مرقس 6 - ثريفيث 2020

تَازّْڒن خ سِيذِيثْنغ عِيْسَى زݣ وبِيلَاج نّس

¹ يفّغ سّنِّي عِيْسَى يذْوڒ غَار ثْمُوْرْث نّس، ذْفَارن-ث يمحْضَارن نّس.

² نْهَار ن سّبْث ن لْعِبَادَا، ئِبْذَا يسڒْمَاذ ذِي ثمْزِيذَا نِّي. مَارَّا يِنِّي ذَاس يتْسْڒَان قِّيمن تْعجّْبن ذَايس نَّان: "مَانِي يُوْفَا مَانَايَا؟ مِين ثعْنَا ڒفْهَامث-أَ إِي ذَاس يمُّوْشن؟ مَامّش يݣَّا لْمُعْجِيزَاث-أَ إِݣ يوقْعن خ يفَاسّن نّس؟

³ مَا وَار يدْجِي شَا وَانِيتَا ذ اَنجَّار مِّيس ن مَرْيَم ؤُمَاس ن يَعْقُوْب ذ يُوْسِيس ذ يَهُوْذَا ذ سِمْعَان، سُوْيْثْمَاس اَقَاثنْت ذَانِيتَا اَكِذْنغ؟" خ مَانَاينِّي وَار ث قْبِيڒن شَا.

⁴ ينَّا-ٱسن عِيْسَى: "نَّبي محْتَارم مَانِي مَا، وَلَكِن ذݣ وبِيلَاج نّس ذ ڒحْبَاب نّس ذ ثدَّارث نّس لَّا!"

⁵ وَار يزمَّر شَا اَذ يݣّ ذِنِّي لْمُعْجِيزَا، غِير يحَاذَا ذْرُوْس ن يمهْڒَاش س يفَاسّن نّس يسْݣنْفَا-ثن.

⁶ يتْعجّب ڒَاحقَّاش لإِيمَان نْسن ذ وقْلِيل. سّنِّي يݣُّوْر يسڒْمَاذ زِي دْشَار غَار دْشَار إِي ث يُوْذْسن ذِنِّي.

سِيذِيثْنغ عِيْسَى يسّكّ اَرُّسُل اَذ حدّْثن

⁷ ئِڒَاغَا-د عِيْسَى خ ثنْعَاش ن اَرُّسُل يسّكّ-يثن ثْنَاين ثْنَاين، يُوْشَا-اَسن سُّلْطَا اَذ حكْمن خ جْنُوْن يعفَّانن.

⁸ يوصَّا-ثن ينَّا-ٱسن: "وَار كِذْوم تَاوِيم وَالُو ذݣ وبْرِيذ، أَوِيم اَكِذْوم غِير اَعكَّاز. وَار كِذْوم تَاوِيم نِي اَغْرُوْم نِي اَقْرَاب نِي نّحَّاس ذݣ وحزَّام نْوم.

⁹ ݣّث ثِسِيڒَا، وَار تݣّم شَا ثْنَاين ن يتْشَامِّيرن."

¹⁰ ينَّا-ٱسن: "مَانِي مَا ثُوْذْفم غَار شَان ثدَّارْث، قِّيمم ذِنِّي اَڒ غَا ثُوْيُوْرم سّنِّي.

¹¹ مڒَا وَار كنِّيو قْبِيڒن شَا ذِي شَان ومْشَان نِغ وَار خْسن شَا اَغَارْوم صنّْطن، فّْغم سّنِّي مسْحث ثَعجَّاشْت زݣ يضَارن نْوم اَم شَا ن شْهَاذث خَاسن."

¹² كَّرن نِثْنِي رُوْحن تْحدَّاثن إِ يِوْذَان حمَا اَذ تُوْبن.

¹³ سُوْفْغن اَطَّاس ن جْنُوْن، ذهْنن إِ وَاطَّاس ن يمهْڒَاش س زّشْت سْݣنْفَان-ثن.

ڒْموْث ن سِيذْنَا يَحْيَى

¹⁴ أَزدْجِيذ هِيرُوْدُس يَارَّا-د ڒخْبَار خ مِين يتݣّ عِيْسَى مِينْزِي يسم نّس يذْوڒ مَعْرُوْف اَطَّاس. ذِنِّي شَان يِوْذَان قَّارن قَا وَانِيتَا يعْنِي ذ يَحْيَى نِّي، ئِتْوَاسكَّر-د نتَّا زِي ڒْموْث! س مَانَايَا إِي غَارس جّْهذ إِي زِي يتݣّ لْمُعْجِيزَاث-أَ.

¹⁵ ئِجّن يقَّار لَّا قَا وَانِيتَا ذ نَّبِي نِّي إِلْيَاس. ئِجّن يقَّار لَّا قَا وَانِيتَا ذ يجّن ن نَّبِي اَمشْنَاو يجّن زِي لْأَنْبِيَا نِّي يقْذِيمن.

¹⁶ أَزدْجِيذ هِيرُوْدُس وَامِي يسْڒَا مَانَايَا، ينَّا قَا وَانِيتَا ذ يَحْيَى نِّي ؤُمِي قسّغ اَزدْجِيف، أَقَا يتْوَاسكَّر-د زِي ڒْموْث!

^17-18 قْبڒ إِ مَانَايَا، أَزدْجِيذ-أَ هِيرُوْدُس يمْڒش اَك يِجّن ن ثمْغَارْث قَّارن-أَس هِيرُوْدِيَا. هِيرُوْدُس نتَّا ذ اَڒْوس ن هِيرُوْدِيَا. تُوْغَا نتَّاث قْبڒ ذ ثَمْغَارْث ن فِيلِيـپَّـاس. ئِسّكّ هِيرُوْدُس اَذ طّْفن يَحْيَى وَامِي تُوْغَا ذَاس يقَّار: حْرَام شك اَذ تَاوِيذ ثَمْغَارْث ن وُوْمَاش. ئِحبّس-يث ذِي ڒحْبس.

¹⁹ هِيرُوْدِيَا ثنْضَر ذَايس ثِيطَّاوِين ثْرزُّو اَث تْنغ وَلَكِن وَار ثْزمَّر.

²⁰ مَايمِّي؟ ڒَاحقَّاش هِيرُوْدُس يتݣّْوذ زِي يَحْيَى. ئِسّن بلِّي نتَّا ذ يجّن ن ورْيَاز يدْجَا نِيشَان، ذ اَمْقدّس. ئِحمَّا-ث هِيرُوْدُس، ئِتعْجِيب-اَس خْمِي يتْحدَّاث وَلَكِن يتْغِيمَا يسْتْعجِّيب ذَايس اَطَّاس.

²¹ ثُوْسَا-يَاس-د لْفُرْصَا إ هِيرُوْدِيَا وَامِي يݣَّا وزدْجِيذ هِيرُوْدُس ڒْعِيد لْمِيلَاد إِي يِخف نّس يݣَّا اَمنْسِي إِ يمقّْرَانن نّس ذ اَرُّوْيَاس ن ڒْعَسْكَار ذ يمقّْرَانن ن ثْمُوْرْث ن لْجَلِيل.

²² ثُوْذف-د يدْجِيس ن هِيرُوْدِيَا ثشْضح، ئِعْجب-اَس ڒْحَاڒ إِ وزدْجِيذ ذ ينوْجِيْون نّس. ينَّا-ٱس وزدْجِيذ إِ ثْحنْجِيرْث نِّي: "تَّار-اَيِي مِين ثخْسذ، أَذَام ث ؤُشغ."

²³ ئِجُّوْدْج-اَس ينَّا-ٱس: "مِين ذَايِي غَا ثتَّارذ اَذَام ث ؤُشغ، وَاخَّا اَزْين ن لْممْلَكَا ينُو."

²⁴ ثفّغ ثنَّا-ٱس إِ يمَّاس: "مِين ذَاس غَا تَّارغ؟" ثنَّا-ٱس يمَّاس: "رزُّوْغ اَزدْجِيف ن يَحْيَى."

²⁵ ڒخْدّنِّي ثذْوڒ ذغْيَا غَار ؤُزدْجِيذ، ثتَّار زَّايس ثنَّا-ٱس: "ڒخُّو خْسغ اَذَايِي ثُوْشذ ذَا اَزدْجِيف ن يَحْيَى خ سِّنِّيث!"

²⁶ ئِخيّق وزدْجِيذ اَطَّاس وَلَكِن يݣَّا-اَس اَرَّاي ڒَاحقَّاش يجُّودْج-اَس زَّاث إِ ينوْجِيْون نّس.

²⁷ ڒخْدّنِّي اَزدْجِيذ يسّكّ يج وعسَّاس غَار ڒحْبس، يُوْمَر-يث حمَا اَذ د يَاوِي اَزدْجِيف ن يَحْيَى. ئِرُوْح وعسَّاس نِّي يقسّ اَزدْجِيف ن يَحْيَى ذِي ڒحْبس.

²⁸ يُوْوِي-ث-يذ خ سِّنِّيث، يُوْشَا-اَس-ث إِ ثْحنْجِيرْث نِّي، ثَحنْجِيرْث نِّي ثُوْشَا-اَس-ث إِ يمَّاس.

²⁹ وَامِي سْڒِين يمحْضَارن ن يَحْيَى مَانَايَا، ؤُسِين-د يْسِين دَّات نّس ݣِّين-ت ذݣ ونْضڒ.

سِيذِيثْنغ عِيْسَى يسشّ خمْسَاڒَاف ن يرْيَازن

³⁰ مُوْنن اَرُّسُل اَك عِيْسَى عَاوْذن-اَس خ مَارَّا مِين ݣِّين ذ مَارَّا مِين سڒْمَاذن.

³¹ أَطَّاس ن يِوْذَان تَاسن-د تْرَاحن. عِيْسَى ذ يمحْضَارن نّس وَار ؤُفِين ڒْوقْث وَاخَّا اَذ شّن. خ مَانَايَا ينَّا-ٱسن: "أَرَاحم-د وَاحذْوم غَار يجّن ن ومْشَان يخْڒَا اَذ تْريّْحم شْوَايت."

³² رُوْحن وَاحذْسن ذِي ثْغَرَّابُوت غَار يجّن ن ومْشَان يخْڒَا.

³³ ࢲْرِين-ثن اَطَّاس ن يِوْذَان وَامِي ݣُّوْرن. عقْڒن-ثن فّْغن ذغْيَا زِي مَارَّا يبِيلَاجن نِّي تَازّْڒن مَارَّا ذِنِّي خ يضَارن، ئِزْوَارن-اَسن غَار ومْشَان نِّي.

³⁴ وَامِي د يضْرَا عِيْسَى زِي ثْغَرَّابُوت يُوْفَا ذِنِّي ڒْغَاشِي نِّي، قّْسن-اَس مِينْزِي ݣِّين اَمشْنَاو يحُورِّيْين وَار غَارْسن شَا ؤُو ثن غَا يَروْسن. ئِبْذَا يسڒْمَاذ-اَسن اَطَّاس ن ثْمسْڒَايِين.

³⁵ وَامِي يعْذُو ڒْحَاڒ، قَارّْبن غَارس يمحْضَارن نّس نَّان-اَس: "ڒْوقْث ثعْذُو، أَمْشَان-أَ ذ ڒخْڒَا وَاهَا.

³⁶ سكّ يوْذَان-أَ غَار ڒدْشُوْرَاث ذ ثُوْذْرِين يُوْذْسن بَاش اَذ د سْغن مِين غَا شّن."

³⁷ يَارَّا خَاسن عِيْسَى ينَّا-ٱسن: "ؤُشم-اَسن كنِّيو مِين غَا شّن." نَّان-اَس: "مَا اَ نْرَاح نشِّين أَ د نْسغ اَغْرُوْم س مِيَّاتَاين ن ثْپيَّاسِين ن نُّقَارْث، أَذَاسن ث نُوْش اَذ شّن؟"

³⁸ ينَّا-ٱسن: "شْحَاڒ غَارْوم ن وغْرُوم؟ رُوْحث اَذ تخْزَرم." رُوْحن ؤُفِين شْحَاڒ نَّان-اَس: "غَارْنغ خمْسَا ن ثْخبَّازِين ذ ثْنَاين ن يسڒْمَان."

³⁹ ئِكَّر عِيْسَى يُوْمَر-يثن حمَا اَثن سْغِيمن مَارَّا ذ لْفِرْقَاث خ اَرْبِيع اَزِيْزَا.

⁴⁰ ڒخْدّنِّي قِّيمن ذ لْفِرْقَاث خمْسِين خمْسِين، مِيَّا مِيَّا.

⁴¹ ئِيْسِي خمْسَا نِّي ن ثْخبَّازِين ذ ثْنَاين نِّي ن يسڒْمَان ييْسِي ثِيطَّاوِين نّس غَار وجنَّا أُوشَا يشكَّر أَربِّـي. يرْزَا اَغْرُوْم نِّي يُوْشَا-اَسن-ث إِ يمحْضَارن نّس اَك ثْنَاين ن يسڒْمَان نِّي حمَا اَثن فرْقن خ يِوْذَان نِّي مَارَّا.

⁴² شِّين جِّيوْنن مَارَّا.

⁴³ ڒخْدّنِّي يْسِين ثنْعَاش ن ثقْرَابِين عمَّرنْت س وغْرُوْم يشطّن اَك يسڒْمَان.

⁴⁴ لْعَدَد ن يِنِّي يشِّين اَغْرُوْم نِّي نِثْنِي خمْسَاڒَاف ن يرْيَازن.

سِيذِيثْنغ عِيْسَى يݣُّوْر خ ڒمْوَاج ن ڒبحَار

⁴⁵ ڒخْدّنِّي عِيْسَى يسْني يمحْضَارن نّس ذِي ثْغَرَّابُوت بَاش اَذ زْوَان غَار وجمَّاض-ين ن ڒبْحَر غَار وبِيلَاج ن بَيْت صَيْدَا، نتَّا يتمْسَافَاض خ ڒْغَاشِي.

⁴⁶ وَامِي خَاسن يمْسَافَاض، نتَّا يرُوْح غَار وذْرَار اَذ يࢲَّادْج.

⁴⁷ غَار ثْمدِّيث ثَغَرَّابُوت اَقَات ذِي ڒْوسْط ن ڒبْحَر، نتَّا اَقَاث ذِي ڒْبَرّ وَاحْذس.

⁴⁸ يࢲْرِي-ثن تْقدَّافن، تْعدَّابن مِينْزِي اَرِّيح يتْصُوْض-د زِي جِّهث نّغْنِي. عْڒَاين يقَارّب-د ڒفْجَر، ئِرُوْح عِيْسَى غَار يمحْضَارن نّس يݣُّوْر خ يضَارن خ وَامَان ن ڒبْحَر يخس اَثن يعْذُو.

⁴⁹ وَامِي ث ؤُفِين يݣُوْر خ يضَارن خ وَامَان ن ربْحَار، تْغِير-اَسن ذ ڒخْيَاڒ بْذَان سْنكَّرن ثْغُويِّيث.

⁵⁰ مَارَّا ࢲْرِين-ث ݣّْوْذن. وَلَكِن ذغْيَا ينَّا-ٱسن: "أَهْنَام! أَقَا ذ نش، وَار تݣّْوْذم شَا!"

⁵¹ ئِنْيَا اَكِذْسن ذِي ثْغَرَّابُوت، يرْسَا اَرِّيح. تْعجّْبن اَطَّاس ذِي نّفْس نْسن

⁵² مِيزِي تُوْغَا وَار فْهِيمن شَا لْمُعْجِيزَا نِّي ن وغْرُوْم، ؤُڒَاون نْسن تْوَاقْسْحن.

سِيذِيثْنغ عِيْسَى يسْݣنْفَا اَطَّاس ن يِوْذَان ذِي جْوَايه ن ݣَنِيسَارَت

⁵³ ئِࢲْوَا عِيْسَى ذ يمحْضَارن نّس ڒبْحَر، ؤُوْضن غَار ثْمُوْرْث ن ݣَنِيسَارَت قّْنن ذِنِّي ثَغَرَّابُوت.

⁵⁴ وَامِي ضْرِين زِي ثْغَرَّابُوت، ڒخْدّنِّي اَيثْبَاب ن ثْمُوْرْث نِّي عقْڒن عِيْسَى.

⁵⁵ تَازّْڒن-د زِي ثَمُوْرْث نِّي مَارَّا، بْذَان تَاوِين-د يمهْڒَاش خ ثَاسُّوْث غَار مَانِي سْڒِين يقِّيم نتَّا.

⁵⁶ مَانِي مَا يُوْذف غَار يبِيلَاجن نِغ غَار ثْندَّام نِغ غَار ڒْكَامْپَاوَاث، ئِوْذَان سْرُوْسَان يمهْڒَاش ذِي ڒسْوَاق. تتَّارن-اَس اَثن يجّ اَذ حَاذَان غِير طَّارْف ن وَارُّوض نّس. صَافِي مَارَّا يِنِّي ث يحَاذَان ݣنْفَان.