لواحي ن يوحنا 12 - ثريفيث 2020

ثَمْغَارْث أُو ذ يجّن ن ڒْوَحْش اَم دَّيْنَاصُوْر

¹ ثْمظْهَار-د يجّن ن لْعَلَامَا ذݣ وجنَّا ذ ثَمقّْرَانْت، يعْنِي ثَمْغَارْث ثنّض-اَس-د ثْفُوْشْت، سْوَادَّاي يضَارن نّس ثَزِيرِي، خ وزدْجِيف نّس يجّن ن تَّاج ذَايس ثنْعَاش ن يِيثْرَان.

² أَقَات س وعدِّيس ثسْغُوْيِو س ڒحْرِيق ن ثَارْوَا، تْعدَّاب أُو نتَّاث تَارو.

³ ثْمظْهَار-د ذݣ وجنَّا يجّن ن لْعَلَامَا نّغْنِي ثݣَّا اَم دَّيْنَاصُوْر ذ اَمقّْرَان ذ اَزݣّْوَاغ غَارس سبْعَا ن يزدْجِيفن ذ عشْرَا ن وَاشَّاون، ذ سبْعَا ن تَّاجَاث خ يزدْجِيفن نّس.

⁴ ئِجَرّ س وعنَّاب نّس تُلُث ن يِيثْرَان وجنَّا، ئِنْضَر-يثن غَار ثْمُوْرْث. ئِبدّ بُو-سبْعَا-يَا-يزدْجِيفن زَّاث إِ ثمْغَارْث نِّي أُو نتَّاث تَارو حمَا خْمِي ث غَا ثَارو اَذَاس يشّ مِّيس.

⁵ ثُوْرو-د اَحنْجِير ذ اَوْثم أُو ذ نتَّا إِي غَا يَروْسن مَارَّا ڒݣْنُوْس س وعكَّاز ن ڒحْذِيذ. سّنِّي يتْوَارْفع غَار أَربِّـي غَار لْعَرْش نّس.

⁶ ثمْغَارْث-أَ ثَرْوڒ غَار ڒخْڒَا مَانِي ذَاس يسوْجذ أَربِّـي اَمْشَان اَت سشّن ذِنِّي اَڒَاف أُو مِيَّاتَاين أُو ستِّين يُوْم.

⁷ ئِوْقع ڒْحَرْب ذݣ وجنَّا. مِيكَائِيل ذ لْمَلَائِكَاث نّس حَارْبن بُو-سبْعَا يزدْجِيفن. بُو-سبْعَا-يَا يزدْجِيفن ذ شَّيَاطِين نّس حَارْبن عَاوذ ؤُڒَا ذ نِثْنِي.

⁸ وَار ذَاسنْت زمَّرن إِ لْمَلَائِكَاث نِّي، بُو-سبْعَا-يَا يزدْجِيفن ذ شَّيَاطِين نّس ضيّْعن اَمْشَان نْسن ذݣ وجنَّا.

⁹ ئِمنْضَار-د زݣ وجنَّا بُو-سبْعَا-يَا يزدْجِيفن اَمقّْرَان، يعْنِي فِيغر نِّي ذِي زْمَان ونِّي ؤُمِي قَّارن إِبْڒِيس نِغ ذ شِّيطَان يعْنِي ونِّي يخدّْعن مَارَّا دُّنشْت. ئِمنْضَار-د غَار ثْمُوْرْث، منْضَارن-د اَكِذس شَّيَاطِين نّس.

¹⁰ سْڒِيغ إِ يِجّن ن ثْمِيجَّا ذݣ وجنَّا ثقَّار س جّْهذ: "ڒخُّو أَربِّـي نّغ يسنْجَام، ئِمظْهَار جّْهذ ذ ڒْمُلْك نّس، ذ سُّلْطَا ن لْمَسِيح نّس. ڒَاحقَّاش ونِّي يتْشثْشَان زݣ اَيْثْمَاثْنغ يمنْضَار-د غَار ثْمُوْرْث، ذ نتَّا إِݣ يتْشثْشَان زَّايْسن دْجِيڒث ذ نْهَار غَار أَربِّـي نّغ.

¹¹ غڒْبن-ث اَيثْمَاثْنغ س يذَامّن ن يِزْمَار ذ شْهَاذث نْسن. ثُوْذَارْث نْسن وَار خَاسن ثْعِيزّ شَا، وجْذن اَذ مّْثن.

¹² خ مَانَايَا، فَرح آي اَجنَّا، ذ يِنِّي ذَايس يزدّْغن! وَلَكِن يَا تَمَارَا خ يمزْذَاغ ن ڒْبَرّ ذ ڒبْحَر! إِبْڒِيس يهْوَا-د غَارْوم يغْضب اَطَّاس، مِينْزِي يسّن ثقِّيم-اَس ذْرُوْس ن ڒْوقْث."

¹³ وَامِي بُو-سبْعَا يزدْجِيفن يُوْفَا يخف نّس يمنْضَار-د غَار ثْمُوْرْث، ئِكَّر يُوْزّڒ خ ثمْغَارْث نِّي إِي د يجِّين اَوْثم.

¹⁴ ثَمْغَارْث نِّي مُّوْشن-اَس ثْنَاين ن وَافْرِيْون ن نْسر اَمقّْرَان حمَا اَزَّايْسن ثْضو غَار ڒخْڒَا غَار ؤُمْشَان نّس، مَانِي غَا تْوَاعْثق ثڒْت-سْنِين ذ ؤُزْين ذِي ڒَامَان زݣ وفِيغر نِّي.

¹⁵ ئِسُوْفغ-د وفِيغر زݣ ؤُقمُّوْم نّس اَمَان اَمشْنَاو يغْزَار تَازّْڒن خ ثمْغَارْث حمَا اَت اَوِين وَامَان نِّي.

¹⁶ وَلَكِن ثَمُوْرْث ثْسنْجم ثَمْغَارْث نِّي، ثرْزم اَقمُّوْم نّس ثْسغْڒِي يغْزَار إِي د يسُوْفغ بُو-سبْعَا-يزدْجِيفن زݣ ؤُقمُّوْم نّس.

¹⁷ ئِغْضب بُو-سبْعَا-يزدْجِيفن خ ثمْغَارْث نِّي يرُوْح اَذ يحَارب س مِين يقِّيمن زِي دُّوْرِّيث نّس، يعْنِي يِنِّي يتݣّن اَرَّاي س ڒُوْصِيَاث ن أَربِّـي تطّْفن خ مِينْخف يشْهذ عِيْسَى.

¹⁸ ثُمَّا يبدّ خ يِجْذِي ن ڒبْحَر.