لواحي ن يوحنا 11 - ثريفيث 2020

ثْنَاين ن ڒشْهُوْذ

¹ ئِمُّوْشَا-اَيِي يجّن ن وغَانِيم اَم ذ ڒَعْبَار ينَّا-ٱيِي يجّن: "كَّر، عْبَر ثَمْزِيذَا ثَمقّْرَانْت ن أَربِّـي ذ ڒْمذْبَح، حْسب شْحَاڒ إِي عبّْذن ذِنِّي.

² وَلَكِن ڒمْرَاح يدْجَان غَار بَرَّا إِ ثمْزِيذَا اجّ-يث وَاحْذس، وَار ث تعْبَار شَا ڒَاحقَّاش يمُّوْش-اَسن إِ ڒݣْنُوْس. أَذ عفّْسن ثَنْدِينْت يقدّْسن ذِي ثْنَاين أُو اَرْبعِين ن شْهُوْرَاث.

³ أَذ سّكّغ ثْنَاين ن ڒشْهُوْذ ينُو اَذ ݣّن اَرُّوْض ن لْحُزن اَذ خْبَرن يوْذَان س مِين عڒْمن زي أَربِّـي اَڒَاف أُو مِيَّاتَاين أُو ستِّين يُوْم."

⁴ ڒشْهُوْذ نِّي نِثْنِي ذ ثْنَاين ن ڒْشجُّوْر ن زِّيتُوْن، أُو عَاوذ نِثْنِي ذ ثْنَاين ن ڒقْنَاذڒ إِݣ يبدّن زَّاث إِ سِيذِي أَربِّـي ن دُّنشْت-أَ.

⁵ مڒَا شَان يِجّن يرْزُو اَذ يضَرّ ڒشْهُوْذ نِّي، أَتَاف اَذ تفّغ ثْمسِّي زݣ ؤُقمُّوْم نْسن اَذ تشّ ڒْعَذْيَان نْسن. مڒَا شَان يجّن يرْزُو اَثن يضَرّ، أَمنِّي إِي غَا يمّث.

⁶ ذِي ڒِيَّامَاث نِّي إِي ذِي غَا خْبَرن ڒشْهُوْذ-أَ س مِين عڒْمن زِي أَربِّـي اَتَاف اَغَارْسن ثِيڒِي سُّلْطَا زِي غَا بلّْعن اَجنَّا وَار د يشِّيْث بُو ونْࢲَار قَاع. أَتَاف عَاوذ اَغَارْسن ثِيڒِي سُّلْطَا اَذ اَرّن اَمَان ذ يذَامّن اَذ ضڒْقن إِ مَارَّا لْمُصِيبَاث خ ثْمُوْرْث مڒْمِي مَا خْسن.

⁷ خْمِي غَا كمّْڒن ڒخْبَار نْسن إِي زِي غَا شهْذن، أَذ د يݣَعّذ ڒْوَحْش زِي ڒَادْجغ بْڒَا ڒَاحدّ اَثن يحَارب، أَثن يغْڒب، أَذ ينغ ڒشْهُوْذ نِّي.

⁸ أَذ تقِّيم دَّات نْسن ذِي شَّارِع ن ثنْدِينْت ثَمقّْرَانْت ؤُمِي قَّارن س ڒْمَعْنَا سَدُوْم نِغ مِصْرَا يعْنِي مَانِي يتْوَاصلّب سِيذِيثْسن.

⁹ ئِوْذَان زِي مْكُڒ شَّعْب ذ ڒْقُوْم ذ لُّغَا ذ ڒْݣـنُس اَذَايْسن خْزَرن ذِي دَّات نْسن ثڒْتِيَّام ذ ؤُزْين، وَار تجِّين حَدّ اَذ ينْضڒ ڒشْهُوْذ-أَ.

¹⁰ يمزْذَاغ ن ثْمُوْرْث اَذ فَرْحن اَذ زْهُوْن س ڒْموْث نْسن. أَذ ؤُشن يكَادُوْثن إِ وَايَاوْيَا ڒَاحقَّاش لْأَنْبِيَا نِّي س ثْنَاين، يعْنِي ڒشْهُوْذ نِّي، عدّْبن اَطَّاس يمزْذَاغ ن ثْمُوْرْث.

¹¹ وَامِي ثعْذُو تڒْتِيَّام ذ ؤُزْين نِّي، يُوْذف ذَايْسن يجّن ن بُوْحْبڒ زِي أَربِّـي ذِي ڒشْهُوْذ-أَ، كَّرن بدّن خ يضَارن نْسن. ينِّي ثن يࢲْرِين ثُوْذف ذَايْسن ثِيݣّْوْذِي ذ ثَمقّْرَانْت.

¹² سْڒِين إِ يِجّن ن ثْمِيجَّا ثجْهذ تْڒَاغَا-د خَاسن زݣ وجنَّا ثقَّار-اَسن: "ݣَعّْذم-د ذَانِيتَا!" ڒشْهُوْذ نِّي ݣَعّْذن غَار وجنَّا ذݣ وسيْنُو، ڒْعَذْيَان نْسن خْزَرن ذَايْسن.

¹³ ذِي ڒْوقْث نِّي يوْقع يجّن ن زِّنْزَال ذ اَمقّْرَان، ثْنهْذم عشْرَا ذِي مِيَّا زِي ثنْدِينْت. مُّوْثن ذِي زِّنْزَال-أَ سبْعَاڒَاف ن يِوْذَان. يِنِّي يقِّيمن ݣّْوْذن، بْذَان سمْغَارن أَربِّـي إِݣ يدْجَان ذݣ وجنَّا.

¹⁴ ثعْذُو تَمَارَا وِيس ثْنَاين، ثنِّي وِيس ثْڒَاثَا عْڒَاين اَذ د تَاس.

زَّمَّار وِيس سبْعَا

¹⁵ ثكَّر لْمَلَائِكَا وِيس سبْعَا ثْصُوْض ذِي زَّمَّار نّس، أُوْشَا ثِمِيجَّاوِين ذݣ وجنَّا قَّارنْت س جّْهذ: "ئِذْوڒ ڒحْكَام ن دُّنشْت-أَ ذݣ يفَاسّن ن سِيذِي أَربِّـي نّغ ذ لْمَسِيح نّس، اَذ يحْكم إِ ڒبْدَا ن ڒبْدَاث."

¹⁶ كَّرن اَرْبعَا أُو عِشْرِين نِّي يمْغَارن إِي قِّيمن خ لْعَرْشَاث نْسن زَّاث إِ أَربِّـي، هْوَان خ وغمْبُوْب نْسن سجّْذن-اَس إِ أَربِّـي،

¹⁷ قَّارن: "نتْشكَّر-يشك آ سِيذِي أَربِّـي إِݣ يزمَّرن إِ كُڒْشِي، شك إِݣ يدْجَان، شك إِي تُوْغَا يدْجَان، ڒَاحقَّاش ثسْخذْمذ جّْهذ نّش، ثبْذِيذ تْحكّْمذ.

¹⁸ ڒݣْنُوْس غضْبن، يُوْوض-د وغْضَب نّش. يُوْوض-د نْهَار ن لْحِسَاب ذ لْعِقَاب ن يِنِّي يمُّوْثن. اَذ تْجَازِيذ يِنِّي ذَاش يخدّْمن يعْنِي لأَنْبِيَا ذ ڒْمُوْمِنِين نّش صَّالِحِين، ذ ينِّي يتْوقَّارن يسم نّش س يمزْيَانن ذ يمقّْرَانن. أَذ تقْضِيذ خ يِنِّي يسفْسَاذن ثَمُوْرْث."

¹⁹ ثْنُوْرْزم ثمْزِيذَا ثَمقّْرَانْت ن أَربِّـي ذݣ وجنَّا، يمظْهَار-د تَابُوْت ن ڒْعَهذ ن أَربِّـي ذِي ثمْزِيذَا نِّي. ئِوْقع وَاسَّام ذ يغُوْيَان ذ وَاجَّاج ذ زِّنْزَال ذ يشَرَّا اَطَّاس.