ مَارَّا مِين يتْوَاصنّْعن س وكشُّوْض ن ومضْزِي، ذ مَارَّا مِين يتْوَاصنّْعن س يغمُّوْزن ن لْفِيل، ذ مَارَّا مِين يتْوَاسنّْعن س وكشُّوْض يغْڒَان، ذ نّحَّاس، ذ ڒحْذِيذ، ذ مَارْمُو، 13 ذ ڒْقَرْفَا، ذ لْعِطَر، ذ تْبَخُوْر، ذ مُوْرّْ، ذ تْبَخُوْر لْلُبَان، ذ وَامَان ن وضِيڒ، ذ زّشْت، ذ وَارن لْفُرْس، ذ يِرْذَان، ذ يفُوْنَاسن، ذ يحُوْڒِيْين، ذ يِيْسَان، ذ يكَارُّوْثن، ذ يسمْغَان يعْنِي يوْذَان. 14 أَذَاس ينِين يسبَّابن: مِين ثْعشّق شّهْوث نّمْ وَار ث تِيفذ شَا. مَارَّا اَݣْڒَا ذ ڒْخِير نّمْ اَذ يقْضَا، عمَّارْص اَذ د يذْوڒ. 15 ئِسبَّابن نِّي إِي كِذس ݣِّين اَݣْڒَا س سّڒْعَاث نِّي اَذ بدّن غَار ڒݣّْوَاج س ثِيݣّْوْذِي زِي ڒَعْذَاب نِّي، أَذ رُوْن اَذ حزْنن. 16 أَذ ينِين: يَا لَطِيف، يَا لَطِيف! قَا ثَنْذِينْت-أَ ثَمقّْرَانْت، تُوْغَا خَاس ڒْكتَّان ن لُوْلَان اَصبْحَان ذ ڒْكتَّان ݣْرُوْنَا ذ ڒْكتَّان اَزݣّْوَاغ يحذْقن، ثْزوّق يخف نّس س دّْهب ثݣَّا لْوِيز ذ جُّوْهَر! 17 ئِرُوْح مَارَّا مَانَاينِّي ذݣ يِجّن ن ثْسَعَّات وَاهَا! أَرُّوْيَاس ن يغَرُّوْبَا ذ يِنِّي يتْسَفَارن ذݣ وغَرَّابُو ذ يبحْرِيْين ذ مَارَّا يِنِّي يتْعِيشن زِي ڒبْحَر بدّن غَار ڒݣّْوَاج، 18 خْزَرن غَار دّخَّان ن ؤُحْرَاق نّس. قَّارن س جّْهذ: مَان ثَنْدِينْت إِݣ يدْجَان نتَّاث اَم ثنْدِينْت-أَ ثَمقّْرَانْت؟ 19 نطَّارن شَاڒ خ يزدْجِيفن نْسن، سْغُوْيِون، تْرُوْن، حزّْنن، قَّارن: يَا لَطِيف، يَا لَطِيف ن ثنْذِينْت ثَمقّْرَانْت! أَيثْبَاب ن يغَرُّوْبَا ذِي ڒبْحَر تُوْغَا ذوْڒن ذ تْوَاجَر لِأَنَّا ثَنْدِينْت ذَايس اَݣْڒَا اَطَّاس! ذݣ يِجّن ن ثْسَعَّات كُڒْشِي يرُوْح! 20 آي اَجنَّا، فَرح خ وهْذَام نّس، فَرْحم آ ڒْمُوْمِنِين صَّالِحِين ذ اَرُّسُل ذ لْأَنْبِيَا! أَقَا يحَاسب-يت أَربِّـي خ مِين ذَاوم ثݣَّا." 21 ئِجّن ن لْمَلَاك يجْهذ ييْسِي-د يجّن ن وزْرُو يݣَّا اَم وزْرُو ن ثْسِيرْث ثَمقّْرَانْت، ئِنْضَر-يث ذِي ڒبْحَر ينَّا: "أَمُّو س جّْهذ إِي غَا ثْمنْضَار بَابِل ثَنْدِينْت ثَمقّْرَانْت، وَار يتِيڒِي شَا عمَّارْص. 22 زِي سَّا اَڒ ثْسَاونْت عمَّارْص اَذَايم تسْڒَان إِ صُّوْت ن يمذْيَازن ذ يِنِّي يشَّاثن ذِي ثْݣَامْبْريِت ذ يِنِّي يتْصُوْضن ذِي زَّامَّار ذ ثمْجَا. عمَّارْص اَذَايم يڒِين يِنِّي يتْصنَّاعن مَامّش مَا ثݣَّا صّنْعَث نْسن. عمَّارْص اَذَايم تسْڒَان إِ صُّوْت ن ثْسِيرْث. 23 عمَّارْص اَذَايم ثْشعّڒ ثْفَاوْث ن ڒْقنْدِيڒ. عمَّارْص اَذَايم تسْڒَان إِ صُّوْت ن مُوْڒَاي ذ ثْسْڒِيث. أَقَا يسبَّابن نّمْ تُوْغَا دْجَان ذ يمقّْرَانن ن ثْمُوْرْث، س سِّحر نّمْ ثْخذْعذ مَارَّا ڒݣْنُوْس. 24 إِيوَا ذِي ثنْدِينْت-أَ إِݣ ؤُفِين يذَامّن ن لْأَنْبِيَا ذ ڒْمُوْمِنِين صَّالِحِين ذ مَارَّا يِنِّي يتْوَانْغن ذِي ثْمُوْرْث." |