أَسڒْمذ ن سِيذِيثْنغ عِيْسَى لْكِتَاب ن مَتَّى 23 - ثريفيث 2020ڒفْضِيحَاث ن يمْسڒْمَاذن ن شَّرِيعَا ذ ڒْحِزب ن يفَرِّيسِيْين 1 ئِسِّيوڒ عِيْسَى اَك يمحْضَارن نّس ذ يِوْذَان 2 ينَّا-ٱسن: "ئِمْسڒْمَاذن ن شَّرِيعَا ذ ڒْحِزب ن يفَرِّيسِيْين قِّيمن-اَس إِ مُوْسَى خ ڒْكُرْسِي نّس، يعْنِي سڒْمَاذن شَّرِيعَا نّس. 3 خ مَانَايَا، تݣّث مَارَّا مِين ذَاوم قَّارن، خذْمم زَّايس. وَلَكِن وَار تݣّم شَا اَم نِثْنِي، مَايمِّي؟ لِأَنَّا نِثْنِي وَار تݣّن شَا مِين قَّارن. 4 تْشدَّان ڒحْمڒ يذقْڒن يقسْحن خ يِوْذَان حمَا اَث اَرْبُوْن، وَلَكِن وَار تْحِيذِين شَا ڒحْمڒ نِّي ؤُڒَا س ؤُضَاض نْسن. 5 مَارَّا مِين تݣّن حمَا اَغَارْسن خْزَرن يِوْذَان: تݣّن ڒحْرُوْز ذ يمقّْرَانن، اَرنِّين ثِيشْڒُوڒِين إِ يزدْجَابن نْسن. 6 تخْسن يمُوْشَان يمزْوُوْرَا ذِي ڒفْرُوْح ذ ثمْزِيذَاوِين. 7 تخْسن اَخَاسن سدْجْمن ذِي ڒسْوَاق اَذَاسن ڒَاغَان يِوْذَان: آ سِيذِيثْنغ. 8 وَلَكِن كنِّيو، وَار تجَّام حَدّ اَذَاوم يڒَاغَا: آ سِيذِيثْنغ. ڒَاحقَّاش كنِّيو مَارَّا ذ اَوْمَاثن غَارْوم يجّن ن سِيذِيثْوم. 9 وَار تْڒَاغَام إِ حَدّ ذِي ثْمُوْرْث: آ بَابَاثْنغ. ڒَاحقَّاش غَارْوم غِير يجّن ن بَابَاثْوم اَقَاث ذݣ وجنَّا. 10 وَار تجَّام حَدّ اَذَاوم يڒَاغَا: آي اَمْسڒْمَاذ. ڒَاحقَّاش غَارْوم غِير يجّن ن ومْسڒْمَاذ، نتَّا ذ لْمَسِيح. 11 أَمقّْرَان جَارَاوم يتْخصَّا اَذ يِيڒِي ذ اَخدَّام نْوم. 12 ونِّي يسمْغَارن يخف نّس، أَتَاف اَذ يِيڒِي ذ اَمزْيَان. ونِّي يسمْزْيَان يخف نّس، أَتَاف اَذ يِيڒِي ذ اَمقّْرَان. 13 يَا ڒفْضِيحث نْوم آي يمْسڒْمَاذن ن شَّرِيعَا ذ ڒْحِزب ن يفَرِّيسِيْين، آ لْمُنَافِقِين! تقّْنم ثَوَّارْث ن ڒْمُلْك وجنَّا خ يِوْذَان. كنِّيو وَار تِيذْفم، وَار تجِّيم وِي غَا يَاذْفن. 14 {يَا ڒفْضِيحث نْوم آي يمْسڒْمَاذن ن شَّرِيعَا ذ ڒْحِزب ن يفَرِّيسِيْين، آ لْمُنافِقين! تتّم إِ ثَاجَّاڒِين مَارَّا مِين غَارْسنْت. ثسْمظْهَارم-د يخف نْوم تْࢲَادْجَام اَطَّاس حمَا اَذ تْبيّْنم إِ يِوْذَان بلِّي ثْصبْحم اَطَّاس زَعْمَا. خ مَانَاينِّي اَذ تْوَاعَاقْبم كْتَار.} 15 يَا ڒفْضِيحث نْوم آي يمْسڒْمَاذن ن شَّرِيعَا ذ ڒْحِزب ن يفَرِّيسِيْين، آ لْمُنَافِقِين! تكّم مَارَّا ڒبْحَر ذ ڒْبَرّ حمَا اَذ تْجَرّم شَان يِجّن غَار دِّين نْوم. أُو خْمي إِي كِوم غَا يِيڒِي، تَارِّيم-ث يسْذَاهدْج ثِمسِّي مَارْثَاين كْتَار زِي مِين ثسْذَاهدْجم كنِّيو. 16 يَا ڒفْضِيحث نْوم، آي يضَرْغَاڒن يتْجَرَّان يوْذَان! ثقَّارم: وَار ثْسݣّْوِي وَالُو ثْجَادْجِيث س ثمْزِيذَا ثَمقّْرَانْت، وَلَكِن ونِّي غَا يجَّادْجن س دّْهب ن ثمْزِيذَا ثَمقّْرَانْت يتْخصَّا اَخَاس يكمّڒ خ ثْجَادْجِيث نّس. 17 آي يفْغَار آي يضَرْغَاڒن، مِين يسݣّْوَان كْتَار؟ مَا ذ دّْهب مَا ذ ثَمْزِيذَا ثَمقّْرَانْت إِݣ يُوْشِين لْقِيمَا إِ دّْهب؟ 18 ثقَّارم عَاوذ: وَار ثسݣّْوِي وَالُو ثْجَادْجِيث س ڒْمذْبَح، وَلَكِن ونِّي غَا يجَّادْجن س دْبِيحَاث يدْجَان خ ڒْمذْبَح، يتْخصَّا اَخَاس يكمّڒ خ ثْجَادْجِيث نّس. 19 آي يضَرْغَاڒن، مِين يسݣّوَان كْتَار: ذ دْبِيحَاث نِغ د ڒْمذْبح يتِيشّن لْقِيمَا إِ دْبِيحَاث؟ 20 خ مَانَايَا، ونِّي يتْجَادْجَان س ڒْمذْبح، يتْجَادْجَا زَّايس ذ مَارَّا مِين خَاس. 21 ونِّي يتْجَادْجَان س ثمْزِيذَا ثَمقّْرَانْت، ئِتْجَادْجَا زَّايس ذ أَربِّـي إِي ت يزدّْغن. 22 ونِّي يتْجَادْجَان س وجنَّا، يتْجَادْجَا س لْعَرْش ن أَربِّـي ذ ونِّي خَاس يقِّيمن. 23 يَا ڒفْضِيحث نْوم، آي يمْسڒْمَاذن ن شَّرِيعَا ذ ڒْحِزب ن يفَرِّيسِيْين، آ لْمُنَافِقِين! تِيشّم ڒَعْشُوْر ؤُڒَا خ نَعْنَاع ذ ؤُوْرَام ذ ڒْشمُّوْن، وَلَكِن وَار تهْتِيمِيم شَا مِين يدْجَان مُهِم قَاع ذِي شَّرِيعَا يعْنِي ڒْحَقّ ذ اَرَّحْمث ذ لْإِيمَان. لَّا، ئِتْخصَّا-ٱوم اَذ تهْتَامم س مَانَايَا بڒَا مَا تتُّوْم ڒَعْشُوْر. 24 آي يضَرْغَاڒن يتْجَرَّان يوْذَان! تْصفِّيم يزِي زِي مِين ثْسسّم، ثسْغدْجَايم اَڒْغم! 25 يَا ڒفْضِيحث نْوم آي يمْسڒْمَاذن ن شَّرِيعَا ذ ڒْحِزب ن يفَرِّيسِيْين، آ لْمُنَافِقِين! كنِّيو ثْسِيرِيذم مْلِيح ڒْكَاس ذ طبْصِي غَار بَارَّا، وَلَكِن غَار ذَاخڒ اَقَا شُّوْرن س ثُوْكَّارْذَا ذ طّْمَع! 26 آي اَفَرِّيسِي اَضَرْغَاڒ، ذ اَمزْوَارُو سِيرذ ڒْكَاس غَار ذَاخڒ حمَا اَذ يِيڒِي يسِيرذ غَار بَارَّا. 27 يَا ڒفْضِيحث نْوم آي يمْسڒْمَاذن ن شَّرِيعَا ذ ڒْحِزب ن يفَرِّيسِيْين، آ لْمُنَافِقِين! كنِّيو اَمشْنَاو يمضْڒَان يبيّْضن س جِّير. تْمظْهَارن صبْحَان غَار بَارَّا، وَلَكِن نِثْنِي شُّوْرن غَار ذَاخڒ س يِخْسَان ذ مَارَّا مِين يَرشَّان. 28 أَمنِّي كنِّيو إِي تْمظْهَارم إِ يِوْذَان نِيشَان إِي ثدْجَام غَار بَارَّا، وَلَكِن غَار ذَاخڒ ثشُّوْرم س نِّفَاق ذ ڒْمُعْصِيَاث. 29 يَا ڒفْضِيحث نْوم آي يمْسڒْمَاذن ن شَّرِيعَا ذ ڒْحِزب ن يفَرِّيسِيْين، آ لْمُنَافِقِين! كنِّيو ثْبنَّام يمضْڒَان ن لْأَنْبِيَا، ثْعدّْڒم يمْرَابذن ن ڒْمُوْمِنِين. 30 ثقَّارم: مَعْلِيك ندْجَا ذِي ڒْوقْث ن ڒجْذُوْذ نّغ، أَتَاف وَار كِذْسن نْسِيزّڒ شَا يذَامّن ن لْأَنْبِيَا. 31 خ مَانَاينِّي ثْشهّْذم خ يِيخف نْوم بلِّي كنِّيو ذ ثَارْوَا ن يِنِّي ينْغِين لْأَنْبِيَا. 32 إِيوَا، كمّْڒث كنِّيو خ مِين بْذَان ڒجْذُوْذ نْوم! 33 آي يفِيغرَان! آ ثَارْوَا ن ثْفِيغرَاوِين! مَامّش ثْفكَّرم اَذ تَروْڒم زِي لْعِقَاب ن جَهنَّامَا؟ 34 خ مَانَايَا خْزَرم! تْسكِّيغ-اَوم-د لْأَنْبِيَا ذ يمِيغِيسن ذ يمْسڒْمَاذن. ئِجّن زَّايْسن اَث ثنْغم، ئِجّن اَث ثْصلّْبم. ئِجّن زَّايْسن اَث ثُوْوْثم س وسْغُوْن ذِي ثمْزِيذَاوِين، ئِجّن اَخَاس ثَازّْڒم زِي ثنْدِينْت غَار ثنْدِينْت. 35 خ مَانَاينِّي اَذ تْوَاعَاقْبم خ مَارَّا يذَامّن إِي يُوْزّْڒن ن ڒْمُوْمِنِين ذِي دُّنشْت-أَ. زݣ يذَامّن ن هَابِيل ڒْمُوْمن أَڒ يذَامّن ن زَكَرِيَا مِّيس ن بَرْخِيَا إِي ثنْغِيم جَار ڒْمذْبَاح ذ ثمْزِيذَا ثَمقّْرَانْت. 36 أَقَا تسْڒَام ڒْحَقّ: مَارَّا لْعِقَاب-أَ اَذ د يهْوَا خ يِوْذَان ن ڒْوقْث-أَ! سِيذِيثْنغ عِيْسَى يتْخيَّاق خ ثنْدِينْت ن لْقُدْس 37 يَا لْقُدْس يَا لْقُدْس! ذ شم إِݣ ينقّن لْأَنْبِيَا، ذ شم إِݣ يرجّْمن يِنِّي غَارم د يسّكّ أَربِّـي! نش مشْحَاڒ ن ثْوَاڒَاثِين خْسغ اَذ سْمُوْنغ ثَارْوَا نّمْ اَم شَان ثْيَازِيط يتحْبُوْبُوْضن خ يفِيدْجُوْسن نّس وَلَكِن كنِّيو ثُوْݣِيم. 38 أَقَا ثَدَّارْث نْوم اَذَاوم ثقِّيم ذ ڒْخِرْبث. 39 أَذَاوم ينِيغ بلِّي وَار ذَايِي ثْࢲرّم شَا عَاوذ حتَّا ٱڒ نْهَار نِّي إِي غَا ثِينِيم: سَّعْذ يَا ونِّي إِي د يُوْسِين عْلَاحْسَاب يسم ن سِيذِي أَربِّـي!" |