مرقس 10 - ثريفيث 2020

طَّلَاق عْلَاحْسَاب مامّش إِي ذَانغ يقّار سِيذِيثْنغ عِيْسَى

¹ ئِكَّر عِيْسَى يفّغ سّنِّي يرُوْح غَار جْوَايه ن يَهُوْذِيَا ذ وجمَّاض-ين ن يغْزَار ن لْأُرْدُن. مُوْنن-د خَاس ذِنِّي ڒْغَاشِي عَاوذ، يبْذَا يسڒْمَاذ-يثن اَمشْنَاو ڒبْدَا.

² قَارّْبن-د غَارس شَان يِوْذَان زِي ڒْحِزب ن يفَرِّيسِيْين حمَا اَث جَرّْبن نَّان-اَس: "مَا حَلَال اَذ يدْجف شَان ورْيَاز إِ ثمْغَارْث نّس؟"

³ ينَّا-ٱسن عِيْسَى: "مِينْخف كنِّيو يوصَّا مُوْسَى؟"

⁴ نَّان-اَس يفَرِّيسِيْين: "مُوْسَى يسْمح إِ ورْيَاز اَذ يَارِي ثَبْرَات ن وَادْجَاف اَذَاس ت يُوْش إِ ثمْغَارْث نّس اَذَاس يدْجف."

⁵ ينَّا-ٱسن عِيْسَى: "مُوْسَى يُوْرَا ڒُوْصِيّث نِّي إِ كنِّيو مِينْزِي غَارْوم ؤُڒ يقْسح.

⁶ وَلَكِن زݣ وَامِي ثبْذَا دُّنشْت أَربِّـي يخْڒق-د اَرْيَاز ذ ثمْغَارْث.

⁷ س مَانَاينِّي اَرْيَاز اَذ يسْمح ذِي بَابَاس ذ يمَّاس اَذ يمُوْن اَك ثمْغَارْث نّس،

⁸ أَذ ذوْڒن س ثْنَاين إِذْسن ذ يجّن. خ مَانَايَا وَار تِيڒِين شَا ذ ثْنَاين؛ لَّا، أَذ يڒِين ذ يجّن.

⁹ إِذن، مِين يسْمُوْن أَربِّـي وَار ث يسْفَرّق شَا بْنَاذم."

¹⁰ ذِي ثدَّارْث سّقْسَان-ث يمحْضَارن نّس عَاوذ خ مَانَاينِّي.

¹¹ ينَّا-ٱسن عِيْسَى: "مَارَّا ونِّي غَا يدْجْفن إِ ثمْغَارْث نّس يُوْوِي شَان يشْتن نّغْنِي، أَتَاف يزْنَا.

¹² ثَمْغَارْث مڒَا ثدْجف إِ ورْيَاز نّس ثُوْوِي شَان يجّن نّغْنِي، أَتَاف ثزْنَا."

سِيذِيثْنغ عِيْسَى يتْبَرك يحنْجِيرن يمزْيَانن

¹³ ؤُوِين-د يِوْذَان شَان يحنْجِيرن ذ يمزْيَانن غَار عِيْسَى حمَا اَثن يحَاذَا، وَلَكِن عَارّْضن-اَسن يمحْضَارن نّس.

¹⁴ يࢲْرَا عِيْسَى مَانَايَا، وَار ذَاس يعْجِيب بُو ڒْحَاڒ ينّا-اَسن: "جّم يحنْجِيرن يمزْيَانن اَغَارِي د اَسن وَار ذَاسن تْعَارَّاضم شَا ڒَاحقَّاش ڒْمُلْك ن أَربِّـي يتِيڒِي غَار يِنِّي إِي يدْجَان اَم يِيْنَا.

¹⁵ أَقَا تسْڒَام ڒْحَقّ: لَابُد إِ بْنَاذم اَذ يَامن س ڒْمُلْك ن أَربِّـي مَامْش زَّايس يتَامن وحنْجِير اَمزْيَان. مڒَا لَّا، أَتَاف بْنَاذم نِّي عمَّارص اَذ يَاذف ذِي ڒْمُلْك ن أَربِّـي."

¹⁶ ئِذرّع-اَسن عِيْسَى يݣَّا خَاسن يفَاسّن نّس يبَرك-يثن.

أَرْيَاز إِݣ يدْجَان ذ تَّاجَر

¹⁷ عِيْسَى وَامِي يݣُّوْر خ وبْرِيذ، يُوْسَا-د غَارس يجّن يتَازّڒ يوْضَا خ يفَادّن زَّاثس ينَّا-ٱس: "آ لْمُعَلِّم اَصبْحَان، مِين غَا ݣّغ حمَا اَغَارِي ثِيڒِي ثُوْذَارْث ن ڒبْدَا؟"

¹⁸ ينَّا-ٱس عِيْسَى: "مَايمِّي ثقَّارذ قَا نش ذ اَصبْحَان؟ وَار يدْجِي حَدّ ذ اَصبْحَان إِلَّا أَربِّـي وَاحْذس.

¹⁹ ثسّْنذ ڒُوْصِيَاث: وَار نقّ، وَار زنَّا، وَار تَاشَار، وَار شهّذ بُو ࢲُّوْر، وَار شمّث، وقَّر بَابَاش ذ يمَّاش."

²⁰ ينَّا-ٱس ورْيَاز نِّي: "آ لْمُعَلِّم، زݣ وَامِي إِي دْجِيغ نش ذ اَمزْيَان تْوقَّارغ قَاع مَانَايَا."

²¹ ئِخْزَر غَارس عِيْسَى يُوْذف-اَس غَار وُوْڒ نّس ينَّا-ٱس: "قَا ثقِّيم-اَش يجّن ن ڒْحَاجث وَار ت ثݣِّيذ شَا." ينَّا-ٱس: "رُوْح زنْز مَارَّا مِين غَارك ذ اَݣْڒَا صدّق-يث خ ڒْمُسَاكِين اَغَارك يِيڒِي ڒْكنْز ذݣ وجنَّا، ڒخْدّنِّي اَرَاح-د شك ذْفَار-اَيِي-د."

²² وَامِي يسْڒَا إ مَانَاينِّي يرُوْح يخيّق اَطَّاس ڒَاحقَّاش غَارس اَطَّاس ن وَاݣْڒَا.

²³ ئِخْزَر غَارْسن عِيْسَى ينَّا-ٱسن إ يْمحْضَارن نّس: "مشْحَاڒ يقْسح خَاسن خ تْوَاجَر اَذ اَذْفن ڒْمُلْك ن أَربِّـي."

²⁴ ذهْشن يمحْضَارن نّس خ وَاوَاڒ نِّي. ينَّا-ٱسن عِيْسَى عَاوذ: "آ ثَارْوَا ينُو، مشْحَاڒ يقْسح اَذ يَاذف بْنَاذم ڒْمُلْك ن أَربِّـي!

²⁵ أَقَا يسْهڒ اَذ يعْذُو يجّن ن وڒْغم زِي ثِيطّ ن ثْسيْنفْث قْبڒ مَا ٱذ يَاذف يجّن ن تَّاجَر ذِي ڒْمُلْك ن أَربِّـي!"

²⁶ ئِمحْضَارن تْعجّْبن اَطَّاس نَّان إِ وَايَاوْيَا: "خْيَار، أُوْݣ يزمَّرن اَذ ينْجم!؟"

²⁷ ئِخْزَر غَارْسن عِيْسَى ينَّا-ٱسن: "ئِوْذَان وَار زمَّرن شَا إِ مَانَايَا. وَلَكِن أَربِّـي وَاه، ئِزمَّر إِ كُڒْشِي."

²⁸ ئِنْدق-د بُطْرُس ينَّا-ٱس: "أَقَا نشِّين نسْمح ذِي كُڒْشِي نذْفَار-يش!"

²⁹ ينَّا-ٱسن عِيْسَى: "أَقَا تسْڒَام ڒْحَقّ: مَارَّا ونِّي يسمْحن ذِي ثدَّارْث نّس نِغ ذِي أَيْثْمَاس نِغ ذِي سُوْيْثْمَاس نِغ ذِي يمَّاس نِغ ذِي بَابَاس نِغ ذِي ثَارْوَا نّس نِغ ذݣ يمَرْجعِيون نّس خ سَّبَاب ينُو نش أُو عْلَاحْسَاب لْإِنْجِيل،

³⁰ أَتَاف اَغَارس ثِيڒِي مِيَّا ن ثْسقَّار زِي ثُوْذْرِين ذ أَيثْمَاس ذ سُوْيْثْمَاس ذ يمَّاس ذ ثَارْوَا نّس ذ يمَرْجعِيون نّس. أَغَارس يِيڒِي وعدّب ذي زْمَان-أَ، وَلَكِن ذِي زْمَان إِي د غَا يَاسن اَغَارس ثِيڒِي ثُوْذَارْث ن ڒبْدَا.

³¹ أَطَّاس إِي يدْجَان ذ يمزْوُوْرَا اَذ ذوْڒن ذ ينݣُّوْرَا؛ يِنِّي يدْجَان ذ ينݣُّوْرَا اَذ ذوْڒن ذ يمزْوُوْرَا."

سِيذِيثْنغ عِيْسَى يسَّاوَاڒ عَاوذ خ ڒْموْث نّس

³² أَقَاثن خ وبْرِيذ تْݣَعَّاذن غَار ثنْدِينْت ن لْقُدْس، عِيْسَى اَقَاث زَّاث. ئِمحْضَارن نّس ذهْشن، يِنِّي ث يذْفَارن ݣّْوْذن. ئِرُوْح يُوْوِي ثنْعَاش نِّي ن يمحْضَارن نّس ثْوَاڒَا نّغْنِي وَاحذْسن، ئِبْذَا يسَّاوَاڒ اَكِذْسن خ مِين ذَاس غَا يوقْعن ينَّا:

³³ "أَقَا نتْݣَعَّاذ غَار لْقُدْس مَانِي غَا يتْوَاخْذع مِّيس ن بْنَاذم إِ اَرُّوْيَاس ن ڒْفُقَهَا ذ يمْسڒْمَاذن ن شَّرِيعَا. أَخَاس حكْمن س ڒْموْث، أَث سلّْمن إِ يِنِّي وَار يدْجِين شَا زِي أَيث-إِسْرَائِيل.

³⁴ أَخَاس ضحْشن، أَخَاس سُّوْسْفن، أَث ؤُوْثن س وسْغُوْن، أَث نْغن. نْهَار وِيس ثڒْتِيَّام اَذ د يكَّر زِي ڒْموْث."

طَّلب ن ثَارْوَا ن زَبَادِي

³⁵ يَعْقُوْب ذ يُوْحَنَّا يدْجَان ذ ثَارْوَا ن زَبَادِي قَارّْبن غَار عِيْسَى نَّان-اَس: "آ لْمُعَلِّم، نْرزُّو اَذَانغ ثْذبَّرذ مِين غَا نتَّار زَّايك."

³⁶ ينَّا-ٱسن عِيْسَى: "مِين ثْرزُّوم اَذَاوم ذبَّرغ؟"

³⁷ نَّان-اَس: "اجّ-اَنغ أَ نقِّيم ذِي لْعَظَمَا نّش يجّن خ وفُوْسِي يجّن خ وࢲڒْمَاض نّش."

³⁸ ينَّا-ٱسن عِيْسَى: "كنِّيو وَار ثسِّينم شَا مِين ثتَّارم. مَا ثْزمَّرم اَذ تسْوم زِي ڒْكَاس نِّي إِي زِي غَا سْوغ نش؟ نِغ اَذ تْغضْسم ذِي ڒَعْذَاب نِّي إِي ذِي غَا غضْسغ نش؟"

³⁹ نَّان-اَس: "وَاه، نْزمّر-اَس!" ينَّا-ٱسن عِيْسَى: "وَاه، أَتَاف اَذ تسْوم زِي ڒْكَاس نِّي إي زِّي غَا سْوغ نش، أَذ تْغضْسم ذِي ڒَعْذَاب نِّي إِي ذِي غَا غضْسغ نش.

⁴⁰ وَلَكِن اَغِيمِي خ وفُوْسِي ينُو نِغ خ وࢲڒْمَاض ينُو وَار يدْجِي بُو ذ نش إِي ث غَا يُوْشن، أَذ يمُّوْش إِ يِنِّي ؤُمِي يتْوَاسّوْجذ."

⁴¹ عشْرَا نِّي ن يمحْضَارن وَامِي سْڒِين خ مِين رزُّوْن يَعْقُوب ذ يُوْحَنَّا وَار ذَاسن يعْجِيب شَا ڒْحَاڒ.

⁴² ئِڒَاغَا-يَاسن-د عِيْسَى مَارَّا إِذْسن ينَّا-ٱسن: "قَا ثسّْنم اَرُّوْيَاس ن ڒݣْنُوْس حكّْمن خ شُّعُوْب نْسن، يِنِّي يمقّْرَانن زَّايْسن تْزيَّارن خَاسن.

⁴³ وَلَكِن مَانَاينِّي يتْخصَّا وَار يتِيڒِي شَا جَارَاوم؛ لَّا، ونِّي يرزُّوْن اَذ يذْوڒ ذ اَمقّْرَان جَارَاوم يتْخصَّا-يَاس اَذ يِيڒِي ذ اَخدَّام نْوم.

⁴⁴ ونِّي يرزُّوْن اَذ يذْوڒ ذ اَمزْوَارُو جَارَاوم يتْخصَّا-يَاس اَذ يِيڒِي ذ يسْمغ ن مَارَّا.

⁴⁵ مِّيس ن بْنَاذم ؤُڒَا ذ نتَّا وَار د يُوْسِي شَا حمَا اَخَاس خذْمن يِوْذَان؛ لَّا، نتَّا يُوْسَا-د حمَا اَخَاسن يخْذم، أَخَاسن يصدّق ثُوذَارْث نّس حمَا اَذ يسنْجم اَطَّاس زَّايْسن."

سِيذِيثْنغ عِيْسَى يسْݣنْفَا بَرْتِيمُوْس ونِّي يدْجَان ذ اَضَرْغَاڒ

⁴⁶ ؤُوْضن غَار ثنْدِينْت ن اَرِيحَا. منْبَعْد يفّغ عِيْسَى زِي أَرِيحَا اَك يمحْضَارن نّس ذ وَاطَّاس ن ڒْغَاشِي. ؤُفِين ذِنِّي يجّن ن وضَرْغَاڒ يقِّيم طَّارْف ن وبْرِيذ يتتَّار، قَّارن-اَس بَرْتِيمُوْس مِّيس ن تِمُوْس.

⁴⁷ ئِتسْڒَا بلِّي عِيْسَى نَاصِرِي إي يعدُّوْن سّنِّي يبْذَا يسْنكَّر ثْغُوْيّث يقَّار: "آ عِيْسَى آ مِّيس ن اَيث-دَاود، رحْم-اَيِي!"

⁴⁸ زيَّارن خَاس اَطَّاس ن يِوْذَان قَّارن-اَس سْقَار. نتَّا يُوْݣِي، ئِقِّيم يسْنكَّر ثْغُوْيّث عَاذ س جّْهذ يقَّار: "آ مِّيس ن أَيث-دَاود، رحْم-اَيِي!"

⁴⁹ ئِبدّ عِيْسَى ينَّا-اَسن: "ڒَاغَام-د خَاس." ڒَاغَان-د خ وضَرْغَاڒ نِّي نَّان-اَس: "فَرح شك كَّر، أَقَا يتْڒَاغَا-د خَاك عِيْسَى."

⁵⁰ ئِكّس اَزدْجَاب نّس ينْضَر-يث، ئِنخْضف ذغْيَا يبدّ خ يضَارن نّس يُوْسَا-د غَار عِيْسَى.

⁵¹ ينَّا-ٱس عِيْسَى: "مِين ثخْسذ اَذَاش ݣّغ؟" ينَّا-ٱس وضَرْغَاڒ نِّي: "آ سِيذِي، قَا نش خْسغ اَذ تْوَاڒِيغ."

⁵² ئِنْدق-د عِيْسَى ينَّا-ٱس: "رُوْح، قَا لإِيمَان نّش يسْݣنْفَا-شك!" ڒخْدّنِّي يبْذَا يتْوَاڒَا يذْفَار عِيْسَى ذݣ وبْرِيذ.