لواحي ن يوحنا 17 - ثريفيث 2020

لْفَسْدَا ثَمقّْرَانْت ذ ڒْوَحْش

¹ يُوْسَا-د غَارِي يجّن زِي سبْعَا ن لْمَلَائِكَاث نِّي إِي غَار دْجَانْت سبْعَا ن ثْمجْمَارِين ينَّا-ٱيِي: "أَرَاح-د، أَذَاش د سْمظْهَارغ لْحِسَاب ذ لْعِقَاب ن لْفَسْدَا ثَمقّْرَانْت إِݣ يقِّيمن خ وَاطَّاس ن وَامَان.

² فسْذن اَكِذس يزدْجِيذن ن ثْمُوْرْث أُو عَاوذ يمزْذَاغ ن ثْمُوْرْث سْكَارن س وَامَان وضِيڒ يعْنِي لْفَسَاد نّس."

³ لْمَلَاك نِّي ييْسِي-اَيِي اَرُّوْح غَار ڒخْڒَا، ࢲْرِيغ يجّن ن ثمْغَارْث ثنْيَا خ يِجّن ن ڒْوَحْش ذ اَزݣّْوَاغ يحذْقن يعمَّر س يِيسمَاون وَار يحْڒِين خ أَربِّـي. غَارس سبْعَا ن يقيُّوْعن ذ عشْرَا ن وَاشَّاون.

⁴ ثَمْغَارْث-أَ ثݣَّا اَرُّوْض ذ ݣْرُوْنَا ذ وزݣّْوَاغ يحذْقن. ثْزوّق س دّْهب ثݣَّا ثِعقَّايِين إِي يغْڒَان ذ جُّوْهَر. ذݣ وفُوْس نّس يجّن ن ڒْكَاس ن دّْهب يعمَّر س ثُوْعُوْفّْنَا ذ مِين يدْجَان حْرَام ن لْفَسَاد نّس.

⁵ خ ثنْيَارْث نّس يُوْرَا ذِنِّي يجّن ن يِيسم: بَابِل ثَمقّْرَانْت، ذ يمَّاثْسنْت ن لْفَسْدَاث ذ ثُوْعُوْفّْنَا ن ثْمُوْرْث. وَلَكِن ڒْمَعْنَا نّس وَار ث يفهّم حَدّ.

⁶ ࢲْرِيغ ثَمْغَارْث نِّي ثْسكَّر س يذَامّن ن ڒْمُوْمِنِين صَّالِحِين ذ يذَامّن ن يِنِّي يشهّْذن خ عِيْسَى. وَامِي ت ࢲْرِيغ ذهْشغ اَطَّاس.

⁷ ينَّا-ٱيِي لْمَلَاك نِّي: "مَايمِّي تْذهَّاشذ اَمُّو؟ أَذَاش شرّْحغ ڒْمَعْنَا ينُوْفَّرن ثمْغَارْث نِّي ذ ڒْمَعْنَا ينُوْفَّرن ن ڒْوَحْش نِّي ونِّي غَار يدْجَا سبْعَا ن يقيُّوْعن ذ عشْرَا ن وَاشَّاون إِي خف ثنْيَا.

⁸ ڒْوَحْش نِّي إِي ثࢲْرِيذ تُوْغَا يدْجَا، ڒخُّو وَار يدْجِي شَا، عْڒَاين اَذ د يݣَعّذ زِي ڒَادْجغ بْڒَا ڒَاحدّ اَذ يتْوَاهْذم. ئِمزْذَاغ ن ثْمُوْرْث خْمِي غَا ࢲرن ڒْوَحْش نِّي أَتَاف اَذ دهْشن يعْنِي كُڒ يجّن يسم نّس وَار يزمّم شَا زݣ وَامِي ثدْجَا دُّنشْت ذِي لْكِتَاب ن ثُوْذَارْث. ڒَاحقَّاش ڒْوَحْش نِّي تُوْغَا يدْجَا، ڒخُّو وَار يدْجِي شَا، عَاذ اَذ د يَاس.

⁹ ذِي مَانَايَا لَابُد ڒفْهَامث: سبْعَا ن يقيُّوْعن نِثْنِي ذ سبْعَا ن يذُوْرَار إِي خف ثقِّيم ثمْغَارْث-أَ، أُو عَاوذ نِثْنِي ذ سبْعَا ن يزدْجِيذن.

¹⁰ خمْسَا زَّايْسن وْضَان، ئِجّن يدْجَا، ئِجّن عَاذ وَار د يُوْسِي شَا. خْمِي د غَا يَاس اَتَاف اَذ يقِّيم غِير شْوَايْت ن ڒْوقْث وَاهَا.

¹¹ ڒْوَحْش نِّي إِي تُوْغَا يدْجَان، ڒخُّو وَار يدْجِي شَا، نتَّا ذ وِيس ثْمنْيَا نتَّا عَاوذ ذ يجّن زِي سبْعَا نِّي قَا يݣُّوْر اَذ يتْوَاهْذم.

¹² عشْرَا نِّي ن وَاشَّاون إِي ثࢲْرِيذ نِثْنِي ذ عشْرَا ن يزدْجِيذن عَاذ وَار ذَاسن ثمُّوْش شَا سُّلْطَا اَذ حكْمن. أَذَاسن ثمُّوْش سُّلْطَا اَذ حكْمن يجّن ن ڒْوقْث ذ ثَمزْيَانْت وَاهَا اَك ڒْوَحْش.

¹³ يِيْنَا تَافَاقن اَذَاس ؤُشن إِ ڒْوَحْش جّْهذ نْسن ذ سُّلْطَا نْسن.

¹⁴ نِثْنِي اَذ حَارْبن يزْمَار وَلَكِن نتَّا اَثن يغْڒب؛ قَا نتَّا ذ مَوْلَانَا ن مَوْلَانَاث ذ أَزدْجِيذ ن يزدْجِيذن، يِنِّي إِي كِذس يدْجَان يڒَاغَا-يَاسن-د أَربِّـي يخْضَر-يثن، ذَايْسن يدْجَا ڒَامَان."

¹⁵ ينَّا-ٱيِي لْمَلَاك نِّي: "أَمَان نِّي إِي ثࢲْرِيذ مَانِي ثقِّيم لْفَسْدَا نِّي، نِثْنِي مِين عْنَان؟ نِثْنِي ذ يوْذَان زِي مْكُڒ شَّعْب ذ ڒْغَاشِي ذ ڒْݣنْس ذ لُّغَا.

¹⁶ عشْرَا ن وَاشَّاون نِّي إِي ثࢲْرِيذ أُو ذ ڒْوَحْش نِّي اَذ عِيفّن لْفَسْدَا، أَذَاس كّْسن مَارَّا مِين غَارس اَت جّن ذ ثَعرْيَانْت. أَذ شّن اَيْسُوْم نّس، أَت سْحرْقن س ثْمسِّي.

¹⁷ ڒَاحقَّاش ذ أَربِّـي إِݣ يسْمُوْنن ؤُڒَاون نْسن حمَا اَذَاس ݣّن ڒْخَاضَر إِ أَربِّـي، يعْنِي اَذ تَافْقن اَذَاس ؤُشن إِ ڒْوَحْش ڒحْكَام نْسن حتَّا اَڒ إِي غَا تْوَاكمّْڒن وَاوَاڒن ن أَربِّـي.

¹⁸ ثَمْغَارْث نِّي إِي ثࢲْرِيذ نتَّاث ذ ثَنْدِينْت ثَمقّْرَانْت إِݣ يتحْكَامن خ يزدْجِيذن ن ثْمُوْرْث."