أَسڒْمذ ن سِيذِيثْنغ عِيْسَى لْكِتَاب ن مَتَّى 9 - ثريفيث 2020

سِيذِيثْنغ عِيْسَى يسْݣنْفَا يجّن ن ونشْرُوْف

¹ ئِنْيَا عِيْسَى ذِي ثْغَرَّابُوْت، ئِقْضع ڒبْحَر يروّح غَار دْشَار نّس.

² ذِنِّي شَان يِوْذَان ؤُوِين-د غَارس يجّن ن ورْيَاز مُّوْثن-اَس يضَارن، ئِزّڒ ذِي ثَاسُّوْث نّس. وَامِي عِيْسَى يࢲْرَا لْإِيمَان إِي ذَايْسن ينَّا-ٱس إِ ونشْرُوْف نِّي: "وَار تݣّْوذ شَا آ مِّي، قَا تْوَاغْفَرنْت-اَش ڒْمُعْصِيَاث نّش."

³ ذِنِّي شَان يمْسڒْمَاذن ن شَّرِيعَا قَّارن ذݣ وُوْڒَاون نْسن: "بْنَاذم-أَ يقَّار اَوَاڒ وَار يحْڒِين خ أَربِّـي."

⁴ عِيْسَى يسّن مِين تْفكَّرن ذِي ڒَعْقُوْڒَاث نْسن ينَّا-ٱسن: "مَايمِّي تْفكَّرم اَمُّو ذِي مِين وَار يحْڒِين؟

⁵ مِين يسهْڒن اَطَّاس اَذَاس ينِيغ إِ ونشْرُوْف-أَ، مَا ٱذَاس ينِيغ: تْوَاغْفَرنْت-اَش ڒْمُعْصِيَاث نّش؟ نِغ مَا ٱذَاس ينِيغ: كَّر شك ؤُيُوْر؟

⁶ نش خْسغ اَذ تسّْنم بلِّي مِّيس ن بْنَاذم غَارس سُّلْطَا خ ثْمُوْرْث حمَا اَذ يغْفَر ڒْمُعْصِيَاث." أُوْشَا ينَّا-ٱس إِ ونشْرُوْف نِّي: "كَّر، يْسِي ثَاسُّوْث نّش، رُوْح اَذ تْروّْحذ غَار ثدَّارْث نّش."

⁷ ئِكَّر ورْيَاز نِّي يروّح.

⁸ وَامِي ࢲْرِين يِوذَان مَانَاينِّي، ݣّْوْذن حمْذن أَربِّـي خ سُّلْطَا إِي ذَاسن يتِيشّ إِ يِوْذَان.

سِيذِيثْنغ عِيْسَى يتْڒَاغَا-د إِ مَتَّى

⁹ وَامِي يُوْيُوْر سّنِّي عِيْسَى، يُوْفَا يجّن ن ورْيَاز قَّارن-اَس مَتَّى يقِّيم ذݣ ومْشَان مَانِي جمّْعن ضَّرِيبَا. ينَّا-ٱس عِيْسَى: "ذْفَار-اَيِي-د!" أُوْشَا يكَّر مَتَّى يذْفَار-يث.

¹⁰ ئِقِّيم عِيْسَى ذِي ثدَّارْث ن مَتَّى يتتّ نتَّا ذ يمحْضَارن نّس. أَطَّاس ن يعشَّارن ذ يِنِّي يعْصَّان زَعْمَا قِّيمن تتّن اَكِذس.

¹¹ وَامِي ࢲْرِين ڒْحِزب ن يفَرِّيسِيْين مَانَاينِّي كَّرن نَّان-اَسن إِ يمحْضَارن نّس: "مَايمِّي يتتّ لْمُعَلِّم نْوم اَك يعشَّارن ذ يِنِّي يعْصَّان؟"

¹² ئِسْڒَا-يَاسن عِيْسَى ينَّا-ٱسن: "ئِوْذَان يصحَّان وَار تحْذِيجن بُو وضْبِيب، أَضْبِيب تحْذَاجن-ث يمهْرَاش.

¹³ رُوْحم رْزُوْم خ ڒْمَعْنَا ن لْأَيَا إِي يقَّارن: خْسغ اَذ تْرحْمم يوْذَان، وَار خْسغ بُو اَذ تْغَرْصم إِ ڒبْهَايم." ينَّا-ٱسن: "وَار د ؤُسِيغ شَا اَذ ڒَاغِيغ إِ يِنِّي يدْجَان نِيشَان، ؤُسِيغ-د اَذ ڒَاغِيغ إِ يِنِّي يعْصَّان!"

¹⁴ ثُمَّا قَارّْبن-د يمحْضَارن ن يَحْيَى غَار عِيْسَى نَّان-اَس: "مَايمِّي نشِّين ذ ڒْحِزب ن يفَرِّيسِيْين ڒبْدَا نتْࢲُوْمَّا، ئِمحْضَارن نّش وَار تْࢲُوْمِّين شَا؟"

¹⁵ ينَّا-ٱسن عِيْسَى: "ئِمدُّوْكَاڒ ن مُوْڒَاي، مَا زمَّرن اَذ خيّْقن ذِي نْهَار نِّي ن ڒْفَارْح نّس؟ لَّا، وَلَكِن اَذ د اَسن وُوْسَّان اَذ يميْسِي مُوْڒَاي زِي ڒْوسْط نْسن. ڒخْدّنِّي اَذ ࢲُوْمّن!

¹⁶ وَار يدْجِي حَدّ يتْرقَّاع اَرُّوْض ذ ڒْبَاڒِي س يِجّن ن ثْرقِّيعْث ن تُّوْب ذ جْذِيذ، مَايمِّي؟ ڒَاحقَّاش ثَرقِّيعْث نِّي ن جْذِيذ اَذ تْنجْمع أُوْشَا اَذ تْوَاكّس زݣ وَارُّوْض نِّي ن ڒْبَاڒِي. ڒخْدّنِّي اَذ يقِّيم وشَارِّيݣ يمْغَر!

¹⁷ ؤُڒَا ذ اَمَان ن وضِيڒ ذ جْذِيذ وَار خدْجْقن شَا ذݣ يڒمَاون يقْذِيمن، حمَا وَار دُّوْقُّوْزن وَار تْزدْجِيعن شَا وَامَان ن وضِيڒ اَذ ضيّْعن يڒمَاون نِّي. وَلَكِن اَمَان ن وضِيڒ ذ جْذِيذ خدْجْقن ذݣ يڒمَاون ذ جْذِيذ. أَمنِّي وَار تْضيِّيع ؤُڒَا ذ يجّن ن ڒْحَاجث: لَّا اَمَان وضِيڒ، لَّا يڒمَاون."

سِيذِيثْنغ عِيْسَى يسْݣنْفَا يدْجِيس ن يِجّن ن اَرَّايس

¹⁸ وَامِي تُوْغَا عَاذ يقَّار عِيْسَى مَانَايَا، يُوْسَا-د غَارس يجّن ن اَرَّايس يسجّذ-اَس ينَّا-ٱس: "يدْجِي قَا ڒخُّو إِي ثمُّوْث. يَالَّاه اَكِذِي سرْس خَاس فُوْس نّش حمَا اَذ تدَّر."

¹⁹ ئِكَّر عِيْسَى يذْفَار-يث نتَّا ذ يمحْضَارن نّس.

²⁰ ذِنِّي يجّن ن ثمْغَارْث ثنْعَاش يسݣّْوُسَا زݣ وَامِي إِي ثهْڒش، تَازَّڒ س يذَامّن. ثذْفَار عِيْسَى، ثْحَاذَا-يَاس طَّارْف ن وسڒْهَام نّس.

²¹ ثنَّا قْبڒ ذݣ وُوْڒ نّس: "مڒَا حَاذِيغ غِير اَسڒْهَام نّس اَتَاف اَذ ݣنْفِيغ."

²² ئِنقْڒب غَارس عِيْسَى يࢲْرِي-ت أُوْشَا ينَّا-ٱس: "وَار تݣّْوذ شَا آ يدْجِي، شم لْإِيمَان نّمْ يسْݣنْفَا-شم." ثْݣنْفَا ثمْغَارْث نِّي ڒخْدّنِّي.

²³ وَامِي يُوْوض عِيْسَى غَار ثدَّارْث ن اَرَّايس نِّي، ئِتْوَاڒَا ذِنِّي ڒبْعَاض زِي ڒْغَاشِي يتْزمَّارن لْمُوْسِيقَا ومتِّين أُو ذ يِجّن ن لْهَرَاج.

²⁴ ينَّا-ٱسن عِيْسَى: "فّْغم سَّا! أَقَا ثَحنْجِيرْث-أَ وَار ثمُّوْث شَا، ثطّص وَاهَا!" ڒخْدّنِّي بْذَان ضحّْشن خَاس.

²⁵ وَامِي سُوْفْغن يوْذَان نِّي، يُوْذف غَار وخَّام يطّف-اَس ذݣ وفُوْس إِ ثْحنْجِيرْث نِّي أُوْشَا ثكَّر.

²⁶ ئِفّغ ڒخْبَار غَار مَارَّا اَيثْبَاب ن ثْمُوْرْث نِّي.

سِيذِيثْنغ عِيْسَى يسْݣنْفَا ثْنَاين ن يضَرْغَاڒن ذ يج وزيْنُوْن

²⁷ يُوْيُوْر سّنِّي عِيْسَى، ذْفَارن-ث ثْنَاين ن يضَرْغَاڒن تْڒَاغَان قَّارن: "آ مِّيس ن أَيث-دَاود، رْحم-اَنغ!"

²⁸ وَامِي يُوْذف عِيْسَى غَار ثدَّارْث، قَارّْبن غَارس يضَرْغَاڒن نِّي. ينَّا-ٱسن عِيْسَى: "مَا ثُوْمْنم بلِّي نش زمَّرغ اَذ ݣّغ مَانَايَا؟" نَّان-اَس: "وَاه آ سِيذِي."

²⁹ أُوْشَا يحْذَا-يَاسن عِيْسَى ثِيطَّاوِين ينَّا-ٱسن: "عْلَاحْسَاب لْإِيمَان نْوم إِي غَا تْوَاݣنْفَام."

³⁰ ڒخْدّنِّي نُوْرْزْمنْت ثِيطَّاوِين نْسن. يعْڒم-اَسن عِيْسَى ينَّا-ٱسن: "غَارْوم اَذ يفّغ ڒخْبَار-أَ غَار شَا حَدّ!"

³¹ وَلَكِن نِثْنِي رُوْحن سُوْفْغن ڒخْبَار نِّي خ عِيْسَى ذِي ثْمُوْرْث نِّي مَارَّا.

³² ذِي ڒْوقْث إِي ذِي رُوْحن، شَان يِوْذَان ؤُوِين-اَس-د إِ عِيْسَى يجّن ن ورْيَاز ذ اَزيْنُوْن ذَايس جّنّ.

³³ وَامِي يسُوْفغ عِيْسَى جّنّ نِّي، يبْذَا وزيْنُوْن نِّي يسَّاوَاڒ. قِّيمن تْعجّْبن ڒْغَاشي نِّي نَّان: "عمَّارْص مَا يوْقع مَانَايَا ذِي ثْمُوْرْث ن أَيث-إِسْرَائِيل."

³⁴ وَلَكِن ڒْحِزب ن يفَرِّيسِيّْين نَّان: "نتَّا يسُوْفُوْغ جْنُوْن ڒَاحقَّاش اَرَّايس ن جْنُوْن يُوْشَا-ٱس جّْهذ-أَ."

³⁵ يُوْيُوْر عِيْسَى ذِي مَارَّا ثِندَّام ذ ڒدْشُوْر، ئِسڒْمَاذ ذِي ثمْزِيذَاوِين ن أَيث-إِسْرَائِيل يتْحدَّاث يتْبشَّار س ڒْمُلْك ن أَربِّـي. ئِسْݣنْفَا مَارَّا ڒهْڒَاشَاث ذ دِّيعَان ن دَّات.

³⁶ يࢲرّ عِيْسَى ڒْغَاشِي نِّي قّْسن-اَس مِينْزِي تْوَاعدَّابن تْنهْوَاڒن، ݣِّين اَمشْنَاو يحُوْڒِيْين وَار غَارْسن شَا ؤُو ثن غَا يَروْسن.

³⁷ ينَّا-ٱسن إِ يمحْضَارن نّس: "ثَفدْجَاحْث اَطَّاس وَلَكِن ذْرُوس يشوَّارن إِي غَا يخذْمن.

³⁸ تَّارث زِي بَاب ن ثْفدْجَاحْث اَد يَرْنِي يشوَّارن ذݣ ومَرْجع نّس."