مرقس 14 - ثريفيث 2020

ئِجّن ن ثمْغَارْث ثْذهّن سِيذِيثْنغ عِيْسَى س وَامَان ن لْوَرْذ

¹ ئِقِّيم-اَس يُوْمَاين إِ ڒْعِيذ اَمقّْرَان ن أَيث-إِسْرَائِيل ذ ڒْعِيذ نِّي ؤُمِي قَّارن ڒْعِيذ ن ثفْضِيرْث. أَرُّوْيَاس ن ڒْفُقَهَا ذ يمْسڒْمَاذن ن شَّرِيعَا رزُّوْن مَامّش ذَاس غَا ݣّن حمَا اَذ طّْفن عِيْسَى س ثحْرَايْمِيث اَث نْغن.

² نَّان جَارَاسن: "ئِتْخصَّا وَار ث نْتطّف شَا ذِي ڒْعِيذ حمَا شَّعْب وَار يتݣّ شَا ڒْفَوْضَا."

³ عِيْسَى اَقَاث ذݣ وبِيلَاج ن بَيْت عَنْيَا ذِي ثدَّارْث ن يِجّن قَّارن-اَس سِمْعَان بُو-جْذَام. وَامِي يقِّيم ذِنِّي يتتّ، ثقَارّب-د غَارس يجّن ن ثمْغَارْث غَارس يجّن ن ثْزيَّات ذَايس اَمَان ن لْوَرْذ يصْفَان، ئِغْڒَان س وَاطَّاس. ثرْزم-يت ثْفرّغ-اَس-ثن خ وزدْجِيف نّس.

⁴ شَان إِذْسن زَّايْسن يقّس-اَسن ڒْحَاڒ نَّان جَارَاسن: "مَايمِّي قَاع اَضيّع-أَ ن وَامَان ن لْوَرْذ؟

⁵ أَتَاف اَمَان نِّي يڒِي منْزن س يِجّن ن تَّمَان ذ اَمقّْرَان كْتَار زِي ثڒْتمِيَّا ن ثْپيَّاسِين ن نُّقَارْث اَذ مُّوْشنْت إِ يمسْعَان!" قِّيمن نِثْنِي نهَّان-ت اَطَّاس.

⁶ ينَّا-ٱسن عِيْسَى: "اجّم-ت! مَايمِّي ت ثسْخيَّاقم؟ أَقَا مِين ذَايِي ثݣَّا ذ اَصبْحَان اَطَّاس.

⁷ ئِمسْعَان اَقَاثن اَكِذْوم ڒبْدَا. مڒْمِي مَا ثخْسم ثْزمَّرم اَذَايْسن ثݣّم ڒْخِير، نش وَار كِذْوم تْغِيمِيغ شَا إِ ڒبْدَا.

⁸ ثݣَّا مِين خَاس. ثْفرّغ-اَيِي اَمَان-أَ ن لْوَرْذ خ دَّات ينُو حمَا اَذَايِي ثْسوْجذ إِ ثنْضڒْث ينُو.

⁹ أَقَا تسْڒَام ڒْحَقّ: مَانِي مَا يُوْوض لْإِنْجِيل ذِي دُّنشْت-أَ اَمن-ثكْمَاڒ، أَتَاف اَذ عَاوْذن خ ثمْغَارْث-أَ ذ مِين ذَايِي ثݣَّا اَم يِجّن ن ذِكْرَا خَاس."

¹⁰ أُوْشَا يكَّر يَهُوْذَا إِسْخَريُوْطِي ونِّي زِي ثنْعَاش ن اَرُّسُل يرُوْح نتَّا غَار أَرُّوْيَاس ن ڒْفُقَهَا حمَا اَذَاسن يزّنْز عِيْسَى.

¹¹ سْڒِين مَانَايَا فَرْحن وعْذن-ث اَذَاس ؤُشن تْمنْيَاث. سّنِّي يرزُّو يَهُوْذَا لْفُرْصَا مَامّش إِي غَا يݣّ اَذَاسن ث يزّنْز.

أَمنْسِي ن ڒْعِيذ اَمقّْرَان ن أَيث-إِسْرَائِيل

¹² نْهَار اَمزْوَارُو ن ڒْعِيذ ن ثفْضِيرْث، نْهَار نِّي إِي ذِي غَرّْصن ڒْعِيذ، سّقْسَان يمحْضَارن عِيْسَى نَّان-اَس: "مَانِي ثخْسذ أَ نْرَاح اَذَاش نْسوْجذ اَمنْسِي ن ڒْعِيذ اَمقّْرَان؟"

¹³ ئِكَّر عِيْسَى يخْضَر ثْنَاين زݣ يمحْضَارن نّس يسّكّ-يثن ينَّا-ٱسن: "رُوْحم غَار ثنْدِينْت، أَكِذْوم يمڒْقَا يجّن ن ورْيَاز ييْسِي-د اَقْنُوْش ن وَامَان، ذْفَارم-ث.

¹⁴ مَانِي مَا يُوْذف إِنِيم-اَس إِ بَاب ن ثدَّارْث نِّي، قَا ينَّا-ٱش لْمُعَلِّم: مَانِي يدْجَا وخَّام ينُو إِي ذِي غَا عيّْذغ نش ذ يمحْضَارن ينُو؟

¹⁵ أَكنِّيو يَاوِي غَار يِجّن ن ثْغُوْرْفَات ذ ثَمقّْرَانْت ثسُّو، ثعْذڒ. ذِنِّي إِي ذَانغ غَا ثسْوجْذم."

¹⁶ رُوْحن يمحْضَارن نّس ؤُذْفن غَار ثنْدِينْت، ؤُفِين نِيشَان مَامش ذَاسن ينَّا. صَافِي سْوجْذن اَمنْسِي ن ڒْعِيذ.

¹⁷ ثُوْوض-د ثْمدِّيث، يُوْسَا-د عِيْسَى اَك ثنْعَاش ن اَرُّسُل نّس.

¹⁸ قِّيمن تتّن ينَّا-ٱسن عِيْسَى: "أَقَا تسْڒَام ڒْحَقّ: ئِجّن زَّايْوم يتتّ اَكِذِي اَذَايِي يزّنْز."

¹⁹ ئِقِّيم ذَايْسن ڒْحَاڒ يمحْضَارن نّس تْسقْسَان-ث ئِج-يج نَّان-اَس: "وَار يدْجِي بُو ذ نّش، يَاش؟"

²⁰ ئِنْدق-د عِيْسَى ينَّا-ٱسن: "ئِجّن زِي كنِّيو زِي ثنْعَاش إِذْوم، ونِّي إِي كِذِي يسِّيسْنن ذِي طّبْصِي."

²¹ ينَّا-ٱسن: "مِّيس ن بْنَاذم اَذَاس يوْقع عْلَاحْسَاب مَامش خَاس يقَّار لْكِتَاب، وَلَكِن يَا ڒفْضِيحث ن بْنَاذم نِّي إِي ث غَا يزّنْزن! حْسن إِ نتَّا مْڒِي وَار د يخْڒِيق شَا."

²² وَامِي عَاذ تتّن، ئِيْسِي-د اَغْرُوْم يشكَّر أَربِّـي يرْزَا اَغْرُوْم نِّي يُوْشَا-ٱسن-ث إِ يمحْضَارن نّس ينَّا-ٱسن: "يْسِيم-ث، ذ وَا إِݣ يدْجَان ذ دَّات ينُو."

²³ ئِيْسِي-د ڒْكَاس يشكَّر أَربِّـي يُوْشَا-اَسن-ث، سْوِين زَّايس مَارَّا إِذْسن.

²⁴ ينَّا-ٱسن: "ڒْكَاس-أَ ذَايس يذَامّن ن ڒْعَهذ، يعْنِي ذ يذَامّن ينُو إِي غَا يَازّْڒن عْلَاحْسَاب اَطَّاس ن يِوْذَان.

²⁵ أَقَّا تسْڒَام ڒْحَقّ: زِي سَّا اَڒ ثْسَاونْت وَار سسّغ شَا زݣ وَامَان-أَ وضِيڒ حتَّا اَڒ نْهَار نِّي إِي ثن غَا سْوغ زِي جْذِيذ ذِي ڒْمُلْك ن أَربِّـي."

²⁶ غنّْجن يجّن ن يِزْڒِي ن ڒْعِيذ، سّنِّي فّْغن رُوْحن غَار وذْرَار ن زِّيتُوْن.

سِيذِيثْنغ عِيْسَى يسَّاوَاڒ خ ونْكَر ن بُطْرُس

²⁷ ينَّا-ٱسن عِيْسَى إِ يمحْضَارن نّس: "أَذَايِي ثْسمْحم مَارَّا إِذْوم مِينْزِي يقَّار لْكِتَاب: <أَذ ؤُوْثغ ونِّي يرَاسّن يحُوْڒِيْين، كُڒ يجّن زِي ثْحِيمرْث مَانِي غَا يَرْوڒ.>

²⁸ وَلَكِن خْمِي د غَا كَّرغ زِي ڒْموْث، أَذَاوم يزْوَارغ غَار ثْمُوْرْث ن لْجَلِيل."

²⁹ ينَّا-ٱس بُطْرُس: "وَاخَّا اَذَايش غَا سمْحن مَارَّا، نش وَار ذَايش سمْحغ شَا."

³⁰ يَارَّا خَاس عِيْسَى ينَّا-ٱس: "أَقَا تسْڒِيذ ڒْحَقّ: ثَا، دْجِيڒث-أَ قْبڒ مَا ٱذ يدّن ويَازِيض مَرّْثَاين اَتَاف اَذَايِي ثنْكَرذ ثْڒَاثَا ن ثْوَاڒَاثِين."

³¹ ينَّا-ٱس بُطْرُس نتَّا متْأَكَّاد: "نش وَار ش نكَّرغ شَا وَاخَّا اَكِذش إِي غَا مّْثغ." أَمنِّي إِي نَّان مَارَّا يمحْضَارن.

سِيذِيثْنغ عِيْسَى يتْࢲَادْجَا ذݣ وذْرَار ن زِّيتُوْن

³² يُوْسَا-د عِيْسَى اَك يمحْضَارن نّس غَار يِجّن ن ومْشَان قَّارن-اَس <ݣَتْسِمَانِي.> ينَّا-ٱسن: "قِّيمم ذَا، نش اَذ رَاحغ ذِيهَا اَذ ࢲَّادْجغ."

³³ يُوْوِي اَكِذس بُطْرُس ذ يَعْقُوْب ذ يُوْحَنَّا، ئِبْذَا يتْنخْڒع يتْخيَّاق.

³⁴ ينَّا-ٱسن: "ڒَعْمَر ينُو عْڒَاين اَذ يدُّوْقّز س لْحُزن. قِّيمم ذَا ثْفَاقم."

³⁵ ئِبعّذ خَاسن شْوَايْت، ئِسجّذغَار ثْمُوْرْث يبْذَا يتتَّار إِ أَربِّـي يرزُّو اَخَاس تْوَاكّس ثْسَعَّات نِّي.

³⁶ ينَّا: "آ بَابَا، شك كُڒْشِي ثْزمَّرذ-اَس، سْبعّذ-يث خَافِي ڒْكَاس-أَ ن ڒَعْذَاب. مَاشِي مَامش خْسغ نش؛ لَّا، مَامّش يخس ڒْخَاضَر نّش شك."

³⁷ ئِذْوڒ غَار يمحْضَارن-أَ يُوْفِي-ثن طّْصن، ينَّا-ٱس إِ بُطْرُس: "مَا تطّْصذ آ سِمْعَان؟ مَا وَار ثْزمَّرذ شَا اَكِذِي ثْفَاقذ وَاخَّا ذ يجّن ن ثْسَعَّات وَاهَا؟

³⁸ إِڒِيم عْلَابَال ࢲَّادْجم حمَا وَار تِيذْفم شَا ذِي ڒمْحَاين. ؤُڒ ن بْنَاذم يوْجذ وَلَكِن دَّات نّس ثضْعف."

³⁹ ئِبعّذ خَاسن عَاوذ يتَّار إِ أَربِّـي اَمشْنَاو اَمزْوَارُو.

⁴⁰ ئِذْوڒ-د عَاوذ غَارْسن يُوْفِي-ثن طّْصن ڒَاحقَّاش يغلّب خَاسن يِضص. نِثْنِي عَاوذ وَار ؤُفِين مِين ذَاس غَا ينِين.

⁴¹ ئِذْوڒ-د غَارْسن وِيس ثڒْت-مَرَّاث ينَّا-ٱسن: "عَاذ ثطّْصم، عَاذ ثْريّْحم؟ صَافِي، بَرَكَا! أَقَا ثُوْوض-د ڒْوقْث نِّي إِي ذِي غَا يتْوَاسلّم مِّيس ن بْنَاذم غَار يفَاسّن ن يِنِّي يعصَّان.

⁴² كَّرم أَ نُوْيُوْرم، قَا ونِّي إِي ذَايِي غَا يزّنْزن اَقَاث يُوْسَا-د."

ئِسْرَائِيلِيْين ذ يرُوْمَانِيْين تطّْفن سِيذِيثْنغ عِيْسَى

⁴³ يَالَّه عِيْسَى يسَّاوَاڒ يُوْوض-د يَهُوْذَا، يجّن زِي ثنْعَاش نِّي ن اَرُّسُل نّس. يُوْوِي-د اَكِذس ڒْغَاشِي اَطَّاس يْسِين ڒسْيُوْف ذ يْدبُّوْزن. سّكّن-ثن-د اَرُّوْيَاس ن ڒْفُقَهَا ذ يمْسڒْمَاذن ن شّرِيعَا ذ يمقّْرَانن ن أَيث-إِسْرَائِيل.

⁴⁴ ونِّي إِي ث غَا يزّنْزن يعْنِي يَهُوْذَا قْبڒ تُوْغَا يتَافق اَكِذْسن خ يِجّن ن لْعَلَامَا ينَّا-ٱسن: "ونِّي خف غَا سدْجْمغ ذ ونِّي إِي خف ثْرزُّوْم. طّْفم-ث، أَوِيم-ث يحْضَا."

⁴⁵ صَافِي يُوْسَا-د يَهُوْذَا يقَارّب غَار عِيْسَى ينَّا-ٱس: "آ سِيذِي." أُوْشَا يسدْجم خَاس.

⁴⁶ ڒخْدّنِّي سرْسن خَاس يفَاسّن نْسن طّْفن-ث.

⁴⁷ ئِجّن زݣ يِنِّي ذِنِّي يدْجَان يجْبذ-د سِّيف يُوْوْثَا زَّايس يسْمغ ن اَرَّايس ن ڒْفُقَهَا يقسّ-اَس اَمزُّوْغ.

⁴⁸ ينَّا-ٱسن عِيْسَى: "مَا تْغِير-اَوم قَا نش ذ لْمُجْرِم وَامِي د ثيْسِيم ڒسْيُوْف ذ يدبُّوْزن حمَا اَذَايِي ثطّْفم نِغ؟

⁴⁹ تُوْغَا تْغِيمِيغ اَكِذْوم مْكُڒ نْهَار ذِي ثمْزِيذَا ثَمقّْرَانْت سڒْمَاذغ ذِنِّي، وَار ذَايِي ثطِّيفم شَا. وَلَكِن مَارَّا مَانَايَا يوْقع حمَا اَذ يكمّڒ مِين يُوْرِين ذِي لْكُتُب."

⁵⁰ أُوْشَا سمْحن ذَايس مَارَّا اَروْڒن.

⁵¹ يذْفَار-يث يجّن ن وحنْجِير، خَاس تْشَامِّير وَاهَا. طّْفن-ث

⁵² وَلَكِن نتَّا يَرْوڒ-اَسن ذ اَعرْيَان يجَّا ذِنِّي تْشَامِّير نّس.

سِيذِيثْنغ عِيْسَى زَّاث إِ لْحُكَّام ن أَيث-إِسْرَائِيل

⁵³ ؤُوِين عِيْسَى غَار اَرَّايَس ن ڒْفُقَهَا. مُوْنن اَكِذس مَارَّا اَرُّوْيَاس ن ڒْفُقَهَا، ذ يمقّْرَانن ن أَيث-إِسْرَائِيل، ذ يمْسڒْمَاذن ن شَّرِيعَا.

⁵⁴ ئِذْفَار-يث بُطْرُس زِي ڒݣّْوَاج، يُوْذف غَار ڒمْرَاح ن ثدَّارْث ن اَرَّايس نِّي. ئِقِّيم اَك يعسَّاسن يزْغَار غَار ثْمسِّي.

⁵⁵ أَرُّوْيَاس ن ڒْفُقَهَا ذ مَارَّا جْمَاعث ن لْحُكَّام ن أَيث-إِسْرَائِيل رزُّوْن شْهَاذث ضد إِ عِيْسَى حمَا اَث نْغن وَلَكِن وَار ؤُفِين وَالُو.

⁵⁶ أَطَّاس إِي خَاس يشهّْذن ࢲُّوْر، وَلَكِن غَارْسن تَنَاقُض ذِي شْهَادث نْسن كُڒ يجّن مِين يقَّار.

⁵⁷ كَّرن ڒبْعَاض شهْذن خَاس ࢲُّوْر نَّان:

⁵⁸ "نتْسْڒَا-يَاس يقَّار قَا نش اَذ هذْمغ ثَمْزِيذَا-يَا ثَمقّْرَانْت إِي بْنَان يِوْذَان س يفَاسّن، أَذ بْنِيغ يجّن ن ثمْزِيذَا ذِي ثڒْتِيَّام وَار ت بْنِين يِوْذَان س يفَاسّن."

⁵⁹ وَلَكِن عَاوذ غَارْسن تَنَاقُض ذِي شْهَادث نِّي نْسن كُڒ يجّن مِين يقَّار.

⁶⁰ أُوْشَا يبدّ اَرَّايس ن ڒْفُقَهَا ذِي ڒْوسْط ن جْمَاعث ينَّا-ٱس إِ عِيْسَى: "مَا وَار ثقَّارذ وَالُو شك؟ مِين خَاش شهّْذن يِوْذَان-أَ؟"

⁶¹ ئِقِّيم عِيْسَى يسْقَار وَار خَاس يَارِّي شَا. ئِكَّر يسّقْسَا-ث عَاوذ اَرَّايس ن ڒْفُقَهَا ينَّا-ٱس: "مَا شك ذ لْمسِيح مِّيس ن أَربِّـي إِي يدْجَان مُبَارِك؟"

⁶² ينَّا-ٱس عِيْسَى: "وَاه، ذ نّش. كنِّيو اَذ تࢲرم مِّيس ن بْنَاذم يقِّيم خ وفُوْسِي ن لْقَوِي. أَث ثࢲرم عَاوذ يهوَّا-د اَك وسيْنُو وجنَّا."

⁶³ أَرَّايس نِّي ن ڒْفُقَهَا يغَرص اَرُّوض خ يِيخف نّس ينَّا-ٱسن: "وَار نحْذِيج بُو ڒشْهُوْذ!

⁶⁴ ما ثسْڒِيم-اَس يقَّار لْمُنْكَر خ سِيذِي أَربِّـي؟ مِين ذَاوم يمظْهَارن؟" مَارَّا حكْمن خَاس بلِّي ئِسْذَاهدْج ڒْموْث.

⁶⁵ سّنِّي بْذَان ڒبْعَاض زَّايْسن سُّوْسُوْفن خَاس. ڒحّْفن-اَس خ وغمْبُوْب نّس شَّاثن-ث س ڒْپُوْنْيَاث قَّارن-اَس: إِيوَا آ نَّبِي سِيوڒ! ؤُوِين-ث-يد يعسَّاسن شَّاثن-ث س يسقِّيڒن.

بُطْرُس ينكَّر سِيذِيثْنغ عِيْسَى

⁶⁶ بُطْرُس يقِّيم غَار بَارَّا اَودَّاي ذِي ڒمْرَاح. ثْقَارّب غَارس يجّن ن ثْخدَّانْت ن اَرَّايس ن ڒْفُقَهَا.

⁶⁷ ثࢲْرِي-ث يزْغَار غَار ثْمسِّي، ثخْزَار ذَايس مْلِيح ثنَّا-ٱس: "ؤُڒَا ذ شك ثدْجِيذ اَك عِيْسَى زِي نَاصِرَا."

⁶⁸ ينْكَر بُطْرُس ينَّا-ٱس: "وَار فْهِيمغ شَا وَار سِّينغ شَا مِينْخف ثْسَّاوَارذ!" ئِفّغ بُطْرُس يرُوْح طَّارْف ن ثوَّارْث ن ڒمْرَاح. {ڒخْدّنِّي يدّن ؤُيَازِيض.}

⁶⁹ ثࢲْرِي-ث ثْخدَّانْت نِّي ذِنِّي ثنَّا-ٱسن عَاوذ إِ يِنِّي يبدّن ذݣ ومْشَان نِّي: "قَا اَرْيَاز-أَ وَانِيتَا زَّايْسن."

⁷⁰ ئِنْكَر بُطْرُس عَاوذ. منْبَعْد شْوَايْت نَّان-اَس يِنِّي يبدّن ذݣ ومْشَان نِّي: "إِيوَا نِيشَان، شك ذ يجّن زَّايْسن مِينْزِي شك زِي لْجَلِيل."

⁷¹ ئِكَّر بُطْرُس يبْذَا يتْحَرّم يخف نّس يتْجَادْجَا يقَّار-اَسن: "أَرْيَاز-أَ إِي خف ثْسَّاوَاڒم نش وَار ث سِّينغ شَا!"

⁷² ڒخْدّنِّي يدّن ويَازِيض ثْوَاڒَا وِيس ثْنَاين، ئِفكَّر-د بُطْرُس اَوَاڒ نِّي ن عِيْسَى وَامِي ذَاس ينَّا: قْبڒ مَا ٱذ يدّن ويَازِيض مَرّْثَاين اَذَايِي ثنْكَرذ تْڒَاثَا ن ثْوَاڒَاثِين. وَامِي يفكَّر ذِي مَانَاينِّي يرُو يمطَّاون ذ يمدْجَاحن اَطَّاس.